Hagai 1 - Edo Bible (E Baibol Ẹdo) Version 1996

E Nọyaẹnmwa Wẹ Ne A Dọlọ Ọgua Osa Bọ

¹ Vbe ukpo ne ogieva ne Dariọs ya gha re ọgbaisi e Pẹsia, vbe ikpẹdẹ ne okaro ọghe uki ne ogiehan, e Nọyaẹnmwa keghi giee Hagai ne akhasẹ uhunmwu rre, ọmwa ne a giee uhunmwu na gie kegha re e gọvina ọghe Juda ighe e Zerubabẹl ne ovbi Siatiẹl, kevbe ogiohẹn ighe Jọsua ne ovbi e Jehozadak.

² E Nọyaẹnmwa ne Oghodua keghi tama e Hagai wẹẹ, “Iran na ta ẹe khian we ẹghẹ na ma kei yọ ne a gha ya bọ Ọgua Osa.”

³ E Nọyaẹnmwa keghi rhunmwuda ọnii giee Hagai ne akhasẹ uhunmwu na gie emwa ni, wẹẹ,

⁴ “Wa ne emwa mwẹ, vbọzẹ ne uwa gha na gha rre owa ne a bọlọe ẹsẹse vbe Ọgua Osa mwẹ re itowa?

⁵ Wa ma miẹn emwi ne ọ ru uwa nian?

⁶ Wa kọ ọka ọrhẹnrhẹn, sokpan ekherhe wa miẹn fian. Wa miẹn evbare gha re sokpan ẹ i vuọn uwa ẹko. Wa miẹn ayọn gha da, sokpan ọ ma sẹ ọkẹn sẹ ne ọ gha gbe uwa. Wa mwẹ ukpọn, sokpan, ẹ i gbe uwa oni. Ọmwa ne ọ winna, igho ne ọ miẹn i sẹ ọe ya koko egbe.

⁷ Wa miẹn emwi ne ọ sii ẹe ne ọna na sunu?

⁸ Banbanna nian, wa hin uhunmwu oke wa ya va erhan, ne uwa dọlegbe bọ Ọgua Osa. Ẹghẹ nii, ẹko gha rhiẹnrhiẹn mwẹ, a ghi vbe gha ga mwẹ zẹ vbene ọ kere ne a gha ga mwẹ.

⁹ “Emwiorhọ ọrhẹnrhẹn ọ re uwa te rhie aro yi, sokpan, a keghi do miẹn wẹ ekherhe ọ re nọ. Wa ghi vbe viọ nene emwiorhọ sẹ owa nẹ, I keghi ya ẹhoho kpolo ẹe kua. Vbọzẹ ne I na ru ẹe vberriọ? Rhunmwuda, edọmwadẹ ọghe ọe gha khọn bọlọ owa iran, vbe Ọgua Osa mwẹ ye re itowa.

¹⁰ Ọnii ọ re ọ sii ẹe ne amẹ i na rhọ, emwiokọ i vbe zọ.

¹¹ “I gie amẹ nọkhua mu vbe otọe nii, vbe uhunmwu oke ẹre, ohọka ẹre, ogba aranmwẹ oha, kevbe emwi hia ne a ghi miẹn rhọ ẹre emwiokọ vbe otọ.”

¹² Ẹre Zerubabẹl kevbe Jọsua kevbe avbe emwa hia ni ke iwe vbe Babilọn rre, na ru zẹ vbene Nọyaẹnmwa ne Osanobua iran tama iran. Ohan mu iran, iran keghi gha họn ẹmwẹ ne Hagai ne akhasẹ ne odibo e Nọyaẹnmwa.

¹³ Ẹre Hagai na ta uhunmwu ne Nọyaẹnmwa gie ma emwa nii wẹẹ, “I gha gu uwa gha rrọọ, eyan ne I yan rẹn ọ re ọnii khin.”

¹⁴ E Nọyaẹnmwa keghi rhie igiẹdu ne emwa nii ne iran ya winna vbe Ọgua Osa, avbe Zerubabẹl ne e gọvina e Juda, e Jọsua ne Ogie Ohẹn, kevbe avbe emwa ni ke iwe rre hia. Iran keghi suẹn gha winna vbe Ọgua Osa ọghe Nọyaẹnmwa ne Oghodua ne Osanobua iran.

¹⁵ Vbe ikpẹdẹ eneyanugie vbe uki ne ogiehan, vbe ukpo ne ogieva ne Dariọs ya gha re ọgbaisi.