II Krọnikol 23 - Edo Bible (E Baibol Ẹdo) Version 1996

Iran Sọtẹ Atalaia

¹ O ghi mudia la ukpo ehan nẹ, e Jehoaida ne ohẹn keghi kha wẹ ẹghẹ sẹ nẹ ne a ru ne ọ khẹ ke. Ọ keghi gu ivbiyokuo isẹn hẹnhẹn unu ẹnrẹn; iran na ọrọre Azaraia ne ovbi e Jeroham, Ismaẹl ne ovbi e Jehohanan, Azaraia ne ovbi Obẹd, e Maaseia ne ovbi Adaia kevbe Elisiafat ne ovbi e Zikri.

² Iran keghi la ẹvbo ni rre Juda hia gaa, iran na viọ avbe Livai hia kevbe avbe ọkaẹgbẹe ni rrọ hia ba egbe gha die Jerusalẹm.

³ Iran hia keghi do si egbe koko vbe Ọgua Osa, iran na ye egbe ye ulamwẹ ne Joas ne ovbi ọba, e Jehoiada keghi khama iran wẹẹ, “Ovbi ọba ne ọ rrie a i wua ọre ọna khin. Te a ghi ra ya ẹe rriọba na zẹ vbene Nọyaẹnmwa yan ma e Devid wẹ ivbi uniẹn ọnrẹn gha ye.

⁴ Emwi ne ima gha ru ọ re ọna khin. Avbe ohẹn kevbe Livai gha do winna vbe Ẹdẹ Ikẹtin, a ghi wa iran ye ihẹ eha ne obọkpa vbọ gha khẹ onurho Ọgua Osa.

⁵ Obọ ne ogieva ghi gha khẹ ẹguae ọba, a ghi viọ eni dekẹe ye Urho Ẹyotọ. Emwa hia ghi do si egbe koko vbe ẹghodo Ọgua Osa.

⁶ A i vbe gie ọmwa rhọkpa la uwu Ọgua Osa, gberra avbe ohẹn kevbe Livai ne iwinna sẹ ọ re egbe ẹdẹrriọ. Iran sẹtin la owa, rhunmwuda, te a ya iran fi ohan, sokpan, avbe emwa nekpa ghi ru vbe ne Nọyaẹnmwa yi uhi ẹre, iran ghi gha rre orere.

⁷ Avbe Livai ghi mudia ke ọba gha bodẹ ne ẹẹn, iran kevbe umozo ne a yuolo hin ako rre. Iran ghi gha mudia ke ọba vbe eheikehe ne ọ rhirhi a yo. Ọmwaikọmwa ne ọ rhirhi hia ne ọ la uwu Ọgua Osa, a ghi gbe ẹe rua.”

⁸ Avbe Livai kevbe ivbi e Juda keghi ru vbene Jehoiada kha ma iran. A ma gie emwa ni kpao vbe iran zobọ vbe iwinna ẹdẹrriọ, ne Ẹdẹ Ikẹtin. Rhunmwuda ọnii, iran ne ọkaokuo kegha mwẹ emwa, usun iran ni te zobọ nẹ kevbe iran ni do suẹn iwinna.

⁹ E Jehoiada keghi viọ avbe asoro kevbe asa ọghe Devid ne ọba ne a viọ ye uwu Ọgua Osa ne avbe ekaokuo.

¹⁰ Ọ na ghae iran ni viọ umozo ne a yuolo hin ako rre mwẹ obọ lẹga odaro Ọgua Osa, ne iran gha wan ga ọba.

¹¹ Ẹre Josaia na rhie Joas ladian, ọ na mu ẹdẹ ye ọre uhunmwu, ọ na mu ebe ilele ẹmwẹ ọba ye ọre obọ. A keghi ma ẹre ọba, ẹre Jehoiada ne ohẹn kevbe avbe ivbi ẹre keghi nọnọ ori yan Joas uhunmwu, emwa hia keghi wa wee kha wẹẹ, “Ọba gha tọ ọ kpẹre.”

¹² Atalaia keghi họn vbe emwa go wan ọba, ọ keghi zẹgiẹgiẹ ladian gha rrie Ọgua Osa, ehe ne emwa ni si koko yi.

¹³ Evba ọ re ọ na ya bẹghe ọba ọgbọn nii vbe onurho Ọgua Osa, ọ mudia vbe orre ne ọ re ọghe avbe ọba ọkpa, avbe ọkaokuo kevbe iran ni kpe okpe lẹga ẹre. Emwa nii hia wa wee uwemwẹ oghọghọ, iran gha kpe okpe. avbe ikpemaba Ọgua Osa, iran kevbe emwi ne a kpee ọghe iran hia, iran ọre ọ wa ke odaro vbe emwi ne a ru na. Okhuo na keghi sọ ukpọn rẹn ya rhie ma wẹ te irẹn khiẹ yọ, ọ na datu wẹẹ, “Isọtẹ! Isọtẹ!”

¹⁴ E Jehoiada ma ho ne a gbe Atalaia ye ehe ne ọ sikẹ Ọgua Osa, ọ keghi rhunmwuda ọnii tie avbe ọkaokuo ladian, ọ tama iran wẹẹ, “Wa rhie ẹre la adesẹ uviẹn ne iran ni khẹ odẹ tẹn rẹn na, ọmwaikọmwa ne ọ ho ne irẹn wọlọ ẹe rhie ladian, wa wa gbe ẹe rua.”

¹⁵ Iran keghi gua ẹe rhie iran na sii ẹe gha rrie ẹguae, iran na ya gbe ẹe rua vbe Onurho Ẹsin vbe evba.

Adọlọ Ne Jehoiada Ru

¹⁶ E Jehoiada ne ohẹn keghi rhie ọba Joas ba egbe kevbe avbe emwa nii, iran na ru eyan wẹ iran ghaa re emwa e Nọyaẹnmwa.

¹⁷ Iyeke ọnii, iran hia kegha rrie aro e Baal, iran na guoghọọ ọe rua, iran na dunmwu avbe Ogiukpo ni rre evba kevbe avbe amazẹ ua. Iran keghi gbe Matan ne ohẹn e Baal ye odaro avbe Ogiukpo.

¹⁸ E Jehoiada keghi mu iwinna ni rre Ọgua Osa ne avbe ohẹn kevbe avbe Livai. Iran ghi gha winna avbe iwinna ne ọba Devid wa ne iran, iran ghi vbe giẹn avbe emwi ne a ya zọ ese ghe Nọyaẹnmwa, zẹ vbene Uhi e Mosis muẹn ye otọ. Iran ọ re ọ vbe yan iwinna ẹgiọn kevbe emaba ne a kpee kevbe avbe ugie ne a do.

¹⁹ E Jehoaida keghi vbe viọ emwa ni khẹ odẹ ye onurho Ọgua Osa ne iran gha khulo emwa ne awua gue werriegbe.

²⁰ Avbe iran ne ọkaokuo, kevbe emwa ni hin usi vbe ẹvbo, deba avbe olotu, kevbe avbe emwa nekpa hia, keghi deba e Jehoaida tẹn ye uviẹn ya rhie ọba ke Ọgua Osa gha die ẹguae. Iran keghi la onurho nọkhua la owa, ọba na tota ye ẹkete ẹre.

²¹ Ọyẹnmwẹ kegha sẹ emwa hia, ore keghi do furre vbe iran gbe ẹe rua nẹ ighẹ Atalaia.