Habakọk 3 - Edo Bible (E Baibol Ẹdo) Version 1996

Erhunmwu E Habakọk

¹ Erhunmwu ne Habakọk ne akhasẹ naẹn ọ re ọna khin:

² E Nọyaẹnmwa, I họọn emwi ne u ru, ohan wa mu mwẹ. Banbanna nian, vbe ru vbe ẹghẹ ima, avbe emwi nikpọlọ ne u te ka ru ẹkpo nẹdẹ. Ye vbe mwẹ itohan a gha rhe wẹ te ohu mu ẹẹn.

³ Osanobua dọlegbe ke Idọm dee, Osanobua ke oke Paran nọhuanrẹn dee. Ose ẹre gba ẹrinmwi fo, agbọn kevbe vuọn ne urhomwẹ ọnrẹn.

⁴ Ọ dee ke ẹe kevbe awanwan ayan, ayan yan ladian vbe obọ ẹre, evba nii ọrọre ehe ne a rhie ẹtin ẹnrẹn lẹre yi.

⁵ Ọ gie emianmwẹ ke odaro irẹn ọ na wẹ ne uwu lele irẹn iyeke.

⁶ Ọ gha demudia agbọn ghi mu rueghe; ọ gha fi aro rre, avbe uhunmwu ẹvbo ghi gha guọ zẹzẹzẹ. A zanzan avbe oke ẹrẹkhẹrẹ ua avbe oke etẹbitẹ kpero la uwu otọ, avbe oke ne irẹn nanaẹn ẹkpo nẹdẹ.

⁷ I miẹn vbe ohan mu ivbi e Kusian avbe ivbi e Midian gha guọ.

⁸ Avbe ẹzẹ ọ re ọ ya ohu mu ẹẹn ra Nọyaẹnmwa? Avbe okun ọ re ọ gie ohu kakabọ mu ẹẹn ra? Uhunmwu okuku amẹ ọ re uwẹ hin la khian; okuku amẹ okpẹhoho ọrọre ikẹkẹ okuo ruẹ, u keghi rhie akhọnmiotọ gie emwa ruẹn.

⁹ U mu egbe ne u gha lo uhanbọ ruẹ, u mu egbe ne u filo ifẹnmwẹ ruẹn. Ayan ruẹn valọ agbọn ye otọ.

¹⁰ Ugbẹn vbe avbe oke nekhua bẹghe ruẹ, iran kegha guọ zẹzẹzẹ, amẹ keghi ke iso hihiẹ rre. Amẹ ne ọ rre ototọ otọ vannọ ọẹn, ubi mwẹ amẹ ọnrẹn keghi hue ẹsẹse.

¹¹ Ugbẹn vbe ifẹnmwẹ ruẹn tin khian ọ filo usanna kua, deba umozo ruẹ ne ọ de wainwain, uki kevbe owẹn keghi mudia hiii.

¹² U khian la agbọn, u fian ẹn rra vbe ohu ruẹ, vbe ohu ruẹ nọkhua, u ya owẹ rrilo avbe uhunmwu ẹvbo mu otọ.

¹³ U ladian ya miẹn emwa ruẹn fan, u ya miẹn ọba ruẹ ne u hannọzẹ fan u kinmwiin ọkaolotu emwa dan fi otọ u keghi fuẹn irogho ẹre hia fẹẹrẹ.

¹⁴ Ifẹnmwẹ ruẹn saa arowa nọkhua ivbiyokuo ẹre, vbe ẹghẹ ne iran na rre zẹ vbe okpẹhoho ne iran do zagha ima an, ne iran na vbe giẹ ogie ọkhọ, zẹ vbe ọmwa ne ọ hẹko wọ ovbiogue uhunmwu.

¹⁵ U ya avbe ẹsin ruẹn rrilo okun mu otọ, amẹ nekhua nii kegha hu.

¹⁶ I họn emwi na hia I kegha guọ, aranmwẹ mwẹ kegha guọ ne ohan. I zegbe zẹ mwẹ ye otọ owẹ mwẹ kegha mian gbẹghẹgbẹghẹ. I gha hẹko ziengbe khẹ ẹghẹ ne Ọ dee, ne Osanobua gha na rri iran oya ighe iran ni gunmwa gbinna.

¹⁷ A gha rhe miẹn ighẹ avbe erhan ohọ i mwẹ ọmọ, kevbe wẹ alimo ayọn i rre uhunmwu erhan azara, a gha rhe miẹn wẹ oliv ma maa, I ghẹ ugbo ma maa ọka, a gha rhe miẹn wẹ avbe ohuan hia wulo, i ghẹ ẹmila rhọkpa i rre irhu.

¹⁸ Te I gha ye gha sẹ ọyẹnmwẹ rhunmwuda Nọyaẹnmwa Osanobua, ọrọre ọmiọnmwafan mwẹ.

¹⁹ E Nọyaẹnmwa ne Udazi rhie iwegbe mẹ. Ọ ya owẹ mwẹ wo ye ulẹ zẹ vbe ẹrhuẹ; ọ keghi ya mwẹ di avbe oke nekhua ya, vbe a i mwẹ ẹbe.