II Kọrinti 8 - Edo Bible (E Baibol Ẹdo) Version 1996

Izọhẹ Enọyayi

¹ Etẹn mwẹ, ma ho ne uwa rẹn iwinna ne ẹsọhẹ Osanobua he winna vbe esọsi ne ọ rre Masidonia.

² Ọlọghọmwa ne iran miẹn wa dan mwẹ iran ghe ẹsẹsẹmwẹse, sokpan ẹko keghi ye rhiẹnrhiẹn iran sẹrriọ wẹ iran keghi ye zẹ emwi obọ ya ru ẹse wọrhọ wọrhọ, egbe ne a ya miẹn wẹ iran rre uwu a i mwẹ.

³ Ne I tama uwa wẹ, ekhọe obọ iran ọre iran ya rhie emwi ladian vbene ẹtin ira sẹe, uhin gberra vbene obọ iran sẹe.

⁴ Iran rinmwian ima, iran keghi tua unu mu ẹn wẹ ne a rhie otọ ne iran vbe ya gha mwẹ obọ vbe uwu iyobọ ne a gha ru gie iran ne emwa Osanobua ni rre Judia.

⁵ Ọ keghi gberra vbene ima te rhie aro yi! Okaro, iran rhie egbe iran ne Nọyaẹnmwa, vbe iyeke ọnii, vbe ekpa iho Osanobua, iran keghi vbe do rhie egbe iran ne ima ba ẹre.

⁶ Rhunmwuda ọnii, ọre ima na wẹ ne Taitọs, ọmwa ne ọ suẹn iwinna na, ne ọ wa gha ya ẹe khian, ne ọ gu uwa winna iwinna aho ẹmwẹ ọmwa na sẹ ufomwẹ.

⁷ Emwa ni fe wa khin vbe uwu emwi ne uwa mwẹ hia, vbe iyayi, ẹmwẹ ne a guan kevbe irẹnmwi, igiangian ne uwa gbe ya ru iyobọ, kevbe aho ẹmwẹ ọmwa ne uwa mwẹ ghe ima. Erriọ zẹẹ ma ho ne uwa vbe fan ekhọe rua ya winna iwinna aho ẹmwẹ ọmwa na.

⁸ Ẹ i re te I vinnọ uhi ye otọ, sokpan, I gha ta vbene emwa ọvbehe gbe igiangian ye ẹmwẹ iyobọ ne a ru hẹ, te I ho ne I rẹn vbene aho ẹmwẹ ọmwa uwa re ọghe ẹmwata hẹẹ.

⁹ Rhunmwuda, wa rẹn ẹsọhẹ ọghe Nọyaẹnmwa Jesu Kristi wẹ vbene irẹn rhe fe sẹ hẹ, ọ keghi rhunmwuda uwa ye egbe khian ovbiogue, ne irẹn miẹn ehe na la ekpa a i mwẹ ọghọe ye uwa khian ni fe.

¹⁰ Vbene nene ẹmwẹ ye hẹ vbe ekhọe mwẹ ọre ọ na khin wẹ, ọ kere ne uwa ru ẹe fo nian ighẹ iwinna ne uwa suẹn rẹn ne ukpo. Ẹ i re wẹ wa ọre emwa okaro ne ọ ka gha sobọ yọ ọkpa, wa ọrọre emwa okaro ne ọ gha ho ne a sobọ yọ.

¹¹ Wa de yan rẹn nian ne a ru ẹe fo, wa ye igiangian ne uwa gbe ya muẹn hẹn, ru ẹe fo, wa ye emwi ne uwa mwẹ ru ẹe.

¹² Rhunmwuda, deghẹ obọ ẹse na ru tọlọ uwa, emwi ne uwa mwẹ ne uwa gha ru ẹse, ọre Osanobua ra ghe ya rhan obọ miẹn ẹse ne uwa ru, ighẹ ẹ i re emwi ne uwa i mẹ.

¹³ Ẹ i re te I sie emwa ọvbehe ihẹ mu ne uwa.

¹⁴ Sokpan ugbẹn vbe a miẹn wẹ, wa mobọ mwẹ emwi ẹghẹ na, te ọ kere ne uwa ye iran ne ẹ i mwẹ obọ. Ẹghẹ nii, a deghẹ a ghi miẹn ighẹ wa i mwẹ, iran na wa vbe gha mwẹ, te iran ghẹ ghi ye uwa obọ. Ẹghẹ nii omwa ọkpa ọre a ghi ya mwa ne egbe.

¹⁵ Zẹ vbene ebe tae, “Ọmwa ne ọ rhọ enibun, ma gha mwẹ ọnrẹn gbe, ọmwa ne ọ vbe rhọ ekherhe ma vbe gha mwẹ ne ọ ma sẹ.”

E Taitọs Kevbe Ivbi Otu Ẹre

¹⁶ Ma mobọ kpọnmwẹ Osanobua, ne ọ na ru ẹe wẹ vbene ọ bọbọ ima egbe ne a gha ye uwa obọ, erriọ ọre ọ vbe bọbọ Taitọs egbe.

¹⁷ Ẹ i re wẹ, ọ wa khuẹnniẹn ye emwi ne ima nọ ẹre re ọkpa, ọ keghi wa bọbọ ẹre egbe sẹrriọ ne ọ ru iyobọ wẹ, ọ keghi ye ekhọe obọ ẹre bu uwa gha dee.

¹⁸ Ma vbe gie ọtẹn ne okpia ọkpa lele ẹe dee, ọmwa ne esọsi hia wa ye ọghọ na rhunmwuda iwinna rẹn vbe uwu ne ọ na kpe orhu iyẹn ne ọ maa.

¹⁹ Ye vbe sẹ ọnii, te esọsi hia wa hannọ ẹn zẹ ne ọ gha lele ima khian vbe ehe ne ima na winna iwinna aho ẹmwẹ ọmwa na, ne uyi ọghe Nọyaẹnmwa, kevbe ne a vbe rhie maa ighẹ ma mu egbe ne a ya ru iyobọ.

²⁰ Te ima heko ye ẹwaẹn ru ẹe ne a ghẹ vbe do si etalọ ye ẹmwẹ vbene ima ru ẹe hẹ, ighẹ emwi ẹse ne ọ winhin na.

²¹ Emwi ne ima mwẹ vbe ekhọe ọrọre ne a gha ru emwi la odẹ ne ọ gbae, ẹ i re vbe odaro Nọyaẹnmwa ọkpa, sokpan kevbe odaro emwa ne agbọn.

²² Rhunmwuda ọnii, ma gie ọtẹn mwa lele iran dee, ma danmwẹ ọẹn ghe nẹ inugba ne ọ khin, a keghi miẹn wẹ, ọ rre ọre ekhọe ne ọ ru iyobọ. Ugbẹn vbe a ghi wa miẹn nian wẹ ẹmwẹ uwa la ẹre aro sẹrriọ, te ọ ghi wa bọbọ ẹre egbe ne ọ ru iyobọ.

²³ Zẹ vbe ọ ghe Taitọs, ogieva mwẹ ne ọ gun mwẹ winna nọ ne a ya ye uwa obọ. Zẹ vbe ọghe avbe etẹn nekpa ni lele ẹe dee, emwa ne dọmwadẹ esọsi zẹe iran khin ne iran rhie uyi gie Jesu.

²⁴ Wa ye oghọghọ miẹn iran, ne aro esọsi hia miẹn ehe na da ẹe, ne iran vbe rẹn wẹ orhuọ ẹmwata ọre ima ye uwa rhuọ.