II Krọnikol 14 - Edo Bible (E Baibol Ẹdo) Version 1996

Asa Ne Ọba Khọn Emwa Sudan

¹ Abija ne Ọba keghi wu, a na re ẹre ye idin avbe ọba vbe Ẹvbo e Devid. Asa ne ovbi ẹre keghi rriọba lele ẹe, vbe ẹghẹ ne Asa na gha rre ẹkete, ọfumwegbe kegha rre ẹvbo nii la ukpo igbe.

² Asa keghi ru emwi ne ọ yẹ e Nọyaẹnmwa ne Osanobua ẹre, vbe ekpa ne ọ na gha yin uyinmwẹ nọgbae kevbe ne ọ maa.

³ Ọ keghi suẹ iran kua ighẹ avbe Ogiukpo ẹbọ ẹrrẹe kevbe avbe ehe ne iran nigẹbọ na ga, ọ na dunmwu avbe orrẹ ne a na ru ẹbo sẹ otọ, avbe amazẹ ne a ya gho Asiẹrra ne ẹbọ ne okhuo, ọ keghi dunmwu ehia a.

⁴ Ọ keghi yi ẹre iyi ne emwa e Juda ne iran gha ru emwi ne ọ yẹ e Nọyaẹnmwa ne Osanobua ọghe erha iran odede, ne iran vbe gha ya emwi ne ọ ma iran re kevbe ne ọ yi ẹre iyi ne iran ru emwi.

⁵ Rhunmwuda ne ọ na wabọ avbe aro ẹbọ hiaa, kevbe aka ne a na giẹn eturari vbe otọ e Juda hia, ọfumwegbe kegha rre otọe nii vbe ẹghẹ ne ọ ya ẹe vbe ẹkete.

⁶ Vbe ẹghẹ ọre, ọ keghi gba odin gaa avbe ẹvbo nekhua ni rre Juda. A ma ghi vbe họn ẹmwẹ okuọ la ukpo ni bun rhunmwuda, e Nọyaẹnmwa keghi rhie ọfumwegbe ne ẹẹn.

⁷ Rẹn ke tama ivbi e Juda wẹẹ, “Wa gbe odin ga avbe ẹvbo na, vbe ne a gha na gbe ekẹn ga ẹre, a gha bọ owa ọkhẹ yọ, a gha yi ẹkhu ne ọ gia khui a ghi gbe isanhẹn yọ. Rhunmwuda ne ima na ru iho e Nọyaẹnmwa ne Osanobua mwa, ọ re ima na gba otọe na hia, ọ tan ifuẹn gue ima, ọ keghi gie ẹkun ima sẹ otọ vbe odẹ hia.” Rhunmwuda ọnii iran keghi bọlọe, agbọn na gha maa iran.

⁸ Asa ne ọba keghi mwẹ ivbiyokuo ne ivbi e Juda arriaisẹn iyisẹn eha (300,000) ne a viọ asoro kevbe asa ne a ya gbinna na, arhin arriaisẹn iyenẹ yan uri (280,000) vbe ivbi e Bẹnjamin ne a viọ asa kevbe uhanbọ na. Iran na hia kegha re emwa ni din kevbe ne a vbe ma ẹre emwi ẹsẹse.

⁹ Ovbi e Sudan ọkpa ne a tiẹ ẹre Zẹra keghi viọ ivbiyokuo ẹbo ọkpa (1,000,000) mu okuọ gha die Juda, ikẹkẹ okuọ iyisẹn eha (300) kevbe rrọọ, ọ keghi khọn sẹ Maresia.

¹⁰ Asa keghi ladian ne ọ ya gu ẹe gbinna, iran eveva keghi ghae ye okuọ vbe Iya Zẹfata ne ọ rre ọkpẹn Maresia.

¹¹ Asa keghi na erhunmwu ghe Nọyaẹnmwa ne Osanobua ẹre wẹẹ, “U gha sẹtin rhie iyobọ ne ivbiyokuo ne ọ ma wegbe zẹ vbe ne u gha vbe sẹtin rhie iyobọ ne ne ọ wegbe. Ye ima obọ nian Nọyaẹnmwa rhunmwuda, wẹ ọre ima mu ẹtin yan, eni ruẹn ọ re ima ya ladian ne a do gu ivbiyokuo ọrhẹnrhẹn na gbinna. E Nọyaẹnmwa, wẹ ọrọre Osanobua mwa, ọmwa ne ọ gha kha ighẹ obọ irẹn gha ke ukhunmwu ne uwẹ ẹ i rrọ.”

¹² Obọ e Nọyaẹnmwa keghi ke ukhunmwu ne ivbiyokuo e Sudan vbe Asa kevbe iyokuo e Juda gu iran gbinna. Iran keghi lẹ.

¹³ Ẹre Asa kevbe ivbiyokuo ẹre na ya khulo iran ya sẹ e Gera. Obọ keghi da ivbi e Sudan sẹrriọ wẹ ivbiyokuo ma ghi sẹtin si egbe koko ne iran gbinna. E Nọyaẹnmwa kevbe ivbiyokuo ẹre keghi siẹnrhu iran obọ ivbiyokuo keghi vba emwi fu viọ ẹsẹse.

¹⁴ Iran keghi sẹtin dunmwu ẹvbo eso ua vbe odẹ ne ọ laghe Gera, rhunmwuda, ohan e Nọyaẹnmwa mu emwa ni rre evba. Ivbiyokuo keghi khọn la avbe ẹvbo ni hia, iran na fu emwi ni bun ẹsẹse viọ.

¹⁵ Iran keghi vbe dekun agọ avbe ọsuohuan eso, iran na munọ ohuan ni bun ẹsẹse kevbe ekẹtẹkẹtẹ. Iran keghi werriegbe gha die Jerusalẹm.