II Kọrinti 9 - Edo Bible (E Baibol Ẹdo) Version 1996

Iyobọ Ne Ivbi Iyayi Ne Ihua Ọmwa

¹ Ne a ghẹ wẹ I ma zẹdẹ gbẹn ebe gie uwa nọ, vbe ekpa iyobọ ne a ra ru gie emwa Osanobua ni rre Judia.

² Mẹ rẹnrẹn wẹ wa ho ne uwa ru iyobọ, I vbe ye uwa rhuọ ma esọsi ne ọ rre Masidonia nẹ, I na tama iran, “Ne ukpo gha dee ọre etẹn mwa ni rre Gris ghi mu egbe ne iran ya ru iyobọ.” Isasegbe uwa keghi rhie isasegbe ne ni bun vbe uwu iran.

³ Mẹ gie avbe etẹn na dee nian ne a ghẹ miẹn wẹ orhuọ ne ima ye uwa rhuọ vbe ẹmwẹ na, khian ifianyanegbe, sokpan, zẹ vbe ne I kha re, wa ghi wa mu egbe iyobọ ne uwa ra ru ye otọ.

⁴ Ra deghẹ ẹ i re vberriọ, a deghẹ emwa Masidonia lele mwẹ rre, iran na do vba ighẹ wa ma he mu egbe, u miẹn vbene ekhue gha mu ima hẹẹ, ne a ghẹ zẹdẹ ta ọghe emwi ekhue uwa, ne ima na wa ye obọ so udu ye ẹmwẹ uwa vberriọ.

⁵ Ọna ọre ọ ya mwẹ roro ẹe wẹ, emwi ne ọ kere nọ ne I wẹ ne avbe etẹn mwa na ke aro ne ima ne iran vbe mwamwa avbe emwi ne uwa wẹ wa ra ya ru ẹse ye otọ. Mẹ ghẹ ghi rre, I ghi do vba ighẹ emwi hia gba nẹ, ọnii ghi rhie maa wẹ, te uwa ru emwa ẹse rhunmwuda ighẹ uwa ho ighẹ ẹ i re ọghe rhurhugban.

⁶ Wa yerre ọmwa ne ọ ye emwiokọ ni bun kọ, ni bun ọre ọ ra vbe rhọ, ọmwa ne ọ ye emwiokọ ne kherhe kọ, emwiokọ kherhe ọre ọ ra vbe rhọ.

⁷ Rhunmwuda ọnii, wẹ ne dọmwadẹ ọghọe zẹ ọhẹ vbene ọ ye ekhọe ẹre mwamwa ẹn, ẹ i re ne a ru viẹ, ra ọghe te a ya tọn mwẹ, rhunmwuda, ọmwa ne ọ ye ekhọe ọyẹnmwẹ ru ẹse, ọre Osanobua ho ẹmwẹ ọnrẹn.

⁸ Osanobua gha sẹtin rhie ne uwa gberra inu ne uwa i mwẹ, vbe ne a gha na miẹn wẹ wa ghi gha mwẹ emwi ne uwa ho hia ọghe obọ uwa, kevbe sẹ inu ne uwa gualọ ye emwi esi ne uwa a rhirhi gha ru.

⁹ Zẹ vbene ebe khare, “Ọ viọ ne avbe ivbiogue wọrhọwọrhọ, itohan rẹn rrọọ rhinrin ẹdẹdẹmwẹdẹ.”

¹⁰ Osanobua ne ọ viọ emwiokọ ne uwa ho hia ne uwa, ọ ghi vbe gi ẹe zọ, ne ọ vbe mọ emwiorhọ ọkpọkua ne obọ ne ọ ru ẹse ọghe uwa.

¹¹ Rẹn gha ru ẹe ne uwa gha mwẹ sẹ vbene obọ ẹse ne a ru gha na gha tọlọ uwa ẹghẹ hia, sẹrriọ ne emwa ni bun gha na kpọnmwẹ Osanobua rhunmwuda emwi ne uwa la obọ ima viọ gie iran.

¹² Rhunmwuda, iwinna ne uwa winna na, ẹ i re wẹ wa yae rrọ emwa Osanobua rre ọkpa, sokpan ọ kevbe gie ekpọnmwẹ ọkpọnmwẹ ẹse gha tue ladian ghe Osanobua.

¹³ Kevbe rhunmwuda emwi ne ọ ghi la ekpa iwinna uwa na vẹ ne agbọn rẹn, emwa ni bun ghi rhie uyi ne Osanobua ye ẹmwẹ iyẹn ne ọ maa ọghe Kristi ne ọ rre uwa ekhọe, kevbe ne uwa vbe yayi, kevbe obọ ẹse ne ọ tọlọ uwa ghe iran, kevbe emwa ọvbehe.

¹⁴ Rhunmwuda ọnii, iran ghi ye ekhọe aho ẹmwẹ ọmwa nọkhua na erhunmwu ne uwa, rhunmwuda ẹsọhẹ ne a i miẹn egbọre ne Osanobua rhie ma uwa.

¹⁵ Wa gie a kpọnmwẹ Osanobua ye ẹse ẹre ne a i sẹtin fian ive yi.