II Krọnikol 18 - Edo Bible (E Baibol Ẹdo) Version 1996

Mikaia Ne Akhasẹ Yan Ma Ehab

¹ E Jehosiafat ne ọba e Juda ghi fe nẹ, ọ na vbe hin usi ẹsẹse ọ na do ru emwamwa irhiọha ọkpa ne ọmwa ne ọ ke ẹgbẹe irẹn rre, ke ne ọ ke ọghe Ehab ne ọba Izrẹl rre gha na rọnmwẹ egbe.

² Ukpo nibun eso ghi gberra nẹ, e Jehosiafat kegha rrie Sameria ne ọ ya tuẹ Ehab. Ehab ke ghi gbele ẹmila ke ohuan nibun ya nu ọghọ ye Jehosiafat ke emwa ni lele ẹe rre egbe. Ọ keghi gha rherhe Jehosiafat wẹ ne ọ deba irẹn ne iran ya khọn e Ramọt ne ọ rre Giliad. Ọ ke nọ rẹn wẹẹ,

³ “U gha lele mwẹ ya khọn e Ramọt ra?” E Jehosiafat ke wanniẹn wẹẹ, “U gha muegbe, mẹ vbe muegbe erriọ ivbiyokuo mwẹ vbe ye. Ma gha yaba ruẹ.”

⁴ Rẹn keghi rhie te ẹe wẹẹ, “Sokpan gia ka nọ e Nọyaẹnmwa nẹ.”

⁵ Ẹre Ehab na tie avbe akhasẹ rre, iran kegha re omwa uri eva, (400) ọ ke nọ iran wẹẹ, “Ne I ya khọn Ramọt ra ne I ghẹ yo?” Iran hia ke wanniẹn wẹẹ, “Ya khọn rẹn, Osanobua gha rhie akhọnmiotọ nuẹn.”

⁶ Sokpan, e Jehosiafat ke wanniẹn wẹẹ, “Akhasẹ ọvbehe ighi rrọ ne ima gha wẹ ne ọ nọ e Nọyaẹnmwa ra?”

⁷ Ehab ke wanniẹn wẹẹ, “Ọkpa ye rrọ, rẹn ighẹ Mikaia ne ovbie Imla. Sokpan, I i ho ẹmwẹ ọnrẹn, rhunmwuda, ẹi ta ẹmwẹ akhasẹ nọ maa ma mwẹ, ẹmwẹ dan ọre ọ ta vbe ẹghẹ hia.” E Jehosiafat ke kha wẹẹ, “Ghẹ kha vberriọ.”

⁸ “Ehab ke tie ọkpa vbe uwu odibo ẹguae, ọ na wẹ ne ọ ya tie Mikaia rre ẹgiẹgiẹ.”

⁹ Avbe ọba eveva na keghi hẹ ẹwu ọba iran ye egbe, iran ke tota ye ẹkete iran vbe ehe ne a na wiẹn ọka ne ọ rre onurho e Sameria, avbe akhasẹ kegha guan ẹmwẹ akhasẹ vbe odaro iran.

¹⁰ Ọkpa vbe uwu iran, rẹn ighẹ Zedekaia ne ovbi Kienaana ke ghi dunmwu igho ematọn, ọ tama Ehab wẹẹ, “Enian e Nọyaẹnmwa khare, ‘Enena ọ re u ra ya gu ivbi e Siria gbinna, u ghi khọn iran muotọ fẹẹrẹ.’ ”

¹¹ Ẹmwẹ ọkpa nii ọ re avbe akhasẹ nekpa hia vbe ta. Iran wẹẹ, “Dekun e Ramọt ighẹ u gha khọnmiotọ. E Nọyan gha guẹ khọnmiotọ.”

¹² Vbe uwu ẹghẹ na, odibo ne ọ ya tie Mikaia rre keghi tama rẹn wẹẹ, “Avbe akhasẹ nekpa hia wa tama ọba ighẹ ọ gha dunna ne ẹẹn, wẹ ghi vbe kha vberriọ.”

¹³ Sokpan, Mikaia ke kha wẹẹ, “Vbe eni e Nọyaẹnmwa ne ọ rrọọ, emwi ne Osanobua mwẹ tama mwẹ ọre I ra ta!”

¹⁴ Ọ ghi sẹ ehe ne ọba ye, Ọba nọ rẹn wẹẹ, “Mikaia ne imẹ vbe Jehosiafat ne ọba gba ya khọn Ramọt ra ne a ghẹ yo?” Mikaia ke wanniẹn wẹẹ, “Dekun ẹnrẹn, u gha khọn miotọ. E Nọyaẹnmwa gha guẹ khọnmiotọ.”

¹⁵ Sokpan, Ehab wanniẹn tama rẹn wẹẹ, “U gha ya eni e Nọyaẹnmwa gun mwẹ guan, gha ta ẹmwata! Inugba I gha tae ma ruẹn yi?”

¹⁶ Mikaia ke kha wẹẹ, “I bẹghe ivbi Izrẹl vbe iran tagha gba uhunmwu oke zẹ vbe ohuan nẹi mwẹ ne ọ su ẹe. Ẹre Nọyan na kha wẹẹ, Emwa na i mwẹ ọkaolotu, gie iran hẹko gha rrie!”

¹⁷ Ehab keghi tama Jehosiafat wẹẹ, “I ma tama ruẹn ighẹ ẹ i ta ẹmwẹ akhasẹ ne ọ maa rhọkpa ma mwẹ, ọkhọ ọkhọ ọ re nọ vbe ẹghẹ hia!”

¹⁸ E Mikaia keghi rhie te ẹe wẹẹ, Banbanna nian, danmwehọ vbene Nọyaẹnmwa kha hẹ: “I keghi bẹghe vbe Nọyaẹnmwa miẹndia vbe ẹkete ẹre vbe ẹrinmwi, avbe odibo ẹre hia ke tẹn dia ke ẹe.

¹⁹ E Nọyan keghi nọọn wẹẹ, ‘De ọmwa ne ọ gha rẹrẹ Ehab ne ọ miẹn ehe na ya khian rhie vbe Ramọt?’ Eso vbe uwu avbe odibo ni keghi ta ọna, eso keghi ta ughaẹn,

²⁰ ẹre odibo ọkpa na ghi bu e Nọyaẹnmwa gha khian, ọ tama rẹn wẹẹ, ‘I gha ya rẹrọe.’ E Nọyan nọ rẹn wẹẹ, ‘Vbua ra ya ru ẹe hẹ?’

²¹ Orhiọn nii wanniẹn wẹẹ, ‘I gha ya ru ẹe ne avbe akhasẹ Ehab hia gha ta ohoghe.’ E Nọyan wanniẹn wẹẹ, ‘Gha khian ya rẹrọe, u gha sẹtin!’ ”

²² Ẹre Mikaia ghi na fian ẹre ifi wẹẹ, “Emwi ne ọ sunu ọ re ọ na khin. E Nọyan ru ẹe nẹ ne avbe akhasẹ ruẹ na hia gha ta ohoghe ma ruẹn, sokpan, rẹn tobọ ẹre tae nẹ wẹ te u ra ya khian rhie!”

²³ Ẹre Zedekaia ne akhasẹ na khian bu Mikaia, ọ na so ubi ye ọre aro, ọ nọ rẹn wẹẹ, “De ẹghẹ ne orhiọn e Nọyaẹnmwa ghi vbe ya kpao sẹ imẹ rae do gha gu uwẹ yi?”

²⁴ E Mikaia ke wanniẹn, wẹẹ, “U ghẹ ghi la uwu ughugha ne ọ rre iyekowa ya lẹre nẹ u gha rẹn.”

²⁵ Ẹre Ehab ne ọba na tama ọkpa, vbe uwu avbe odibo ẹre wẹẹ, “Mu e Mikaia ne u mu ẹẹn gie Amọn ne ọre enọkhaemwisẹ vbe ore ẹvbo, ke Joas ne ovbi ọba.

²⁶ Tama iran ne iran mu ẹẹn fi uwu ẹwẹdọ ne a gha ya ebrẹd ke amẹ kokẹe I te do rre hẹnnẹdẹn.”

²⁷ E Mikaia ke kha wẹẹ, “U gha miẹn uhunmwu ya rre, u ghi rẹn wẹ, e Nọyaẹnmwa ma gunmwẹ guan.” Ọ ke rhie te ẹe wẹẹ, “Wa họn vbene I kha hẹ.”

Uwu Ehab

²⁸ Ẹre Ehab ne ọba Izrẹl, ke Jehosiafat ne ọba e Juda na mu okuọ la ore ẹvbo e Ramọt ne Giliad.

²⁹ Ehab keghi tama Jehosiafat wẹẹ, “Vbe ne a ra na suẹn igbinna na, mẹ gha mu egbe ọmwa kẹkan sokpan, wẹ ghi hẹ ẹwu ọba ruẹ yọ.” Ẹre ọba Izrẹl na mu egbe ọmwa kẹkan la okuọ.

³⁰ Ọba e Siria keghi tama iran ni kha yan avbe ikẹkẹ okuọ wẹ ne iran ghẹ gu ọmwa ọvbehe rhọkpa gbinna gberra ọba Izrẹl.

³¹ Rhunmwudọnii, ugbẹn vbe iran ghi bẹghe Jehosiafat ne ọba, iran hia keghi te gha ro ighẹ ọba Izrẹl nọ, iran ke bu ẹre ne iran ya guẹe gbinna. Sokpan, e Jehosiafat keghi datu, e Nọyan Osanobua keghi miẹn rẹn fan, ọ na mu igbinna nii aro hin ehe ne ọ ye rre.

³² Iran ni kha yan avbe ikẹkẹ okuọ keghi miẹn wẹ rẹn i re ọba Izrẹl, iran na dobọ yi vbe ukhumwẹ ne iran te khu ẹe khian.

³³ Sokpan, ovbiyokuo e Siria ọkpa keghi ba fi ifẹnmwẹ fua, ọ na ya la ehe ne a na de ẹwu ematọn okuọ kugbe sa Ehab. Ọ ke datu tama ọmwa ne ọ gua ikẹkẹ okuọ ẹre khian wẹẹ, “Emwi vba mwẹ. Fiegbe werriẹ ne u la hin uwu igbinna rre.”

³⁴ Vbe ne okuọ wa ya yọn khian nii, Ehab ke sikuẹn ye ikẹkẹ okuọ ẹre, ọ na mu aro da ehe ne ivbi e Siria ye. Rẹn keghi wu vbe ẹghẹ ne owẹn ya defua.