II Kọrinti 13 - Edo Bible (E Baibol Ẹdo) Version 1996

Ibude Kevbe Igiotuẹ Ne Okiekie

¹ Ukpogieha ne I ghi re ra do miẹn uwa, ọre ọna khin na. Ebe tae wẹ, “A gha ba ọmwa ifi ẹzọ, ọ kere ne a gha mwẹ osẹe eva ra eha ni gha sẹ osẹe.”

² I ho ne I tama uwa hia ni ru orukhọ vbe ẹghẹ ne ọ gberra, kevbe iran nekpa hia, I ka tae vbe ẹghẹ ne I na rre ukpogieva, I gha ye vbe dọlegbe tae nian, vbe nana miẹn ighẹ I i ghi rre ehe ne uwa ye na. I gha ghi dọlegbe rre, orhiọnkpa ne oya na re gha la ban ẹ i rrọọ.

³ Emwi ne uwa ho ne aro uwa sẹ ne uwa miẹn ehe na rẹn ighẹ Kristi gele gun mwẹ guan. Wa gha miẹn ọẹn. Ọ gha mu uwa rueghe, ẹ i vburriẹ, sokpan, ọ gha rhie ẹtin ẹnrẹn maa vbe adesẹ uwa.

⁴ Rhunmwuda, a gha rhe miẹn wẹ, uwu a ma wo vbe egbe ọre a na gbe ẹe rua vbe uhunmwu ugbugbe, ẹtin Osanobua ọre ọ ya rrọọ. Ma ghẹ ghi ya egbe ba irẹn nẹ, ma ghi vbe do gha re ne ọ ma wo vbe egbe, sokpan zẹ vbe ọ ghe ne ọ kan ima kan uwa, ẹtin Osanobua ma khian ya gu irẹn gha rrọọ.

⁵ Wa tobọ uwa gualotọ egbe uwa, ne uwa ghe ẹre deghẹ wa gele rrọọ vbe uwu iyayi. Iyayi ighẹ wa rẹnrẹn ighẹ Jesu Kristi re uwu uwa? Sokpan a ma gha kha ighẹ uwa wa ba odẹ ku nẹ.

⁶ Iyayi ighẹ wa gha miẹn nian ighẹ ma i re ne ọ gbe kuẹn.

⁷ Ma na erhunmwu ghe Osanobua ne uwa ghẹ fidọn, ẹ i re ne a miẹn ehe na rhie maa ighẹ ma ru rho obọ nẹ, sokpan wẹ ne uwa gha ru emwi ne oghae, ma gha rhe ye vbe emwa ni gbekuẹn.

⁸ Rhunmwuda, ma i ra sẹtin ru emwi ne a gha ya gbe odan ye ẹmwẹ Osanobua, vbe ẹ i re ne a gha ya so igie yọ.

⁹ Te ima ghọghọ vbe a gha miẹn wẹ, wa wo vbe egbe vbe ima ma wo vbe egbe. Erriọ ọre ima vbe na erhunmwu ẹnrẹn wẹ, ne uwa do gha re ne ọ gba na.

¹⁰ Ọnii ọ si ẹe ne I na gbẹn ebe na vbe I i rre ehe ne uwa ye, otọe ẹre nọ wẹ, I gha ghi rre, ne I ghẹ ye obọ ne ọ tọn mu uwa vbe i a gha lo asẹ ne Nọyaẹnmwa rhie mẹ, asẹ ne a rhie mẹ ne I ya ye uwa digiẹ ighẹ ẹ i re ne I ya duẹ uwa sẹ otọ.

¹¹ Banbanna nian, etẹn mwẹ, wa ọ khian ẹdẹ ọkpa. Wa gha ru ẹe ne ọ gba ne uwa, wa gha rhie ẹmwẹ mwẹ ye ehọ wa gie ẹmwẹ uwa gha gue kugbe, wa gha rrọọ vbe uwu ọfumwegbe. Osanobua aho ẹmwẹ ọmwa kevbe ọfumwegbe gha vbe gu uwa gha rrọọ.

¹² Wa gba ye isoso unu etẹn tuẹ egbe. Emwa Osanobua hia gie otuẹ uwa.

¹³ Te ẹsọhẹ Nọyaẹnmwa Jesu Kristi, aho ẹmwẹ ọmwa ọghe Osanobua kevbe akugbe Orhiọn Ne Ọ Huanrẹn gha gu uwa hia gha rrọọ.