II Krọnikol 22 - Edo Bible (E Baibol Ẹdo) Version 1996

Ahazaia Ne Ọba E Juda

¹ Ivbe Arab eso keghi mu okuọ odogbe ya gbele ivbi e Jehoram ni ikpia hia, a keghi miẹn wẹ Ahazaia ne ovbi ẹre ne ọ ke otọ ọkpa ọre ọ kere. Rhunmwuda ọnii, ivbi e Jerusalẹm na ye Ahazaia rriọba lele erha ẹe.

^2-3 Ọmọ ukpo eva yan ugie ọ re Ahazaia gha ye vbe ọ rriọba, ọ keghi ya ukpo ọkpa vbe ẹkete vbe Jerusalẹm. Ahazaia kevbe lele igiemwi ẹgbẹe Ehab ne ọba, rhunmwuda, Atalaia ne iye ẹe, ne ovbi Ehab kevbe eyẹ Ọmri ne ọba Izrẹl, ọ re ọ gha bu ẹre ude ne ọ si ẹre obọ la emwi dan.

⁴ Ọ keghi sẹmwẹ e Nọyaẹnmwa, rhunmwuda, erha ẹe ghi wu nẹ, emwa ọvbehe vbe ẹgbẹe Ehab ne ọba, ọ re ọ gha bu ẹre ude ne udemwẹ ọnrẹn la rre.

⁵ Zẹ vbene iran bu ẹre ude, ọ keghi lele Joram ne ọba gha rrie okuọ ne ọ mu gie Hazẹl ne ọba e Siria. E Ramọt ne Giliad ọ re avbe ivbiyokuo na vba egbe. Emwi keghi vba e Joram ne ọba vbe okuọ.

⁶ Rẹn kegha rrie Jezrẹl ne ọ ya gbe aro ghe egbe vbe ekpa emwi ne ọ vba ẹre. Ẹre Ahazaia na gha khian ya rhuan rẹn ghe.

⁷ Otuẹ ne a mu gie Joram na ọre Osanobua rhie obọ lele rrua Ahazaia gbe otọ. Ugbẹn vbe Ahazaia ghi rre evba, ọkpia ne a tie ẹre Jehu ne ovbi e Nimsi keghi mu aro igbinna da Joram, ọmwa na ọ re Nọyaẹnmwa gie ne ọ fuẹn ivbi uniẹn Ehab ua.

⁸ Uwu ẹghẹ ne Jehu na gha ru ivbi uniẹn na zẹ vbene Osanobua wẹ ne ọ ruẹe, ọ keghi do dekun emwa eso ni re avbe ọkaolotu vbe Juda kevbe etẹn Ahazaia ni lele Ahazaia gha die otuẹ na, e Jehu keghi gbele iran hia a.

⁹ A na gualọ Ahazaia, a keghi miẹn ọẹn vbe ọ lẹre vbe Sameria. Iran keghi mu ẹẹn gie Jehu, ọ na gbe ẹe rua. Sokpan, iran re orinmwi ẹnrẹn rhunmwuda erha ẹe nọkhua ighẹ Jehosiafat, ne ọ wa lo ẹtin ẹnrẹn hia ya ga e Nọyaẹnmwa. A ma ghi zẹdẹ sẹ orhiọnkpa ne ọ gha sẹtin rriọba yan otọe nii rae vbe ẹgbẹe Ahazaia.

Atalaia Ne Oha Okhuo E Juda

¹⁰ Ọwarọkpa vbe Atalaia ne iye ọba Ahazaia ghi họn ighẹ iran gbe Ahazaia ua, ọ na wẹ ne iran wa gbele ivbi uniẹn ọba ni rre Juda hia a.

¹¹ Ahazaia kegha mwẹ ọtẹn okhuo ọkpa, ne okhuo ọvbehe biẹ ne erha ẹe, a tie eni ẹnrẹn Jehosieba, okhuo na keghi hẹko wọlọ ọkpa ne a tie ẹre Joas ladian vbe ivbi Ahazaia ni ikpia ne a ra gbele ua, ọ na ya rhie ẹre ke ọmwa ne ọ koko ẹe lẹre ye ughugha ne a vbiẹ ọkpa vbe Ọgua Osa. Rhunmwuda ne ọ na rhie ẹre lẹre nii, obọ Atalaia ma ghi vba ẹre ya gbua.

¹² Vbe ukpo ehan gbalaka, ọ kegha rre ehe ne a rhie ẹre lẹre yi nii, vbe Atalaia rre ẹkete zẹ vbe ọba ne Okhuo.