II Krọnikol 15 - Edo Bible (E Baibol Ẹdo) Version 1996

Emwi Ne Asa Dọlọyi

¹ Orhiọn e Nọyaẹnmwa keghi tuorre yan Azaraia ne ovbi Odẹd.

² Ọ na bu Asa ne ọba gha khian. Ọ keghi datie ẹre wẹẹ, “Asa ne ọba, kevbe avbe uwa hia ni rre Juda kevbe Bẹnjamin, wa danmwehọ mwẹ. Ẹghẹ hia ne uwa mudia ke Nọyaẹnmwa la, e Nọyaẹnmwa gha vbe mudia ke uwa, a dẹghe wa gualọ ẹe, ọ gha ya egbe ne uwa miẹn, sokpan, dẹghe wa werriegbe, rẹn gha vbe he uwa ye otọ.

³ Izrẹl wa gha rrọọ vbe ẹghẹ ne ọ taẹn, vbe ne iran i na mwẹ Osanobua ẹmwata, vbe ne iran i na mwẹ avbe ohẹn ni gha ma iran emwi, kevbe ne iran i na mwẹ uhi.

⁴ Sokpan, ọlọghọmwa ghi rre, iran keghi lẹ bu e Nọyaẹnmwa ne Osanobua Izrẹl gha dee. Iran gualọ ẹe, iran keghi miẹn ọẹn.

⁵ Vbe ẹghẹ nii, ọmwa ne ọ sẹtin rre ne ọ vbe gha rrie vbe egbe hẹnnẹdẹn i rrọọ rhunmwuda, ọlọghọmwa kevbe otighi kegha rre otọe hia.

⁶ Ẹvbo ọkpa kegha zẹ ẹvbo nọkpa owẹ, ore ọkpa kegha zẹ ore nọkpa owẹ rhunmwuda, Osanobua keghi si ọlọghọmwa kevbe omẹ ye iran egbe.

⁷ Sokpan wẹ wegbe ne u ghẹ gie egbe wọ ruẹ. U gha rriere iwinna ne u winnaẹn.”

⁸ Asa ghi họn ẹmwẹ akhasẹ ne Azaraia ne ovbi Odẹd tae, orhiọn rẹn keghi guakpao. Ọ keghi viọ avbe amazẹ ni rre otọ e Juda kevbe Bẹnjamin hia kua. Avbe amazẹ nii rre ẹvbo hia ne ọ he khọn munọ vbe ẹvbo uhunmwu oke ọghe Ifreim. Ọ keghi vbe dọlọ Ogiukpo e Nọyaẹnmwa ne ọ rre ẹghodo Ọgua Osa yi.

⁹ Emwa ni bun keghi ke Ifreim rre, Manasẹ kevbe Simiọn, iran keghi do yegbe ba Asa, iran kegha rre otọ arriọba ẹre rhunmwuda, iran miẹn ọẹn wẹ e Nọyaẹnmwa yaba ẹre. Asa keghi gie ne a tie iran hia, emwa e Juda kevbe Bẹnjamin.

¹⁰ Iran keghi do si egbe koko vbe Jerusalẹm, vbe uki ne ogieha vbe ukpo ekesugie ne Asa kegha rre ẹkete.

¹¹ Vbe ẹdẹ ne ẹdẹrriọ, iran keghi viọ vbe emwi ne iran fu hẹ gha dee do ya zọ ese ghe Nọyaẹnmwa, ena kegha re ẹmila iyisẹn ihinrọn (700) kevbe ohuan arriaisẹn ihinrọn (7,000).

¹² Iran keghi yan ile wẹ iran miẹnkue yọ ne iran gha ga e Nọyaẹnmwa ne Osanobua avbe erha iran odede, vbe ekhọe iran hia kevbe orhiọn iran hia.

¹³ Ọmwaikọmwa ne ọ ma ga ẹe, ọdiọn nọ ra ọvbokhan nọ, okpia nọ ra okhuo nọ, a gha gbe ẹe rua.

¹⁴ Iran keghi datu ya eni e Nọyaẹnmwa vẹn ihẹn wẹ iran gha mu eyan ni sẹ, iran keghi wee iran na kpe okpe.

¹⁵ Ọyẹnmwẹ kegha sẹ ivbi e Juda hia rhunmwuda ekhọe iran hia iran ya yan ile na. Ugamwẹ e Nọyaẹnmwa kegha rhiẹnrhiẹn iran, rẹn kevbe rhan obọ miẹn iran, ọ na rhie ọfumwegbe ne iran vbe odẹ hia.

¹⁶ Asa ne ọba keghi rhie iye irẹn ighẹ Maaka hin ukpo iye ọba rre rhunmwuda, ọ keghi ma amazẹ osọnnọ ọghe ẹbọ ne okhuo ne a tie ẹre Asiẹrra. Asa keghi suẹ amazẹ nii sẹ otọ, ọ na giagia rua, ọ na ya giẹn ọnrẹn vbe Iya Kidrọn.

¹⁷ A gha rhe miẹn wẹ Asa ma wa guọghọ aro ẹbọ iran nigẹbọ hia fo vbe otọe nii, te irẹn wa ya ekhọe ẹmwata mudia ke Nọyaẹnmwa vbe ẹdẹ agbọn rẹn hia.

¹⁸ Ọ keghi viọ avbe emwi ne Abija ne erha ẹe ya fi ohan ne Nọyaẹnmwa hia ye uwu Ọgua Osa kevbe avbe emwi igoru kevbe esiliva ne irẹn tobọ ẹre ya fi ohan ne Nọyaẹnmwa.

¹⁹ Okuo ma ghi gha rrọ rhinrin ọ te do sẹ ukpo ne ogisẹn yan ọgban ne ọ he ya vbe ẹkete.