II Krọnikol 17 - Edo Bible (E Baibol Ẹdo) Version 1996

E Jehosiafat Rriọba

¹ E Jehosiafat keghi rriọba lele erha ẹe, ọ ke kakabọ sikhua mu aro da ivbi Izrẹl.

² Ọ keghi ya viọ ivbiyokuo ye avbe ẹvbo ne a gbe odin gaa vbe Juda, vbe otọ e igue ni lẹga e Juda ke avbe ẹvbo ne a Asa khọn munọ vbe otọe Ifreim.

³ E Nọyan keghi fiangbe Jehosiafat rhunmwuda ọ kegha yin egbe uyinmwẹ ne erha ẹe kegha yin vbe ẹghẹ okaro, ọ ma vbe gho e Bal.

⁴ Ọ ke gha ga Osanobua erha ẹe ọ kegha hẹnmwẹ ne Osanobua ọ ma vbe gha ru vbene avbe ọba ọghe Izrẹl gha ru.

⁵ Osanobua ke wa gie obọ e Jehosiafat gba ehehia vbe otọe arriọba e Juda, emwa hia kegha viọ emwi gie ẹe, sẹrriọ, ne ọ na gha re ọmwa ne ọ fe ke ne a ya ọghọ na ẹsẹse.

⁶ Rẹn ke wa gha ya oyaya ga e Nọyaẹnmwa, ọ na dunmwu ehe ne avbe aro ẹbọ enigẹbọ kua, ke vbe amazẹ Asiẹrra ne ẹbọ nokhuo vbe Juda.

⁷ Ọ ghi rre ukpo nogieha ne ọ rriọba, ọ keghi gie avbe emwa na ne iran ya ma emwa emwi vbe Juda: Iran na ọre Benhail, Obedaia, Zẹkaraia, Netanẹl kevbe, Mikaia.

⁸ Avbe Livai ihinrin ke lele iran, deba avbe ohẹn eva. Nene avbe Livai kegha re Siemaia, e Nẹtanaia, e Zebadaia, Asahẹl, e Siemiramot, e Jehonatan, Adonaija, e Tobaija ke Tabodonaija, nene avbe ohẹn kegha re Elisiama ke Jehoram.

⁹ Iran ke mu ebe uhi e Nọyaẹnmwa, iran na ya owẹ kpe akpata lele dọmwadẹ ẹvbo ni rre Juda, iran na gha ma avbe emwa ni emwi.

Ukpọlọmwẹ E Jehosiafat

¹⁰ E Nọyaẹnmwa keghi ru ẹe wẹ a ma ghi miẹn ne ohan gie ẹe mu okuọ gie Jehosiafat ne ọba vbe uwu avbe arriọba ni lẹga ẹre.

¹¹ Eso vbe uwu ivbi e Filistin keghi viọ esiliva ke emwi ihaoko nibun ọvbehe gie Jehosiafat, ivbi Arab eso ke viọ ohuan iyisẹn ihinrọn yan arriaisẹn hinrọn (7,700) ke ẹwe iyisẹn ihinrọn yan arriaisẹn ihinrọn (7,700) gie ẹe.

¹² Ẹre ẹtin e Jehosiafat na gha kpọlọ yọ, ọ keghi bọlọ ehe ne a gbe odin ga ke avbe okpẹvbo lele otọe Izrẹl hia,

¹³ avbe enena ọ re irn gha viọ avbe emwi ọrhẹnrhẹn ne emwa viọ rre yi. Ọ keghi viọ emwa ni re ọkaiwinna ne a rẹnrẹn ẹsẹse lele Jerusalẹm.

¹⁴ Zẹ vbene ẹwae edọmwadẹ ọghọe khare: Adna ọ re ọ mu ọkaolotu yan ivbiyokuo ni ke Juda rre, rẹn ke gha mwẹ arhin arriaisẹn iyisẹn eha (300,000) ne ọ gbearoghe.

¹⁵ Ne ọ ghi vbe zẹ ke ẹe kegha re Jehohanan, rẹn ke vbe gha mwẹ ivbiyokuo arriaisẹn iyenẹ yan uri (280,000).

¹⁶ Ne ukpogieha kegha re Amasia ne ovbi e Zikri, rẹn kevbe gha mwẹ ivbiyokuo arriaisẹn uri (200,000). (Te Amasia wa yegbe fiohan wẹ rẹn gha ga e Nọyaẹnmwa.)

¹⁷ Ọkaolotu iran ni ke ẹwae Bẹnjamin rre kegha re Eliada, ovbiyokuo ne ọ gbe rhie okun, ọ kegha kha yan ivbiyokuo arriaisẹn uri ne a viọ asa ne a ya gbinna ke uhanbọ na.

¹⁸ Ọmwa ne ọ zẹ diake ẹe kegha re Jehozabad, ne a vbe viọ arhin arriaisẹn iyihinrin na (180,000) iran ke wa gha re emwa ne a viọ emwi gbinna esiesi na.

¹⁹ Iran na ke gha ga ọba vbe Jerusalẹm, deba ena hia, ọ ke vbe viọ avbe ivbiyokuo ọvbehe lele avbe ẹvbo ne a gbe odin ga vbe Juda.