II Krọnikol 13 - Edo Bible (E Baibol Ẹdo) Version 1996

Okuo Ne Abija Gu E Jeroboam Khọn

¹ Ọ ghi rre ukpo evairrọvbugie ne Jeroboam rriọba vbe Izrẹl, Abija keghi rriọba e Juda.

² Ọ keghi ya ukpo eva vbe ẹkete vbe Jerusalẹm. A keghi tie iye ẹe Mikaia ne ovbi Uriẹl ne ovbi ẹvbo ne a tie ẹre Gibia. Okuo keghi sa ne Abija kevbe Jeroboam.

³ Abija keghi viọ arhin arriaisẹn arria eva (400,000) ya ru ivbiyokuo, e Jeroboam keghi viọ arhin arriaisẹn arriaenẹ (800,000) ya ru ivbiyokuo mu aro da ẹre.

⁴ Avbe ivbiyokuo na keghi ya vba egbe vbe Ifreim ne ẹvbo oke. Abija ne ọba kegha rrie uhunmwu oke Zemareim, ọ na go tie Jeroboam kevbe ivbi Izrẹl wẹẹ, “Wa danmwehọ mwẹ.

⁵ Wa ma rẹn wẹ ile etẹbitẹ ọ re Nọyaẹnmwa gu e Devid ta wẹ rẹn kevbe ivbi ẹre ọ re ọ gha rriọba yan Izrẹl ẹdẹdẹmwẹdẹ.

⁶ E Jeroboam ne ovbi e Nabat keghi sọtẹ e Solomọn ne ọba ẹre.

⁷ Vbe iyeke ọnii, ọ keghi si avbe emwa ne agbọn ma gie ẹe rre koko, iran na mu emwi ne iran ho yan e Rehoboam ne ovbi ọvbokhan ne ọ ma rẹn ne a ye, a ma wẹ te ọ gha sẹtin rrọ iran.

⁸ Banbanna nian, wa wẹ wa ra gu asẹ ọghe ọba ne Nọyaẹnmwa mu ne ivbi e Devid khọn. Ivbiyokuo uwa bun ẹsẹse, avbe ẹkhuia ẹmila igoru ne Jeroboam ru mu ne uwa wẹ enii ọ re Osanobua uwa.

⁹ Wa khulo avbe ohẹn e Nọyaẹnmwa ni re ivbi Errọn ladian, wa keghi vbe khulo avbe Livai kua. U keghi viọ avbe ohẹn ọvbehe, ne u zẹlẹe zẹ vbene ẹvbo nekpa vbe zẹlẹ ọghe iran ye ihẹ iran. Ọmwaikọmwa ne ọ ghi miẹn ẹkhuia ẹmila ọkpa mu rre nẹ, ra ohuan ihinrọn, a sẹtin yae ma ohẹn nene emwi ne uwa tie ẹre Osanobua uwa.

¹⁰ “Sokpan, te ima ye ga e Nọyaẹnmwa ne Osanobua ima, ma ma he hee ẹe ye otọ. Avbe ohẹn ni re ivbi uniẹn Errọn winna iwinna ni kan iran, avbe Livai ghi gha yi iran obọ.

¹¹ Ota vbe owiẹ hia ọ re iran ya giẹn eturari ne ẹẹn, deba avbe aranmwẹ ne a ya zọ ese ne a wa giẹn ikun ẹnrẹn hia a. Iran ghi viọ ebrẹd imuohan rre, a ghi viọ ẹre ye uhunmwu eteburu ne awua i ye. Otota, iran ghi gha rhu avbe ukpa ni rre avbe erhan ọmukpa ọghe igoru. Emwi ne Nọyaẹnmwa khare ọre ima ru sokpan, wa hee ẹe ye otọ nẹ.

¹² Osanobua tobọ ẹre ọrọre ọkaolotu mwa, avbe ohẹn irẹn rre emwa na, iran viọ okpe mwẹ iran wa mu egbe ne iran kpe ẹre vbe ẹghẹ ne ọ rhirhi gha khin ne iran ya tie ima gha die okuo ne a ra gu uwa khọn. Izrẹl, wa ghẹ gu e Nọyaẹnmwa ne Osanobua avbe erha uwa odede gbinna. Obọ uwa i sẹtin ke okhunmwu.”

¹³ Vbe uwu ẹghẹ ne a kha na, e Jeroboam gie eso vbe uwu ivbi iyokuo ẹre nẹ ne iran ya ghae ye odẹ khẹ ivbiyokuo e Juda, la iran iyeke rre, ne iran nekpa mu aro da iran gha gbinna.

¹⁴ Ivbi e Juda ghi ghe ighẹ a gha ga iran, iran ghi na datu tie Nọyaẹnmwa nọ iyobọ, avbe ohẹn keghi kpe okpe.

¹⁵ Ivbi e Juda na wa davan, Abija keghi ke odaro ne iran, iran na suẹn igbinna, Osanobua keghi khọn e Jeroboam kevbe ivbiyokuo Izrẹl.

¹⁶ Ivbi Izrẹl keghi lẹ kua vbe odaro ivbi e Juda, Osanobua keghi gie obọ ivbi e Juda ke ukhunmwu ne iran.

¹⁷ Abija kevbe ivbiyokuo ẹre keghi gbe ivbi Izrẹl ugbemwẹ oya. Omwa arriaisẹn ekigbesiyeha (500,000) vbe ivbiyokuo ni maa sẹẹ vbe Izrẹl kegha re ne a gbele ua.

¹⁸ Erriọ, obọ ivbi e Juda keghi ke ukhunmwu ne ivbi Izrẹl, rhunmwuda, iran mu ẹtin yan Nọyaẹnmwa ne Osanobua avbe erha iran odede.

¹⁹ Abija keghi khu ivbiyokuo e Jeroboam, ọ keghi yin eso vbe ẹvbo iran, ena ọ re Bẹtẹl, e Jesiana kevbe Efrọn, kevbe avbe igue ni sikẹ avbe ẹvbo na.

²⁰ Vbe uwu ẹghẹ ne Abija rriọba la hia, e Jeroboam ma sẹtin dọlegbe gha mwẹ ẹtin vbene ọ te ka gha mwẹ yi. Vbe okiekie ehia, e Nọyaẹnmwa keghi kinmwi ẹn, ọ na wu.

²¹ Sokpan, ẹtin Abija kegha kpọlọ yọ. Ọ kegha mwẹ ikhuo iwenẹ, ọ keghi biẹlẹ emọ ikpia evayan ugie, kevbe emọ ikhuo enẹirrọvbugie.

²² Okha Abija ni ghi dekẹe, avbe ẹmwẹ ne ọ tae kevbe emwi ne ọ ru, a gbẹnnẹ ehia ye Ebe Okha Ido ne Akhasẹ.