II Kọrinti 5 - Edo Bible (E Baibol Ẹdo) Version 1996

¹ Rhunmwuda, ma rẹnrẹn wẹ, okhogbo ne ima ye na ọnii ọre egbe ne ima mwẹ vbe agbọn na — a gha sin ẹnrẹn kua nẹ, Osanobua gha rhie owa ne ima gha ye vbe ẹrinmwi, ne irẹn tobọ ẹre bọe, owa ne ọ gha rrọọ rhinrin ẹdẹdẹmwẹdẹ.

² Banbanna nian, te ima ghi rhie aro ye odẹ, te ọ ghi bọbọ ima egbe wẹ ne a do mu akpa mwa ne ọ rre ẹrinmwi yọ mwa.

³ Rhunmwuda a gha mu ẹn yọ mwa nẹ, ma i ghi khian gha re emwa ne ẹ i mwẹ ikinnegbe.

⁴ Omwa vbene ima na ye rre uwu okhogbo agbọn na, te ima gha ye gha khiẹkhiẹ egbe ba ẹmwẹ oya ne a rri ima re, ẹ i re rhunmwuda ighẹ ma ho ne a mu ikinnegbe ọghe agbọn mwa na fua, sokpan ma ho ne a ya ọghe ẹrinmwi yọ mwa, vbene a gha na miẹn wẹ, arrọọ ghi rhie emwi ne ọ sẹtin wu gbe re.

⁵ Osanobua ọre ọ mwamwa afiwerriẹ na ne ima, ọ keghi rhie orhiọn rẹn ne ima zẹ vbe ama ne ima gha ya ya aro ye emwi ne ọ rhie khẹ mwa.

⁶ Rhunmwuda ọna ọre udu na hu ima vbe ẹghẹ hia. Ma rẹnrẹn wẹ, ẹghẹ ne ima a rhirhi ya vbe uwu egbe na, te ima lahin uwu owa Nọyaẹnmwa rre.

⁷ Rhunmwuda, ekpa iyayi ọre ima ya rre agbọn na, ighẹ ẹ i re wẹ ma miẹn otọ ẹre nẹ.

⁸ Udu wa hu ima, ọ gha te yẹ ima sẹ ne a kpao sẹ owa ikinnegbe mwa na rae, ne ima ya gu Nọyaẹnmwa gha rrọọ.

⁹ Sokpan ne ọ sẹre vbe uwu ehia ọrọre wẹ, ma ho ne a gha ru ne ọ yẹ ọre, ọ re vbe owa mwa vbe edinran nọ ra vbe odọ.

¹⁰ Rhunmwuda, ẹ i mwẹ ma hia ma mudia ye odaro Kristi, ne ọ miẹn ehe na bu ohiẹn mwa. ne dọmwadẹ ọghọe miẹn ehe na miẹn emwi ne ọ khẹ kẹe rhie, zẹ vbene ọ ye obọ ru vbe ọ rre agbọn, deghẹ ne ọ maa nọ ra ne ẹ i maa.

Ne A La Ekpa Kristi Gha Gu Osanobua Ru Ọse

¹¹ Ma rẹn emwi ne a yae kha wẹ, ne a gha mu ohan Nọyaẹnmwa, ma keghi rhunmwuda ọnii ho ne a gha bọ emwa yọ. Osanobua rẹn ima fo fẹẹrẹ, mẹ vbe yayi wẹ, vbe uwu ekhọe uwa, wa vbe rẹn mwẹ.

¹² Ẹ i re te ima ho ne avbe dọlegbe gha tian egbe ima ma uwa, sokpan te ima ho ne ima rhie maa uwa, otọe emwi ne ọ zẹe ne uwa gha na gha ye ima ghan, ne uwa miẹn ehe na miẹn ẹmwẹ wanniẹn iran ẹre, ighẹ iran ni ya ukhuegbe ghan, vbe ne iran i na ghe uyinmwẹ.

¹³ Te ima ghi gele mwẹmwẹ ra? Ba ẹmwẹ Osanobua nọ. Te aro hian ima ra? Ba ẹmwẹ uwa nọ.

¹⁴ Rhunmwuda, aho ẹmwẹ ọmwa ne Kristi mwẹ ghe mwa, ọre ọ da kha yan mwa, ugbẹn vbe ima ghi do rẹn nẹ nian wẹ, orhiọnkpa wu ne emwa hia, ne ọ rhie maa wẹ, emwa hia mwẹ oghae vbe uwu ẹre.

¹⁵ Te ọ wu ne emwa, ne avbe emwa ni rre agbọn ghẹ ghi gha rre agbọn ne egbe iran ọvbehe, sokpan ne iran gha rrọọ ne irẹn nii ne ọ wu, ne a vbe huẹn kpaegbe vbe idin, rhunmwuda iran.

¹⁶ Rhunmwuda ọnii, ẹ i re obọ ne agbọn mu la, ma ghi ya bu ohiẹn ọmwa rhọkpa. A deghẹ te a kue miẹn wẹ, ẹghẹ ọkpa rrọọ ne ima na gha ye aro vbe ne agbọn roro ghe Jesu, ma i ghi ru vberriọ nian.

¹⁷ Ọmwaikọmwa gha yegbe ba Kristi nẹ, ọmwa ọgbọn ghi nọ, emwi nẹdẹ hia rrie, emwi ọgbọn rre nẹ.

¹⁸ Osanobua ọre ọ ru emwi na hia, rẹn ne ọ la ekpa Kristi fi ima werriẹ hin eghian rẹn ne, do khian esiọre, ọ na ghi vbe waa iwinna ne ima, ne a vbe ya gha ye emwa ọvbehe khian esiọre.

¹⁹ Ẹmwẹ ne ima ta ẹe ọrọre wẹ, te Osanobua ma ghi ka orukhọ iran ye iran owẹ, rẹn keghi tae ya gie ima uhunmwu ighẹ ẹmwẹ vbene irẹn ya ye iran khian esiọre hẹ.

²⁰ Eban nian, te ima ghi guan ne Kristi khekherriọ, vbene a miẹn wẹ Osanobua tobọ ẹre ọre ọ wa la uwu ima gha gu uwa guan ne Kristi. Ma rinmwian uwa, wa gie Osanobua fi uwa werriẹ hin eghian rre ghe ọse.

²¹ Kristi ma gha mwẹ orukhọ, sokpan Osanobua keghi ghae nẹ vbe orukhọ ima, ne a miẹn ehe na miẹn wẹ, ma gha ye egbe ba irẹn nẹ, ma ghi vbe ghae vbe ọmwa ẹmwata ne Osanobua khin.