II Krọnikol 21 - Edo Bible (E Baibol Ẹdo) Version 1996

¹ E Jehosiafat keghi wu, a na re ẹre ye idin avbe ọba vbe Ẹvbo e Devid, e Jehoram ne ovbi ẹre keghi rriọba lele ẹe.

E Jehoram Ne Ọba E Juda

² E Jehoram ne ovbi e Jehosiafat ne ọba e Juda kegha mwẹ etẹn ikpia ehan; ena ọre Azaraia, Jẹhiẹl, Zẹkaraia, Azariahu, Maikẹl kevbe Siefatia.

³ Erha iran keghi viọ ọrhẹnrhẹn igoru, esiliva kevbe emwi ighobioye ni bun ọvbehe ne iran. Ọ keghi mu ọkpọkpa vbe avbe ẹvbo ne a gba odin gaa vbe Juda, ne iran gha gbe aro ghe sokpan, rhunmwuda ighẹ Jehoram ọrọre ọdiọn, e Jehosiafat keghi ya ẹe ru ne ọ gha rriọba lele irẹn.

⁴ Obọ e Jehoram ghi wa gba otọe arriọba ni hia nẹ, ọ keghi gbele avbe etiọnrẹn hia a deba eso vbe avbe ekaokuo ivbi Izrẹl.

⁵ Ukpo evayan ọgban ọre Jehoram ye vbe ọ rriọba, ọ keghi ya ukpo erẹnrẹn vbe ẹkete vbe Jerusalẹm.

⁶ Ọ keghi lele uyinmwẹ dan ọghe ọba Ehab kevbe avbe ọba nekpa ọghe Izrẹl, rhunmwuda ighẹ ovbi Ehab ne okhuo ọ re ọ rhiere. Ọ keghi sẹmwẹ e Nọyaẹnmwa.

⁷ Sokpan, e Nọyaẹnmwa ma ho ne ọ wa fuẹn ivbi uniẹn e Devid fo, rhunmwuda, ọ gu e Devid ta ile nẹ, ọ kevbe yan ma ẹnrẹn wẹ ivbi ẹre ọ re ọ ra gha rriọba khian.

⁸ Ẹghẹ ne Jehoram na gha rre ẹkete, Idọm keghi sọtẹ e Juda, ọ na khian arriọba enoyan egbe ẹre.

⁹ Ẹre Jehoram kevbe avbe ekaokuo ẹre na viọ ikẹkẹ okuọ ladian iran na mu okuọ gha rrie Idọm. Iran ghi sẹ odẹ, ivbiyokuo Idọm keghi ghae lẹga iran, sokpan, ọ ghi sẹ asọn, iran keghi miẹn ehe ye uhunmwu ha ladian, iran na lẹ kua.

¹⁰ Idọm ma ghi dọlegbe ga gie Juda ke ẹghẹ nii gha dee. Vbe ẹghẹ ne a vbe kha na, ọ re ẹvbo ne a tie ẹre Libna na vbe sọtẹ, rhunmwuda e Jehoram na fi iyeke gbe Nọyaẹnmwa ne Osanobua avbe erha ẹe odede.

¹¹ Uhin ighẹ te ọ bọlọ aro ẹbọ lele oke ni rre Juda, ọ na ya ivbi e Juda kevbe Jerusalẹm sẹmwẹ e Nọyaẹnmwa.

¹² Elaija ne akhasẹ keghi gbẹnnẹ ẹmwẹ na rhie gie Jehoram vbenian wẹẹ, “E Nọyaẹnmwa ne Osanobua e Devid ne erha a odede, bu abe gbuẹ nẹ rhunmwuda, u ma lele igiemwi Ọba e Jehosiafat ne erha a ra ọghe Ọba Asa ne erhaa nọkhua.

¹³ Sokpan, u keghi lele igiemwi avbe ọba Izrẹl, u na ye ivbi e Juda kevbe ivbi e Jerusalẹm khian ni ma ghi guobọ e Nọyaẹnmwa zẹ vbene Ehab kevbe iran ni rriọba lele ẹe silo ivbi Izrẹl hin iyayi rre. Sẹe hia, u keghi gbele iran ighẹ avbe etuẹn ni re emwa ni maa sẹ ruẹ.

¹⁴ Emwi ne ọ ghi ra la ẹe rre ọrọre wẹ Osanobua gha rria emwa ruẹn ikhi nọ wegbe, ivbuẹ kevbe avbe amwẹ ọn, ọ ghi fuẹn emwi ne u mwẹ hia a.

¹⁵ Wẹ tobọ ruẹ gha khuọnmwi emianmwẹ ẹko ne ọ wegbe ne ọ ra gha rhia yọ ẹdẹgbegbe.”

¹⁶ Ivbi e Filistin kevbe ivbi Arab eso kegha rre ọkpẹn ehe ne ivbi e Sudan eso yinrin vbe eghute. E Nọyaẹnmwa keghi rhie ye iran ekhọe ne iran ya gu e Jehoram khọn.

¹⁷ Iran keghi mu okuọ la e Juda, iran na fu emwi viọ vbe ẹguae ọba, iran keghi viọ avbe ivbi ọba kevbe amwẹ ọnrẹn hia oghunmwu gha rrie, a keghi miẹn wẹ Ahazaia ne ovbi ẹre ne okpia ne ọ kotọ ọkpa ọre iran ghi sẹrae.

¹⁸ Vbe iyeke ọnọna, e Nọyaẹnmwa keghi gie emianmwẹ ibiẹ nọwegbe gie ọba.

¹⁹ Ọ kegha rhia yọ kherhe kherhe la omwa ukpo eva a te miẹn wẹ uwu obalọ ọ re ọba ni wu yi. Emwa rẹn na kuẹ ogidi erhẹn ya khiẹ ọ re zẹ vbene iran ka ru ne avbe nikaro.

²⁰ Ukpo evayan ọgban ọ re Jehoram gha ye vbe ọ rriọba ọ keghi ya ukpo erẹnrẹn vbe ẹkete vbe Jerusalẹm. Ọ ma zẹdẹ da ọmwarhọkpa vbe ọ wu. Iran keghi re ẹre ye ẹvbo e Devid sokpan a ma re ẹre ye idin avbe ọba.