II Krọnikol 19 - Edo Bible (E Baibol Ẹdo) Version 1996

Akhasẹ Ọkpa Gu E Jehosiafat Gui

¹ Jehosiafat ne ọba e Juda keghi werriegbe gha die ẹguae ẹre vbe egbe hẹnnẹdẹn.

² Akhasẹ ọkpa, e Jehu ne ovbi e Hanani keghi ya vba ọba, ọ tama rẹn wẹẹ, “Wẹ yayi we emwi ne ọ gbae nọ ne a gha yi iran ne emwa dan obọ ra, ra ne a yegbe ba iran ni khuiwu e Nọyaẹnmwa? Emwi ne u ru si ohu e Nọyaẹnmwa yan ruẹn uhunmwu nẹ.

³ Sokpan ọ rhe yerriọ, emwi eso rrọ ne u na vbe maa. U viọ amazẹ Asiẹrra ne ẹbọ ne okhuo kua, u keghi hia ne u gha ru vbene Osanobua ho.”

Emwi Ne Jehosiafat Dọlọyi

⁴ A gha rhe miẹn ighẹ Jerusalẹm ọre Jehosiafat gha ye, te ọ wa gha khian sẹ ehe ne emwa nii ye kugba kẹghẹrẹ, ke Biẹsiẹba ne odẹ ekẹn ya sẹ ehe ne avbe ẹvbo oke sẹe vbe Ifreim ne odẹ okuọ ne ọ miẹn ehe na tie emwa nii werriegbe bu e Nọyaẹnmwa ne Osanobua avbe erha iran odede gha dee.

⁵ Ọ keghi viọ iran ni bu ohiẹn lele ẹvbo ne a gba odin gaa vbe Juda hia,

⁶ ọ tama iran wẹẹ: “Wa gha mwẹ ẹwaẹn vbe uwa a gha hu ohiẹn, ẹre asẹ ọmwa ne agbọn ọ re uwa ya winna, sokpan asẹ ọghe Nọyaẹnmwa nọ, ọ vbe rrọ yaba uwa vbe uwa a bu ohiẹn.

⁷ Wa gha mu ohan e Nọyaẹnmwa ne uwa vbe gha ru emwi hẹnnẹhẹnnẹ, rhunmwuda, e Nọyaẹnmwa Osanobua mwa i zẹdẹ ho ne ọ họn ẹmwẹ ebikhuikhui, ra ohiẹn ikpanro ra igho odieke.”

⁸ E Jehosiafat keghi viọ avbe ohẹn kevbe Livai kevbe emwa ni hin usi vbe ẹvbo eso ya ru ni bu ohiẹn vbe Jerusalẹm, ne iran gha guan ye emwi ne ọ dekan a rra uhi e Nọyaẹnmwa ra imuan ẹmwẹ vbe ẹkpo emwa, ore ẹvbo nii.

⁹ Ọ keghi tama iran wẹẹ, “Wa ghi winna iwinna uwa vbe uwu amu ohan e Nọyaẹnmwa, wa ghi gha ya ekhọe ẹmwata họn ẹmwẹ ne ẹẹn vbe emwi hia ne uwa a rhirhi ru.

¹⁰ Ẹghẹikẹghẹ ne emwa ẹvbo na ne ihua a ya do gui ma uwa vbe ekpa izigha ọyẹvbu, ra a rra uhi, ra iyi ne ọ rhirhi a gha khin, wa ghi hẹko ma iran ẹre vbene iran gha ru hẹ vbe iran a gha gui ẹzọ nii, ne iran ghẹ ya rra uhi ọghe a rukhọ ghe Nọyaẹnmwa. Deghẹ ẹ i re te uwa ru vberriọ, wẹ kevbe emwa ẹvbo ruẹ ne ihua gha họn ẹmwẹ obọ ne ọ tọn ọghe ohu e Nọyaẹnmwa vbe egbe. Sokpan, a dẹghe wa winna iwinna uwa, wa i ra rri abe.

¹¹ Amaraia ne Ogie Ohẹn ẹre ọ ra gha ta ọfo ye ẹmwẹ ne ọ kan ẹmwẹ ugamwẹ hia fẹẹrẹ, erriọ vbe nọ, e Zebedaia ne ovbi Ismaẹl ne ọ khaemwisẹ yan e Juda ọ re ọ ra gha ta ọfo ye ẹmwẹ emwi ni kan ẹzọ kẹkan hia. Iwinna avbe Livai nọ ne iran miẹn wẹ a ru emwi hia zẹ vbene a bu ohiẹn ọnrẹn vbe iko. Wa din, ne uwa vbe gha ru avbe ẹmwẹ ne I ta ma uwa na, te Nọyaẹnmwa gha yaba ọmwa ne ọ rhirhi rri asẹ.”