II Krọnikol 20 - Edo Bible (E Baibol Ẹdo) Version 1996

Okuo Ne A Gu Idọm Khọn

¹ Vbe ọ ma ghi kpee gbe, avbe ivbiyokuo e Moab, Amọn kevbe iran ni deba iran ighẹ Meun, keghi mu okuọ gha rrie Juda.

² Emwa ne a gie eso keghi rre do tama e Jehosiafat ne ọba wẹẹ, “Ivbiyokuo ni bun wa ke Idọm vbe obọ nọkpa ọghe Okun Nọwu mu okuọ bu ruẹ gha dee. Iran khọn mu Hazazọn Tama nẹ.” (Eni ọvbehe ne avbe tie Ẹngẹdi ọ re ọ khin.)

³ Udu ke wa e Jehosiafat, ọ keghi na erhunmwu ghe Nọyaẹnmwa wẹ ne ọ giodẹ ma irẹn emwi ne irẹn gha ru. Ọ keghi wẹ ne emwa hia ni rre ẹvbo nii hia wa gha rrie aguẹ.

⁴ Emwa kegha ke dọmwadẹ ẹvbo ni rre Juda yo e Jerusalẹm ne iran ya gha nọ e Nọyaẹnmwa vbene iran gha ru emwi hẹ.

⁵ Iran na, deba ivbi e Jerusalẹm keghi si koko ye ẹghodo nọgbọn ne ọ rre Ọgua Osa. E Jehosiafat ne ọba keghi ya mudia ye odaro iran.

⁶ Ọ keghi ya urhu ne ọ la na erhunmwu wẹẹ, “E Nọyaẹnmwa ne Osanobua avbe erha mwa odede, wẹ ọ re ọ ke ẹrinmwi khaemwisẹ yan avbe okpẹvbo ni rre otọ agbọn hia. Wẹ mwẹ ẹtin, u kevbe kpolo, ọmwa ọkpa i rrọ ne ọ gha sẹtin muan ruẹn ẹmwẹ,

⁷ wẹ ọrọre Osanobua ima. Ẹghẹ ne ivbi Izrẹl ne emwa ruẹn na si la otọe na, u keghi khulo emwa ni te ka rrọọ ladian, u keghi mu otọe na ne ivbi uniẹn Ebraham, ne ẹse ruẹ, ne ọ gha re ọghe iran ẹdẹdẹmwẹdẹ.

⁸ Iran yin emwa na nẹ, iran kevbe bọ Ọgua Osa ya ya ọghọ ne uẹn, vbene iran na rẹn,

⁹ wẹ adeghẹ ẹbe sunu vbe egbe iran, ne ọ ya rri iran oya, ọ re okuọ nọ, ra egboghogbogho ra ukhunmwu, iran sẹtin gha dee do mudia ye odaro Ọgua Osa na, ehe ne a na ga a. Iran sẹtin na erhunmwu ghe ruẹ vbe ẹghẹ ọlọghọmwa, wẹ ghi vbe họn, u ghi vbe miẹn iran fan.

¹⁰ “Banbanna nian, ivbi Amọn, e Moab kevbe Idọm mu okuọ bu ima rre. Ẹghẹ ne avbe erha mwa odede na gha ke Igipt dee, u ma gie iran la avbe otọe nii, rhunmwuda ọnii, avbe erha mwa odede keghi fian odẹ la ẹe ban, iran ma fuẹn iran uan.

¹¹ Ọna ọ re iran ghi ya san ima ẹse nian, iran rre ne iran do khulo ima hin otọe ne uwẹ mu ne ima rre.

¹² We ọrọre Osanobua mwa! Rri iran oya, rhunmwuda, ma i miẹn emwi ọkpa ru vbe ehe ne ivbiyokuo ni bun sẹ nian na, ni gu ima khọn ye, ma ma rẹn emwi ne ima gha ru, sokpan, aro ruẹ ma ghi ghe ne iyobọ.”

¹³ Ivbi e Juda hia fẹẹrẹ, kevbe avbe amwẹ iran kevbe ivbi iran keghi wa mudia ye evba vbe odaro Ọgua Osa.

¹⁴ Orhiọn e Nọyaẹnmwa keghi hin yan e Livai ọkpa vbe uwu ẹbu nii, a tie eni ẹnrẹn Jahaziẹl ne ovbi e Zẹkaraia, ovbi ẹwae Asaf nọ, uniẹn ọghe Matanaia, Jeiẹl kevbe Benaia nọ vbe obọ ọghe Asaf.

¹⁵ E Jahaziẹl keghi kha wẹẹ, “Umogun, ke uwa hia fẹẹrẹ ne ivbi e Juda kevbe Jerusalẹm, e Nọyaẹnmwa wẹ ne uwa ghẹ gie afianma fian uwa ra ne ẹtin fo uwa ne uwa ya gu ivbiyokuo ni bun na gbinna, ohọ Osanobua ọ re ẹmwẹ okuọ na ye ighẹ ẹ i re obọ uwa.

¹⁶ Iran gha la odẹ e Ziz de akhuẹ, wa gu iran gbinna. Wa gha vba iran vbe ufomwẹ iya nii ne a la yo otọe ẹgbo ne ọ rre ọkpẹn Jeruẹl.

¹⁷ Ẹ i re uwa ọ re, ọ ra khọn okuọ na. Ma rhie ihẹ uwa ne uwa mudia, wa gha miẹn vbe Nọyaẹnmwa ra rhie akhọnmiotọ ne uwa. Ivbi e Juda kevbe Jerusalẹm, wa ghẹ si uhe ra ne afianma vbe fian uwa, wa ladian gha rrie okuọ, e Nọyaẹnmwa gha rrọọ yaba uwa!”

¹⁸ Ẹre Jehosiafat ne ọba na vbẹrre mu aro rhu otọ, emwa ni hia keghi vbe vbẹrre, iran na ya uhunmwu rhanmwẹ otọ ne Nọyaẹnmwa.

¹⁹ Ivbi uniẹn avbe Livai ọghe Kohat kevbe Kora, keghi kpaegbe, iran na ya urhu ne ọ la ẹsẹse rho e Nọyaẹnmwa ne Osanobua ọghe Izrẹl.

²⁰ Owiẹ vbirrivbirri vbe ẹdẹ ne ọ lelẹe, emwa nii hia kegha rrie uwu ẹgbo ne ọ rre ọkpẹn Tẹkoa. Iran ghi ra wa ladian gha khian, e Jehosiafat keghi tama iran wẹẹ, “Ivbi e Juda kevbe Jerusalẹm, wa mu ẹtin yan e Nọyaẹnmwa ne Osanobua uwa, wa ghi vbe mudia gbain. Wa ya avbe ẹmwẹ ne akhasẹ ẹre tama uwa yi, ọ gha vbe dinnodẹ ne uwa.”

²¹ Ọ ghi gu avbe emwa nii zẹ iro nẹ, ọba keghi khama avbe ikpemaba wẹ ne iran viọ ẹwu ne iran ya do ugie yọ, ne iran khian ke odaro ne avbe ivbiyokuo, ne iran gha so ihuan na wẹẹ, “Wa rho e Nọyaẹnmwa. Etẹbitẹ ọre Itohan rẹn khin.”

²² Iran ghi suẹn gha so ihuan, ẹ Nọyan ke fian otighi ọkpeudu fi iran ni mu okuọ gie iran egbe.

²³ Ivbiyokuo Amọn kevbe ọghe Moab keghi deyan ọghe Idọm, iran na lọkọ ehia a. Vbe iyeke ọnii iran keghi viọ aro da egbe gha gu egbe gbinna igbinna aranmwẹ oha.

²⁴ Ivbiyokuo e Juda ghi sẹ owa abodẹ ne ọ rre ehe ne avbe eghian iran ye, iran ghi ya ghe ehia wa wulo lele otọe. Ọkpa ne ọ vbe miẹn uhunmwu i rrọ.

²⁵ E Jehosiafat kevbe ivbiyokuo ẹre kegha khian ya fu emwi viọ, obọ iran keghi vba ẹmila ni bun kevbe evbare kevbe ukpọn kevbe emwi ighobioye ọvbehe ni bun. Iran keghi ya ikpẹdẹ eha si emwi ne iran furu nii, sokpan, ehia bun sẹrriọ wẹ, iran ma sẹtin viọ emwi hia.

²⁶ Ọ ghi rre ikpẹdẹ ne ogieha, iran keghi do si koko ye Iya e Beraka, iran keghi rho e Nọyaẹnmwa ye emwi ne ọ ru hia. Ọnii ọ si ẹe ne a na tie ẹre “Iya e Beraka.”

²⁷ E Jehosiafat keghi ke odaro viọ ivbiyokuo ẹre zẹ okpowẹ gha rrie Jerusalẹm, rhunmwuda, e Nọyaẹnmwa khọn mu eghian iran otọ.

²⁸ I ran ghi sẹ ore ẹvbo iran ye akpata kevbe okpe si ọbọbọ gha rrie Ọgua Osa.

²⁹ Uhunmwu ẹvbo hia ni ghi họn vbene Nọyaẹnmwa ya khọn eghian Izrẹl muotọ hẹ, kegha guo zẹzẹzẹ.

³⁰ Ẹre Jehosiafat na gha re ọba vbe ọfumwegbe, Osanobua keghi gie ẹkun sẹ ọ re otọ vbe odẹ hia.

Ufomwẹ Arriọba E Jehosiafat

³¹ Ukpo isẹnyan ọgban ọ re Jehosiafat ye vbe ọ rriọba vbe e Juda ọ keghi vbe ya ukpo isẹnyan ugie vbe ẹkete vbe Jerusalẹm. A kegha tie iye ẹe Azuba, ovbi e Silhi ne okhuo nọ.

³² Ọ keghi ru emwi ne ọ kere vbe odaro e Nọyaẹnmwa zẹ vbene erha ẹe ne Asa ka vbe ru.

³³ Sokpan, ọ ma guọghọ avbe aro ẹbọ kua. Emwa nii ma wa vbe ya ekhọe hia mu egbe ye ugamwẹ e Nọyaẹnmwa ne Osanobua avbe erha iran odede.

³⁴ Emwi ọvbehe hia fẹẹrẹ ne Jehosiafat ghi ru ke omuhẹn ọghe ne ọ ya vbe ẹkete ya sẹ ufomwẹ ọnrẹn, a gbẹnnẹ ọẹn ye Ebe Okha Ọghe Jehu ne ovbi e Hanani ne ọ vbe re eso vbe ebe Okha ọghe avbe Ọba Izrẹl.

³⁵ Vbe ẹghẹ ọkpa e Jehosiafat ne ọba e Juda keghi kpe iku gie Ahazaia ne ọba Izrẹl ne ọ wa ru emwi dan ni bun.

³⁶ Iran keghi kan avbe okọ ni yo okun vbe Eziọngeba ne eghute.

³⁷ Sokpan Eliezẹ ne ovbi Dodavahu ne ovbi ẹvbo ne a tie ẹre Maresia ke yan tama e Jehosiafat wẹẹ, “Rhunmwuda ne u na kpe iku gie Ahazaia na, e Nọyaẹnmwa gha dunmwu okọ ne u kanrẹn ruan.” Avbe okọ ni ke dunmwu an, iran ma gua vbe ẹzẹ.