II Kọrinti 1 - Edo Bible (E Baibol Ẹdo) Version 1996

¹ E Pọl ne ukọ vbene Osanobua ho ẹre yi, kevbe ọtẹn mwa ighẹ Timoti, ọre ọ gbẹn ebe na, gie esọsi Osanobua ne ọ rre Kọrinti kevbe emwa Osanobua hia ni rre Gris.

² Te Osanobua ne Erha mwa kevbe Nọyaẹnmwa Jesu gha rhie ẹsọhẹ kevbe ọfumwegbe ne uwa.

E Pọl Kpọnmwẹ Osanobua

³ Wa gie ima kpọnmwẹ Osanobua kevbe Erha Nọyaẹnmwa Jesu Kristi, Erha ne ọ mwẹ itohan kevbe Osanobua ne iyobọ hia ke obọ ẹre rre.

⁴ Rẹn ọre ọ ye ima obọ vbe uwu ọlọghọmwa mwa hia, ne ima sẹtin gha ye avbe emwa hia ni ghi rre uwu ọlọghọmwa ughughan hia obọ, vbe ekpa ne a na lo egbe iyobọ ni ne ima vbe miẹn vbe obọ Osanobua.

⁵ Zẹ vbene ima vbe mwẹ oghae vbe uwu oya ni bun ne Kristi re hia, erriọ zẹ, ma vbe la ekpa Kristi ghae vbe uwu iyobọ ọre nọkhua.

⁶ Deghẹ ma rri oya, rhunmwuda iyobọ kevbe imiẹnfan uwa nọ, a deghẹ a ye ima obọ, evba ọre a na vbe ye uwa obọ, a kevbe rhie ẹtin ne uwa ne uwa sẹtin gha ya i ziengbe ya egbe miẹn oya, egbe ne ima vbe ya egbe miẹn.

⁷ Ẹghẹ ọkpa i rrọ ne ima ya gbe awẹawẹ ye ẹtin ne ima mu yan uwa, ma rẹnrẹn wẹ, zẹ vbene uwa vbe ghae vbe oya ne ima re, erriọ wa vbe ghae vbe iyobọ ne ọ sẹ ima obọ.

⁸ Etẹn mwẹ, ma ho ne ima ye uwa ẹre rre ighẹ ẹmwẹ ọlọghọmwa ne ima miẹn vbe otọe Esia, ihẹ ne a kun yan mwa keghi bun sẹrriọ, ọ keghi vbe khua sẹrriọ wẹ, ma keghi rhie aro hin rre ighẹ ima gha miẹn uhunmwu.

⁹ Ọ keghi ye ima vbene a miẹn wẹ, a ta ẹe nẹ wẹ ne a gbele ima uan. Sokpan te ọ na sunu ne a ya ma ima emwi wẹ ne ima ghẹ gha mu ẹtin yan egbe mwa vbe ẹ i re Osanobua ọkpa, ne ọ huẹn orinmwi kpaegbe.

¹⁰ Rẹn keghi miẹn mwa fan, ma wa mu ẹtin yan rẹn ighẹ ọ gha ye vbe dọlegbe miẹn mwa fan.

¹¹ Vbene uwa na ya erhunmwu uwa ye ima obọ, ọ re a gha na miẹn wẹ, a gha họn erhunmwu ni bun ne a na ne ima, Osanobua gha vbe fiangbe ima, emwa ni bun ghi tọn urhu mu ya kpọnmwẹ ọẹn ne ima.

Afiwerriẹ Vbe Emwamwa E Pọl

¹² Emwi ne ima ya ghagha ọ na khin: ekhọe mwa tama mwa wẹ, uyinmwẹ mwa vbe agbọn na, ibiba vbe ne ima vbe uwa gba ya ye egbe khian hẹ, a ta ẹmwata kevbe a i zẹ ibeleku ọrọre okpo ne ọ da ẹe yi, vbe ekpa ẹtin ẹsọhẹ Osanobua nọ, ighẹ ẹ i re vbe ekpa iguemwi emwa ne agbọn.

¹³ Emwi ne uwa gha sẹtin tie, wa ghi vbe rẹn emwi ne a ya ẹe kha ọkpa, ọre ima gbẹn gie uwa. Ma mwẹ idaehọ ighẹ wa gha do rẹn emwi ne a ya ẹe kha fẹẹrẹ ighẹ,

¹⁴ avbe emwi ne uwa rẹn otọ ẹre kherhe kherhe ẹghẹ na. Ne a miẹn wẹ ọ gha ghi sẹ ẹdẹ Nọyaẹnmwa Jesu, wa ghi gha ya ima ghan zẹ vbe ne ima vbe ya uwa ghan.

¹⁵ Emwi na mu mwẹ ekhọe sẹrriọ ne I na tae vbe ẹghẹ okaro wẹ, I gha do miẹn uwa aro, ne a miẹn ehe na fiangbe uwa igba eva.

¹⁶ I keghi te mwamwa ẹẹn ne I do miẹn uwa aro vbe I a gha rrie Masidonia kevbe I a gha ke ọe dee, ne uwa miẹn ehe na ru iyobọ mẹ vbe okhian ne I khian rrie Judia.

¹⁷ Vbene I te mwamwa ẹn na, ọ khọ ọghe ọmwa ne ẹ i sẹtin mu emwi guọbọ ra? Vbene I mwamwa emwi na, wa yayi ighẹ ọghe nọ rẹn ọghọe ọkpa nọ ra, ne I gha na sẹtin gha ya unu ọkpa ni tie “Ẹn” kevbe “Ẹn o.”

¹⁸ Vbe ẹmwata Osanobua, emwi ne I yan ma uwa i re ọghe “Ẹn” kevbe “Ẹn o.”

¹⁹ Rhunmwuda, Jesu Kristi, ne Ovbi Osanobua ne Timoti Sailas kevbe imẹ kpe orhu ẹre ma uwa, ẹ i re ọmwa nọ re “Ẹn” kevbe “Ẹn o.” Sokpan rẹn ọrọre “Erriọ nọ” ọghe Osanobua.

²⁰ Rhunmwuda rẹn ọrọre “Erriọ nọ” ye emwi hia ne Osanobua yan eyan rẹn. Ọnii ọre ọ zẹẹ ne ima na la ekpa Jesu Kristi gbe “Isẹ” ne uyi ọghe Osanobua.

²¹ Rhunmwuda Osanobua tobọ ẹre ọre ọ gie aro mwa dae deba uwa ighẹ arrọọ ne ima mwẹ vbe uwu Kristi. Osanobua tobọ ẹre ọre ọ hannọ ima ye efẹn ọkpa.

²² Ọ na tobọ ẹre rhie ama ọghe mẹ ọre ọ yan rẹn ọghọe, ye ima egbe, ọ keghi vbe rhie Orhiọn Ne Ọ Huanrẹn ye ima ekhọe ne aro mwa ya dae wẹ, ẹmwata nọ ighẹ emwi ne ọ ra hẹ ne ima.

²³ Osanobua ọre I rhie ye osẹe mwẹ, ọ rẹn vbene ekhọe mwẹ ye hẹ, Ne a ghẹ miẹn ehe na rri uwa oya, ọre ọ zẹe ne I ma na ghi rrie Kọrinti.

²⁴ Ẹ i re te ima tae ye uwa obọ wẹ, ghe emwi ne uwa gha yayi, rhunmwuda wa tobọ uwa mudia nẹ gbain vbe uwu iyayi, sokpan te ima deba uwa winna ne ọyẹnmwẹ uwa.