II Kọrinti 7 - Edo Bible (E Baibol Ẹdo) Version 1996

¹ Emwi na hia ọre a ve ima ẹre, wa ne ọse mwẹ ni ghan. Rhunmwuda ọnii, wa gie ima khuẹ egbe mwa huan hin emwi ne ọ sẹtin ye egbe ra orhiọn khian ne ọ ma huan, wa gie ima hia ne ima gha re ne ọ huanrẹn fẹẹrẹ, vbe ekpa ne ima gha na gha rrọọ vbe a mu ohan Osanobua.

Ọyẹnmwẹ Ne Ọ Sẹ Pọl

² Wa rhie otọ ne ima vbe uwu ekhọe uwa. Ne ima ru ẹre emwi khọ i rre uwu uwa, ma ma fuẹn ọmwa rhọkpa rua, ma ma rhu ọmwa rhọkpa rre.

³ I ma ta ọna ne I ya zan uwa, rhunmwuda, zẹ vbene I ka kha yi, wa ghan ne ima sẹrriọ wẹ, ihe ọkpa ma gha ye ẹghẹ hia, te a rre agbọn ra te a wulo.

⁴ Aro mwẹ da ọna sẹrriọ wẹ, te I ye uwa ghan. Vbe uwu ọlọghọmwa ne ima ye hia, te udu ye hu mwẹ, ẹko mwẹ vuọn ne ọyẹnmwẹ.

⁵ Uhin vbe ima sẹ Masidonia nẹ, ma ma ye hẹ wẹ, Orueghe gba ehe hia, ẹzọ ne a gu emwa ọvbehe gui, afianma ne ọ fian ọmwa vbe ekhọe.

⁶ Sokpan, Osanobua ne ọ rhie ẹtin ne ne egbe wọ fo nẹ, keghi ye urremwẹ Taitọs rhie ẹtin ye ima iwu.

⁷ Ẹ i re urremwẹ ọnrẹn ọkpa, sokpan kevbe iyẹn ne ọ do na ọghe vbene uwa rhie igiẹdu ne iran hẹ. Ọ tama ima vbene uwa wa ho ne uwa miẹn mwẹ hẹ, vbene ọ da uwa hẹ, vbene uwa mu egbe ne uwa gbinna mẹ hẹ, ẹko keghi rhiẹnrhiẹn mwẹ ẹsẹse sẹ ayọ nian.

⁸ Rhunmwuda, a deghẹ ebe ne I gbẹn gie uwa nii gele lughu uwa ẹko, I ma gbe I ma rẹn I ghẹ gbẹn ọẹn. Te ọ gha te da mwẹ vbe I miẹn wẹ ebe nii rhia uwa ẹko ua vbe ovbi ẹghẹ kherhe.

⁹ Sokpan banbanna nian, ẹko wa rhiẹnrhiẹn mwẹ, ẹ i re rhunmwuda ighẹ I rhia uwa ẹko ua, sokpan rhunmwuda wẹ, ẹko ne ọ rriara uwa ye uwa fi obọ werriẹ. Osanobua lo ẹko nọ rriara uwa ni, rhunmwuda ọnii ma ma ru uwa emwi dan.

¹⁰ Rhunmwuda ẹko ne ọ rriara ọmwa ne Osanobua loro, keghi rhie afi ekhọe werriẹ ghe imiẹnfan rre. A i vbe gbe I ma rẹn ye ọnii hiehiere. Sokpan te ẹko ne ọ rriara ọmwa ọghe agbọn na si uwu.

¹¹ Wa ghe emwi ne Osanobua ye ẹko ne ọ rriara uwa na ru, vbene uwa ghi mu aro ye emwi hẹ, vbene uwa ghi ziga hẹ ne uwa rhie maa ighẹ, wa ma rẹn ọkpa wa ma rẹn eva. Egbe ohu nọkhua vberriọ egbe utumwẹ wa bu rre vberriọ, a mu emwi roro, a mu aro ye emwi, a mu egbe ne a ya gbe ọmwa hin ọkhọ rre! Wa keghi wa rhie egbe uwa zẹ vbe ọmwa ne ọ ma rri abe rhọkpa vbe uwu ẹmwẹ na.

¹² Erriọ nọ, I gha rhe gbẹn ebe ni, ẹ i re rhunmwuda ne ọ rukhọ ra ọmwa ne ọ rukhọ ọre I na gbẹn ọẹn. Sokpan te I gbẹn ọẹn ne I miẹn ehe na rhie ma uwa, vbe odaro Osanobua, vbene uwa kakabọ mu aro ye ẹmwẹ emwi ima hẹ.

¹³ Ọnii ọre ọ si ẹe ne udu na gha hu ima. Ẹ i re wẹ ọ ya udu gha hu ima ọkpa, Taitọs keghi wa ye ọyẹnmwẹ sẹ mwẹ vbe ekpa vbene ẹko rhiẹnrhiẹn ọen ye vbene uwa hia sẹ oyaya muẹn hẹ.

¹⁴ I wa ye uwa rhuọ ma rẹn, wa ma vbe gie orhuọ ni degbe mwẹ. Ẹmwata ma tama uwa vbe ẹghẹ hia, erriọ vbe nọ zẹẹ, wẹ orhuọ ne ima rhuọ vbe ekpa Taitọs kevbe gha re ẹmwata.

¹⁵ Rhunmwuda ọnii, aho ẹmwẹ ọmwa ne ọ mwẹ ghe uwa keghi dọlegbe gha mwẹ ọghae, vbe ọ yerre vbene uwa hia wa mu egbe hẹ ne uwa ya gha họn ẹmwẹ, kevbe ne uwa ye ohan kevbe uguọmwẹ gbe ọbokhian ne irẹn hẹ.

¹⁶ U miẹn vbe ọyẹnmwẹ sẹ mwẹ hẹ, rhunmwuda ighẹ wa gie a wa mu ẹtin yan!