II Kọrinti 10 - Edo Bible (E Baibol Ẹdo) Version 1996

Pọl Zẹ Ne Unu Egbe Ẹre

¹ Mẹ ne Pọl wa tobọ mwẹ rinmwian uwa, mẹ ne a wẹ re I gha gu ọmwa mudia, I ghi gha re ọmẹhẹ, sokpan I gha kpao vbe ehe ne uwa ye rre nẹ, I ghi gha khọ mu uwa, I ye ufumwẹ kevbe itohan Kristi rinmwian uwa.

² Wa ghẹ ya mwẹ khọ mu uwa vbe I gha rre, rhunmwuda, mẹ rẹnrẹn ighẹ I gha sẹtin khọ mu iran ni kha re ighẹ iro ẹmwẹ agbọn na ọre I ya ru emwi.

³ Ẹmwata nọ wẹ ma rre agbọn na, sokpan ẹ i re iro ẹmwẹ agbọn ma ya gbinna.

⁴ Emwi igbinna ne ima ya gbinna, ẹ i re emwi igbinna ọghe agbọn na, vbe ẹ i re emwi igbinna ne ọ wo vbe egbe ọghe Osanobua ne a ya guọghọ ehe ne wo vbe egbe. Ma rẹnkhẹn imua ẹmwẹ ohoghe.

⁵ Ma guọghọ ẹe sẹ otọ ighẹ emwi idobo ọghe uhiomwẹ ne emwa mu ye odẹ irẹnmwi Osanobua, ma munọ iro ekhọe hia oghunmwu, a na ye iran uhunmwu rhanmwẹ otọ ne Kristi.

⁶ Ugbẹn vbe uwa ghi rhie maa nẹ nian fẹẹrẹ ighẹ wa i re etẹ, te ima ghẹ ghi rri uyinmwẹ isọtẹ hia oya.

⁷ Vbene emwi hia ye vbe ikinnegbe ọre uwa ghe. Arhiọnkpa rrọ vbe uwu uwa, ne ọ ka egbe ẹre ye ọghe Kristi ra? Wẹ ne ọ dọlegbe mu ẹmwẹ enegbe ẹre roro, rhunmwuda vbene irẹn re ọghe Kristi ọre ima vbe re ọre.

⁸ Rhunmwuda, ekhue i ra mu mwẹ adeghẹ mẹ kue ya ẹe rhuọ gbe, ighẹ asẹ ne Nọyaẹnmwa rhie ne ima, asẹ ne a rhie ne ima ya ye uwa digiẹ ighẹ ẹ i re ne a ya dunmwu uwa sẹ otọ.

⁹ I ma ho ne ọ gha ye vbe wẹ te I ghi ra do gha ye ebe ne I gbẹnnẹ runran uwa.

¹⁰ Emwa eso gha kha wẹẹ, “Ebe ne Pọl gbẹnnẹ khua, ọ keghi vbe wo vbe egbe, sokpan ọ gha gu ọmwa mudia, ọ ghi ye vburriẹ, ẹmwẹ ọnrẹn i vbe gbe emwi.”

¹¹ Ọ kere ne emwa vberriọ rẹn wẹ alughaẹn i rrọ ne ebe ne ima gbẹn kevbe emwi ne ima gha ru vbe ima a sẹ ehe ne uwa ye vbe evba.

¹² Ọ rhe ye rriọ, ohan i gie ima mwamwa egbe mwa ye ukpo, ra ne ima gha ye egbe gie iran ni tọn egbe iran mu gelete. Iran kọẹn! Iran ọre ọ tobọ iran fian omwa ne iran gha ya gha mwa egbe, owẹ ne iran tobọ iran zẹ vbe otọ ọre iran vbe ya mwa vbene iran sẹ hẹ.

¹³ Zẹ vbe ọghomwa, orhuọ ima i ra gberra omwa, omwa ako iwinna ne Osanobua wa ne ima, ọre ọ ra gha ye, uwu ẹre ni ọre iwinna ne ima winnaẹn vbe uwu uwa vbe ye.

¹⁴ Vbene a ghi na miẹn wẹ uwu ẹkpo nii ọre uwa ye, ma ma fian uwu rra vbe ima rhie Iyẹn Ne ọ maa vbe ekpa Kristi bu uwa gha dee.

¹⁵ Rhunmwuda ọnii, ma i ye iwinna ne emwa ọvbehe winnaẹn gberra okhuo ne Osanobua fian ne ima rhuọ, sokpan idaehọ mwa nọ wẹ ne iyayi uwa gha wan yọ, ne ima sẹtin miotọ na winna iwinna ni sẹ enena vbe uwu ẹbu uwa, vbe uwu ehe ne Osanobua mwa rẹn ne ima sẹ.

¹⁶ Ẹghẹ nii, ma ghi miotọ na ya kpe orhu nene Iyẹn Ne ọ maa vbe ẹvbo ọvbehe gberra ehe ne uwa ye, ne ima ghẹ gha ye iwinna ne a winnaẹn nẹ vbe otọe ọmwa ọvbehe rhuọ.

¹⁷ Sokpan zẹ vbene ebe kha re, “Ọmwaikọmwa ne ọ ho ne ọ gha rhuọ, wẹ ne ọ gha ye iwinna ne Nọyaẹnmwa winnaẹn rhuọ.”

¹⁸ Rhunmwuda, ọmwa ne Nọyaẹnmwa ka ẹe ye ne ọ maa ọre a ka ye ne ọ gbe ẹse, ighẹ ẹ i re ne ọ ye unu ẹnrẹn ka egbe ẹre ye ọmwa ne ọ maa.