Hozia 4 - Edo Bible (E Baibol Ẹdo) Version 1996

Ẹzọ Ne Nọyaẹnmwa Gu Izrẹl Gui

¹ E Nọyaẹnmwa mwẹ ẹzọ ne ọ gu emwa ni rre otọe na gui. Izrẹl, danmwehọ vbe ne ọ kha hẹ, “Uyinmwẹ esi ra aho ẹmwẹ ọmwa i zẹdẹ rre otọe nii, avbe emwa nii, ma vbe tie mwẹ Osanobua.

² Iran gha yan eyan, iran i yae ru emwi, iran ta ohoghe, iran de izigha, iran rhaa, iran vbe ghẹẹ. Aghẹru wa biẹ yọ, izigha ne a de emwa ẹre ghi gha degbe egbe.

³ Rhunmwuda ọnii, otọe nii gha kakaa, emwi hia ni rrọọ gha vbe wulo. Avbe aranmwẹ oha hia, kevbe avbe ahianmwẹ kevbe avbe ehẹn, ehia gha wulo.”

E Nọyaẹnmwa Baa Avbe Ohẹn Ifi Ẹzọ

⁴ E Nọyaẹnmwa khare wẹẹ, “Ọmwa ikọmwa ghẹ ba avbe emwa nii ifi ẹzọ ra ne ọ talọ ku iran, emwa ne I gu gui ọrọre uwa ne avbe ohẹn.

⁵ Asọn kevbe avan ọ re uwa ya yin uyinmwẹ akpa, avbe akhasẹ ma vbe maa sẹ uwa. I ra do fuẹn ọnrẹn uan ighe Izrẹl ne iye uwa.

⁶ Ọghe avbe emwa mwẹ fo nẹ, rhunmwuda, iran ma tie mwẹ ọghe iran. Wa ne avbe ohẹn ma tie mwẹ ọghe uwa, wa keghi he iruẹmwi mwẹ yotọ, rhunmwuda ọnii, mẹ vbe he uwa, mẹ i ghi ra vbe tie ivbi uwa ohẹn mwẹ.

⁷ “Vbene uwa ne avbe ohẹn ya bun yọ, erriọ ọ re uwa vbe ya ru orukhọ ghe mwẹ sayọ rhunmwuda ọnii, I gha ye ọghọ ne ọ te rre uwa egbe khian efaa.

⁸ Orukhọ ne avbe emwa mwẹ ru ọ re uwa ya họn ẹfe, rhunmwuda ọnii, te uwa ghi ho ne iran kakabọ gha ru orukhọ yọ.

⁹ “Oya ne a gha rri emwa ni re ọ re a gha vbe rri uwa ẹre! I gha rri uwa oya, I ghi vbe ru ẹe ne uwa ha osa emwi dan ne uwa ru.

¹⁰ Wa gha rri oghae ne ọ kan uwa vbe emwi ne a ya zọ ese, ohanmwẹ ghi ye gha gbe uwa. Wa gha ga avbe ẹbọ ni rhie ọmọ rre, sevba wa i ra ye miẹn ọmọ biẹ, rhunmwuda, wa fi iyeke gbe mwẹ, wa keghi ya gha gho ẹbọ ọvbehe.”

E Nọyaẹnmwa Wẹ Ẹbọ Ne A Ga I Maa

¹¹ E Nọyaẹnmwa khare wẹẹ, “Ayọn ne ọ wegbe kevbe ne ọ khuẹrhẹ ya emwa khian akpa nẹ.

¹² Iran ghi ya gha nọ ike erhan wẹ ne ọ ta enegbe iran ma iran. Ọkperhan ọ re ọ ghi tama iran emwi ne iran ho ne iran rẹn. Iran sẹ mwẹ rae nẹ, zẹ vbe okhuo ne ọ khian igberagia. Iran rhie egbe iran ne avbe ẹbọ ọvbehe.

¹³ Iran zọ ese vbe ehe ne iran na gho iran vbe uhunmwu oke nekhua. Iran keghi vbe giẹn eturari vbe uhunmwu oke negiẹrẹ, vbe ototọ avbe erhan ni taẹn kevbe ni zẹlẹ abọ ẹsẹse, rhunmwuda, irhu iran wa fu ọmwa egbe ẹsẹse. “Rhunmwuda ọnii, avbe ivbi uwa nikhuo gha gbe ebabotu, kevbe ivbi amwẹ uwa nikhuo gha vbe ru oghẹ.

¹⁴ Sevba, mẹ i ra rri iran oya ye emwi na, rhunmwuda, wa tobọ uwa vbe munọ avbe ebabotu aroẹbọ, wa vbe iran ọ re ọ gba zọ ese iran ni ga ẹbọ. Zẹ vbene a yae kpa itan wẹẹ, ‘Emwa nii i mwẹ ẹwaẹn, te iran ra fuan.’

¹⁵ “A gha rhe miẹn wẹ wa ne ivbi Izrẹl ma guobọ mwẹ, a i gha miẹn egbọre vbe obọ e Juda. Wa ghẹ ghi ga vbe Bẹtẹl ra Gilgal ra ne uwa ye gha ya eni e Nọyaẹnmwa ne ọ rrọ yan eyan vbe evba.

¹⁶ Te ivbi Izrẹl wa zevbudu zẹ vbe avbe ekhuia. Vbe imẹ a ghi ra na gha koko iran vbe uwu irhu hẹ zẹ vbe ivbi ohuan?

¹⁷ Ekanse ọghe ẹbọ ọ re ọ mu ivbi Izrẹl na. Wa gie iran gha ru ọghe iran khian.

¹⁸ Iran ghẹ ghi da ayọn nẹ ẹsẹse, ẹmwẹ ebabotu ne iran gbe ọ re ọ ghi rre iran aro, ifaegbe ua ghi yẹ iran sẹẹ ọghọ.

¹⁹ Iran gha kpolo iran gha rrie zẹ vbene ẹhoho ru, ẹmwẹ ese emwa ni ga ẹbọ ne iran zọ ghi do gha mu iran ekhue.