II Krọnikol 2 - Edo Bible (E Baibol Ẹdo) Version 1996

Imuegbeyotọ Emwi Ne A Ya Bọ Ọgua Osa

¹ E Solomọn ne Ọba na wẹ rẹn gha bọ Ọgua Osa, ehe ne a gha na ru ugamwẹ e Nọyaẹnmwa, kevbe ẹguae ọghe obọ irẹn.

² Ọ keghi viọ ikpia arriaisẹn ekigbesiyenẹ (70,000) yọ ne iran gha la emwi rre, kevbe ikpia arriaisẹn iyenẹ (80,000) ne iran gha gbe okuta. Ọ na viọ arhin arriaeha yan arriaisẹn eha (3,600) ne iran gha gbe aro ghe iwinna nii.

³ E Solomọn keghi gie ne a tama e Hiram ne ọba e Taia wẹẹ, “Vbe gha do ẹki gun mwẹ zẹ vbene u vbe gha do ẹki gie erha mwẹ ighẹ e Devid ne ọba vbe ẹghẹ ne u na khiẹnnẹ igẹdu e sida ne ẹẹn ne ọ ya bọ ẹguae ẹre.

⁴ I wa bọ Ọgua Osa nian ne I ya ya ọghọ ne Nọyaẹnmwa ne Osanobua mwẹ. Ehe ne ọ huanrẹn khian gha nọ, ehe ne avbe emwa mwẹ kevbe imẹ, gha na gha ga ẹe, vbene ima gha na gha giẹn eturari nọwinhin ghe ẹre, ehe ne ima gha na gha ye ebrẹd ne ọ huanrẹn yo imuohan giee vbe ne a i na dobọyi, ehe ne ima gha na gha zọ ese ne a giẹn uan ghe ẹre vbe owiẹ kevbe ota kevbe Ẹdẹ Ikẹtin hia fẹẹrẹ, emwiukpo Uki Ọgbọn, kevbe avbe ẹdẹ ni huanrẹn ne a ya gha ya ọghọ ne Nọyaẹnmwa ne Osanobua mwa. Rẹn ọ re ọ tama ivbi Izrẹl ne iran gha ru ọna khian ẹdẹdẹmwẹdẹ.

⁵ Iro ekhọe mwẹ nọ ne I bọ Ọgua Osa ne ọ kpọlọ rhunmwuda Osanobua mwa kpọlọ sẹẹ ẹbọ hia.

⁶ Vbe ne ẹmwata, ọmwa ne ọ gha sẹtin bọ Ọgua Osa ne Osanobua i rrọọ rhunmwuda, vbene ẹrinmwi kpọlọ sẹ nii, ẹ i gua ẹe. Rhunmwuda ọnii, vbe imẹ ghẹ ghi na sẹtin bọ emwi ne ọ gberra Ọgua Osa ne a na giẹn eturari ghe Osanobua hẹ?

⁷ Banbanna nian, gie ọmwa ne ọ fuẹro emwi ne a gbẹnnẹ, igoru ne a dunmwu, esiliva, oze, kevbe ematọn, gun mwẹ, kevbe ne ọ sẹtin ru ukpọn ne raghoragho, ododo kevbe ne ọ baa. Ọ ghi do deba avbe owinna ni rre Juda kevbe Jerusalẹm ne Devid ne erha mwẹ hannọ ye otọ nẹ.

⁸ I rẹnrẹn wẹ erhan ne a gbẹnnẹ wa gu emwa ruẹn obọ ro ẹsẹse. Rhunmwuda ọnii viọ igẹdu sida, ovbẹkhẹ kevbe umẹ gun mwẹ ke Lebanọn gha dee. I mu egbe ne I gie emwa mwẹ bu emwa ruẹn gha dee.

⁹ Ne iran do ru iyobọ ya ka igẹdu ni bun sẹrriọ ye otọ, rhunmwuda, Ọgua Osa ne I mwẹ vbe ekhọe ne I bọ na, ọ gha kpolo, ọ gha vbe gha mose ẹsẹse.

¹⁰ Zẹ vbe evbare ne emwa ruẹn gha re, I gha viọ etọni ọka arriaisẹn iyisẹn (100,000) guẹ kevbe etọni ọka irhuarhua arriaisẹn iyisẹn (100,000), egalọn ayọn igbe yan iyisẹn (110) kevbe egalọn ofigbọn igbe yan iyisẹn (1,100).”

¹¹ E Hiram ne Ọba keghi gbẹn ebe rhie ewanniẹn gie Solomọn. Ọ keghi gbẹn ọẹn wẹẹ, “Rhunmwuda wẹ, e Nọyaẹnmwa ho ẹmwẹ emwa rẹn, ọ keghi ya a ma ọba iran.

¹² Urhomwẹ nọ ne Nọyaẹnmwa ne Osanobua ọghe Izrẹl, Ayi ne ọ yi ẹrinmwi kevbe agbọn. Ọ na rhie ọmọ ne ọ wan kevbe ne irẹnmwi gba na ne Devid ne Ọba, ọmọ nii ọ re ọ ghi mwamwa ẹẹn nian ne ọ bọ Ọgua Osa ne Nọyaẹnmwa kevbe ẹguae ne egbe ẹre.

¹³ I gie Huram bu ruẹ dee, ọka owinna ne ọ wan kevbe ne ọ fu ẹro ẹsẹse.

¹⁴ Ovbi uniẹn e Dan ọ re iye ẹe gha khin, erha ẹe kegha re ovbi ẹvbo na a tie ẹre Taia. Ọ sẹtin ya igoru, esiliva, oze, ematọn, okuta kevbe erhan ka emwi. Ọ sẹtin ya ẹmu ne raghoragho, ododo kevbe ọghe ukpọn ne ọ baa se emwi, kevbe eto ovbiohuẹ. Ọ sẹtin sa ama emwikemwi, ama emwikemwi ne a gie ma rẹn, te ọ ru ẹe. Gie ẹe deba avbe owinna ruẹn gha winna kevbe deba avbe owinna ni winna ne erha a ighẹ Devid ne ọba.

¹⁵ Rhunmwuda ọnii nian, viọ nene avbe ọka, ọka irhuarhua, ayọn, kevbe ofigbọn oliv ne u kha re rre.

¹⁶ Ma gha giagia igẹdu sida ni rre uhunmwu oke Lebanọn zẹ vbe ne u ho, a ghi sele ehia kugbe, ma ghi gua ẹe la okun gha die Jopa. Wẹ sẹtin ke evba viọ iran gha rrie Jerusalẹm.”

Ubọmwẹ Ọgua Osa Suẹnrẹn

¹⁷ E Solomọn ne ọba keghi ka avbe orhunmwuyẹn ni rre otọ Izrẹl hia, ne ọ wa vbe khọ egbe ikẹvbo ne Devid ne erha ẹe ka vbe ru. Erhunmwuyẹn ni yin ẹvbo nii kegha re arriaeha yan arriaisẹn iwera yan ikiọkhọe (153,600).

¹⁸ Ọ keghi zẹ iran arriaisẹn ekigbesiyenẹ (70,000) ne iran gha la emwi rre, arriaisẹn iyenẹ (80,000) wẹ ne iran gha gia okuta vbe uhunmwu oke ọ keghi viọ arhin arriaeha yan arriaisẹn eha (3,600) ne iran gha gbearoghe iwinna nii ne iran miẹn wẹ a winnaẹn.