II Kọrinti 6 - Edo Bible (E Baibol Ẹdo) Version 1996

¹ Vbe uwu iwinna ne ima vbe Osanobua gba winna, ma rinmwian uwa khekherriọ, wa miẹn ẹsọhẹ Osanobua rhie nẹ, wa ghẹ i gi ẹe gha re ne a mu rhia.

² Wa họn vbene Osanobua kha hẹ: “I họn ọwua vbe ẹghẹ ne I ya ru uwa ẹse: I ye uwa obọ vbe ẹdẹ imiẹnfan.” Wa danmwehọ nian, ẹghẹ ne a ya miẹn aro ne ọ maa Osanobua ọna khin na, ẹdẹ nẹ rẹ ọrọre ẹdẹ imiẹnfan.

³ Ma ma ho ne ọmwaikọmwa do gha zan iwinna mwa, rhunmwuda ọnii, ma i vbe mu idobo ye ọmwarhọkpa egbe.

⁴ Sokpan vbe uwu emwi ne ima ru hia, ma ghi gha hia ne ima gha rhie maa wẹ, eguọmwadia Osanobua ma khin, vbe ekpa ne a na ye ẹgbodin ziengbe vbe uwu ọlọghọmwa, ukpokpo, kevbe orueghe.

⁵ A gbe ima asan, a mu ima ye ẹwẹdọ, a ko gbe mwa, a ya ima miẹn ẹsọn, ma kegha rrọọ vbe ne a i na rri evbare kevbe ne a i na vbiẹ.

⁶ Vbe ekpa a i mwẹ iruẹn, irẹnmwi, iziengbe, kevbe itohan, ma keghi rhie egbe maa zẹ vbe eguọmwadia Osanobua, vbe ekpa Orhiọn Ne ọ huanrẹn, vbẹ ekpa aho ẹmwẹ ọmwa ẹmwata ne ima mwẹ.

⁷ Vbe ekpa ikpe orhu ẹmwata, vbe ekpa ẹtin Osanobua. Uyinmwẹ ẹmwata ọrọre emwi gbinna ne a ya gu emwa gbinna, kevbe ne a ya sinmwi egbe mwa.

⁸ A ya ọghọ ne ima, a vbe fa ima uan, a ya ukpẹ sakan ima, a vbe tian ima, a ru ima vbe ọhọn ohoghe, sokpan ẹmwata ma ta.

⁹ Zẹ vbe emwa ne a ma rẹn, Sevba emwa hia ọre ọ rẹn mwa, vbene a miẹn wẹ ma wulo nẹ, sokpan, wa tobọ uwa miẹn wẹ ma ye hiọnrọn, a rhe rri ma oya, sokpan a ma gbele ima uan.

¹⁰ A rhe rhia ima ẹko rua, sokpan ọyẹnmwẹ sẹ mwa vbe ẹghẹ hia, ma yevbe ivbiogue, sokpan ma ya emwa ni bun khian eni fe, ma ye vbe ekhẹn ivbabọ, sokpan ma wa mwẹ emwi hia.

¹¹ Wa ne ọse mwẹ ni rre Kọrinti, te ima wa yan ta ẹmwata ma uwa, te ima wa fannọ otọ ẹko mwa ma uwa.

¹² Ma ma mu iyeke ẹmwẹ ma uwa, wa ọkpa ọre ọ mu iyeke ẹmwẹ ma ima.

¹³ Te I wa gue uwa guan na zẹ vbe ivbimwẹ, wa vbe gha mwẹ ẹnina ne ima mwẹ ghe uwa ghe ima. Wa fannọ otọ ẹko uwa ma ima.

Ẹmwẹ Oyọnyọn Iran Ni Ma Yayi

¹⁴ Wa ghẹ gha gu iran nimayayi winna kugbe, vbene a miẹn wẹ ọkpa wa khin, rhunmwuda, ẹ i gie a ru. Vbe emwi ne ọ gbae kevbe ne ọ ma gba khian sẹtin gba gha si egbe obọ khian hẹ yi? Vbe uwanmwẹ vbe ebiebi khian gba die ihọkpa ya hẹ yi?

¹⁵ Vbe Kristi kevbe Setan khian gba gu egbe gha rọ hẹ yi? De emwi ne nọyayi kevbe nọma yayi na re ọkpa yi.

¹⁶ Vbe Ọgua Osa kevbe amazẹ ọghe iran nigẹbọ ra ya gue obọ egbe hẹ yi? Rhunmwuda Ọgua osa ọghe Osanobua nọ rrọọ, ọre ima khin. Zẹ vbe ne Osanobua tobo ẹre kha re: “I gha bọ owa mwẹ ye ehe ne iran ye. I ghi yin ehe ne iran ye. Mẹ ghi gha re Osanobua iran, iran ghi gha re emwa mwẹ.”

¹⁷ Rhunmwuda ọnii, Nọyaẹnmwa keghi kha wẹ, “Wẹ kpao sẹ iran rae, Wa wannọ egbe hin uwu iran rre. Wa ghẹ mwẹ obọ vbe emwi ne ọ ma huan mẹ gha rhan obọ miẹn uwa.

¹⁸ Mẹ ghi gha re erha uwa, wa ghi gha re ivbi mwẹ ne ikpia kevbe ne ikhuo, erriọ Nọyaẹnmwa Oghodua kha re.”