II Kọrinti 11 - Edo Bible (E Baibol Ẹdo) Version 1996

E Pọl Kevbe Avbe Ukọ Ohoghe

¹ Akpawẹ wa gha sẹtin mwẹ i ziengbe mẹ nian, uhin a deghẹ I rhe ru emwi ukọnmwẹ kherhe. Lahọ wa zin ẹnrẹn.

² Ẹmwẹ uwa ọre ọ da mwẹ zẹ vbene ẹmwẹ uwa vbe da Osanobua, rhunmwuda te uwa ye vbe uvbi ne ọ ma he sakan ne imẹ ya ne okpia ọkpa kẹkan, ọnii nọ wẹ Kristi tobọ ẹre.

³ Afianma fian mwẹ ne iran ghẹ ya ruẹn ẹmwẹ ye uwa ekhọe mu ẹn rhia, wa ghi zobọ vbe ne uwa na te wa guobọ Jesu vbe ne a i gbe ikhan yi, zẹ vbene ẹyẹn ye ẹkẹ vbe ero, rẹrẹ Ivi.

⁴ Rhunmwuda, ẹko rhiẹnrhiẹn mwẹ ọre uwa ya rhie ẹghẹ ne ọmwaikọmwa ne ọ rre do kpe orhu Jesu ọvbehe ma uwa, ẹ i re ne ima kpe orhu ẹre, wa ghi vbe gha rhan obọ miẹn orhiọn kevbe iyẹn ne ọ maa ne ọ lughaẹn ne Orhiọn kevbe iyẹn ne ọ maa ne uwa rhie vbe obọ ima!

⁵ Mẹ ma yayi wẹ odẹ ọkpa rrọ ne imẹ ma ya vba avbe “Ogiete Ukọ” ọghe uwa nii.

⁶ Ọ gha kẹe, I ma he guẹ ẹmwẹ ne a guan, sokpan, ẹ i yerriọ vbe ọghe irẹnmwi, ma wa rhie ọna ma uwa nẹ vbe ẹghẹ hia kevbe ihe hia.

⁷ I ma miẹn uwa emwi rhọkpa vbe I do kpe orhu Iyẹn Ne ọ maa ọghe Osanobua ma uwa. Mẹ keghi mu egbe mwẹ rrie otọ ne I miẹn ehe na ye uwa khian ni kpọlọ. Abakuru ọnii khin mwẹ re ra?

⁸ Ẹghẹ ne I na gha winna vbe ehe ne uwa ye, avbe esọsi ọvbehe ọre ọ gha ha osa mẹ, ne a wa kha wẹ, mẹ kegha do iran emwi hẹ, ne I ya gha ye uwa obọ.

⁹ Ẹghẹ ne I na gha rre ehe ne uwa ye, a deghẹ igho i gue mwẹ, I ma vbe ya ye uwa egbe, rhunmwuda, etẹn ni ke Masidonia rre viọ emwi ne I i te mwẹ hia gun mwẹ. Zẹ vbe ne I ka ru ẹe, vbe ẹghẹ ne ọ gberra, erriọ I ra ye gha ru ẹe vbe ẹghẹ ne a ọ dee. I i ra kun enegbe mwẹ yan uwa.

¹⁰ Vbe ekpa ẹmwata Kristi ne ọ rre uwu imẹ, I ta ẹe wẹ orhiọnkpa nẹ ọ gha gbe eta orhuọ na yọmwẹ unu, ẹ i rre otọe Gris, vbe ehe ne ọ sẹe kevbe ehe ne ọ rhanmwẹ.

¹¹ Vbe ọ ya mwẹ ta ẹmwẹ na yi? Rhunmwuda ighẹ I i ho ẹmwẹ uwa nọ ra? Osanobua rẹnrẹn ighẹ I ho ẹmwẹ uwa.

¹² I gha wa gha ru ẹe khian vbene I ru ẹe na, ne I miẹn ehe ne dobọ ẹre yi, ighẹ emwi nii ne avbe “Ukọ” nekpa nii, gha te miẹn ya gha rhuọ wẹ, vbe ne ima ya winna ẹre iran vbe ya winna.

¹³ Avbe emwa ni i re ukọ ne ukọ, ukọ ohoghe iran khin, iran ni vbe ta ohoghe ye iwinna iran, iran ghi fi egbe werriẹ, ne iran ba do ye vbe ukọ ne ukọ ọghe Kristi.

¹⁴ Ọsughe i re emwa hiehiere, uhin ighẹ Setan tobọ ẹre sẹtin fi egbe werriẹ do gha ye vbe odibosa uwanmwẹ.

¹⁵ Rhunmwuda ọnii, ẹ i re ogiemwi hiehiere, a deghẹ, avbe eguọmwadia ẹre fi egbe werriẹ do gha ye vbe avbe eguọmwadia ẹmwata. Vbe okiekie iran gha miẹn emwi ne ọ ma iran ye avbe emwi ne iran ru na.

Oya Ne Pọl Re Zẹ Vbe Ukọ

¹⁶ I vbe dọlegbe tae, ọmwa rhọkpa ghẹ tie mwẹ akpa o, sokpan, a deghẹ u tie mwẹ akpa, u ghi vbe rhan obọ miẹn mwẹ zẹ vbe akpa, vbene I gha na miẹn emwi ya rhuọ kherhe.

¹⁷ Sokpan ẹmwẹ ne I ra guan na, ẹ i re egbe ẹmwẹ ne Nọyaẹnmwa gha te wẹ ne I guan, vbe nọ dekaẹn ẹmwẹ orhuọ ne a rhuọ na, te I wa guan vbe akpa.

¹⁸ Sokpan vbene a ghi na miẹn wẹ, emwa ni ye ẹmwẹ emwa ne agbọn na kẹkan rhuọ bun sẹ vberriọ, mẹ gha vbe rhuọ.

¹⁹ Wa tobọ uwa keghi waan ẹsẹse, ọnii ọ si ẹe ne uwa na ye oghọghọ rhie otọ ne avbe akpa.

²⁰ Wa gha wa rhie otọ ne ọmwa ne ọ ye uwa khian ọviẹn, ra ne ọ gbe uwa rhu, ne ọ khuẹn ifi mu uwa, ne ọ ma tie uwa ọmwa, ra ne ọ so ubi ye uwa aro.

²¹ Ekhue wa mu mwẹ vbe I ta ẹe. Ma ma din sẹ ne ọ gha ru vberriọ! Sokpan deghẹ ọmwaikọmwa wẹ rẹn mwẹ emwi ne ọ gha ya rhuọ, te I guan vbe ọmwẹmwẹ na, mẹ wa vbe mwẹ nii gha ya rhuọ vberriọ zẹẹ.

²² Ivbi e Hibru iran khin ra? Ọ re imẹ vbe khin. Ivbi Izrẹl iran khin ra? Ọ re imẹ vbe khin. Ivbi uniẹn Ebraham iran khin ra, ọ re imẹ vbe khin.

²³ Eguọmwadia Kristi iran khin ra? Ẹmwẹ mwẹ khọ ọghe ọmwẹmwẹ sokpan mẹ ru ọguọmwadia sẹ iran. Obọ mwẹ da iwinna sẹ iran. I yo eghan ẹghẹ ni bun sẹ iran, a gbe mwẹ asan sẹ iran ẹsẹse, me ọ he rhie owẹ ye agbanmwẹ idin sẹ iran.

²⁴ Igba isẹn avbe Ju he gbe mwẹ asan ọkpairrọvbiyeva.

²⁵ Igba eha ọre emwa Rom gbe mwẹ asan, a filo okuta gbe mwẹ uhukpa, igba eha ọre okọ he ni mwẹ, vbe ẹghẹ ọkpa, ẹgogo enẹyan-ugie ọre I yae vbe uwu amẹ.

²⁶ Vbe okhian ni bun ni yo, I rhie uhunmwu mwẹ atataobọ vbe ẹzẹ ne ọ rro kevbe vbe obọ avbe izigan, vbe obọ avbe Ju ne iho mwa, kevbe avbe iran ne ẹ i re Ju, I rhie uhunmwu da ẹbe vbe adesẹ ore ẹvbo, ẹbe vbe otọe oha, ẹbe vbe ẹzẹ, ẹbe vbe obọ avbe ọse ne akọn giẹ.

²⁷ I winnaẹn, I miẹn ẹsọn, ẹghẹ ọrhẹnrhẹn ọre I na ma ye aro kan ovbe, ohanmwẹ gbe mwẹ, ohanmwẹ vbe gbe mwẹ, ẹghẹ ni bun ọre evbare ma ya sẹ mẹ, vbe ne I i na miẹn ehe rhie uhunmwu lẹre yi, I i miẹn ukpọn rhie rhuan.

²⁸ Ne a ghẹ ghi zẹdẹ ye unu kan emwi nekpa hia, ẹdẹgbegbe, a i ghi miẹn ẹghẹ ne orhiọn mwẹ ya sẹ otọ ba ẹmwẹ ne i na si osi ye ẹmwẹ esọsi hia.

²⁹ A gha miẹn ne ọ ma wo vbe egbe, me ghi vbe khian ne ọ ma wo vbe egbe, ọmwa gha de ye orukhọ, akhiẹ ghi gba imẹ ẹko.

³⁰ I gha wẹ ne I gele rhuọ, avbe emwi ne ọ rhie maa vbe ne I vburriẹ sẹ hẹ, ọre I gha ya rhuọ.

³¹ Osanobua ne Erha Nọyaẹnmwa Jesu Kristi — afiangbe nọ ne eni ẹnrẹn ẹdẹdẹmwẹdẹ rẹn wẹ ẹ i re ohoghe I tae.

³² Ẹghẹ ne I na gha rre Damaskọs, enọkhaemwisẹ vbe ototọ Aretas ne ọba, keghi gie emwa ya gha khẹ onurho ẹvbo nii wẹ ne iran mu mwẹ.

³³ Sokpan, a keghi mu mwẹ ye agban mu la uvun ekẹn fi otọ, I na ghi lẹ fe vbe obọ ẹre.