Habakọk 2 - Edo Bible (E Baibol Ẹdo) Version 1996

Ewanniẹn Ne Nọyaẹnmwa Rhie Ne Habakọk

¹ I gha hin owa ọkhẹ mwẹ ne I ghe ẹmwẹ ne Nọyaẹnmwa gha tama mwẹ ne I ta kevbe ewanniẹn ne ọ gha rhie ye ẹzọ ne I gui.

² E Nọyaẹnmwa keghi wanniẹn mwẹ ẹmwẹ vbenian wẹẹ, “Emwi ne I rhie ma ruẹn, gbẹnnẹ ọẹn ẹse ye uhanhan vbene ọ gha na wa gie a gha tie ọwarọkpa.

³ Gbẹnnẹ ọẹn ye otọ rhunmwuda, ọ ma he sẹ ẹghẹ ne ọ gha ya sunu. Sokpan ẹghẹ nii dee ẹgiẹgiẹ, emwi ne I mu ma ruẹn na, te ọ gha sunu. Ọ sẹtin yevbe ne okhian i kẹ ọre vbene ọ ya dee hẹ, sokpan, ziengbe diakhẹ ọre, ẹ i mwẹ ọ ma sunu, ẹ i ra vbe kpẹe.

⁴ Nene uhunmwu ne a gie ọ re ọna khin: ‘Iran ni re emwa dan i ra miẹn uhunmwu, sokpan ni re ẹmwata gha di agbọn ya rhunmwuda iran mudia ke Osanobua.’ ”

Ọfuan Emwa Dan

⁵ Emwi ne ọ rẹrẹ ọmwa ọ re ẹfe khin. Emwa ne ẹho tọlọ, te iran tọn egbe mu, ekhọe iran i vbe sẹ otọ, zẹ vbene uwu tobọ ẹre ye, ne ẹko i na vuọn ẹẹn, erriọ, ẹko i vbe vuọn iran. Ọnii ọ si ẹe ne iran na khọn ẹvbo yan ẹvbo mu ne egbe iran.

⁶ Emwa ne a khọn miẹn ẹre otọ gha zan iran, iran ghi vbe gha mu ohu iran. Iran ghi kha wẹẹ: “Wa viọ emwi ne ẹ i re ọghe uwa, sokpan, ọghe uwa fo! Vbe ọ gha kpee sẹhẹ, ne uwa gha khiẹn iran ni rri uwa osa obọ wẹ ne iran ha osa, ne uwa ya si ẹfe koko ne egbe uwa!”

⁷ Sokpan, vbene uwa te do rẹn, wa ni khọn emwa ọvbehe mu otọ, wa gha khian ọkaruosa, a ghi vbe khiẹn uwa obọ ne uwa gha ha igho isu yọ. Eghian gha rre, iran ghi gha ya uwa guọ zẹzẹzẹ. Iran gha fu uwa emwi hẹ.

⁸ Ẹ i re avbiẹ emwa ẹvbo nibun ọ re uwa he fu ẹre emwi viọ sokpan, banbanna nian, iran ni miẹn uhunmwu vbọ gha vbe do fu uwa emwi viọ rhunmwuda izigha ne uwa de kevbe rhunmwuda uyinmwẹ ika ne uwa yin ghe agbọn kevbe avbe okpẹvbo ni rrọ.

⁹ Ọghe uwa fo! Emwi ne uwa ya uyinmwẹ ika gbe emwa miẹn iran re, ọ re uwa ya họn ẹfe, ne ẹgbẹe uwa, wa keghi vbe gha ho ne owa uwa gha rrọ vbene ẹ i mwẹ ẹbe ra ikuangbe!

¹⁰ Sokpan, uma ne uwa si si efa ye ẹgbẹe uwa egbe nẹ. Rhunmwuda, ne uwa na dunmwu uhunmwu ẹvbo ni bun uan, te uwa si ọfuan ye egbe uwa egbe.

¹¹ Uhin ya sẹ egbe okuta ni rre ekẹn ne a gbe lẹga ẹvbo, te iran ye eve ba uwa ifi ẹzọ, avbe ehe ni rẹnkhẹn uan vbọ ghi vbe mu go.

¹² Ọghe uwa fo! Wa ye a i ghẹru bu ẹvbo, wa keghi ya izigha bọ ẹe.

¹³ Avbe ẹvbo ne uwa khọn mu gha rri ororo rhunmwuda iwinna ẹhorriẹ ne uwa ya iran winna, emwi hia ne iran te bọ khian ne ọ la erhẹn rrie. E Nọyaẹnmwa ne Oghodua ọ re ọ ru ọna.

¹⁴ Sokpan, urẹnmwẹ uyi Osanobua gha vuọn agbọn na hia zẹ vbene amẹ vuọn okun.

¹⁵ Ọghuẹ fo! Vbe uwu ohu ruẹ, wẹ keghi si avbe ẹdogbo ruẹ sẹ otọ, u keghi fa iran an. U keghi ya iran gha ya owẹ fi otọe dọn khian zẹ vbe ọmwa ne ọ daa ayọn.

¹⁶ Erriọ ọ re a gha vbe ya ekhue yọ uwẹ ẹwu ye ihe uyi ne a gha te rhie ne uẹn, wẹ tobọ ruẹ gha da ayọn, u ghi gha ya owẹ fi otọe dọn khian. E Nọyaẹnmwa gha mu ukpu irri oya ọwuẹ ne uẹn wọn, a gha fi uyi ruẹ werriẹ ghe efaa.

¹⁷ U tọn ẹgbo Lebanọn gbe otọ nẹ, banbanna nian a gha vbe tọn uwẹ gbe otọ, u gbele aranmwẹ ọnrẹn nẹ, banbanna nian, te avbe aranmwẹ ọnrẹn ghi ra runran uwẹ. Ena gha sunu rhunmwuda izigha ne u dee kevbe uyinmwẹ ika ne u yin ghe emwa ne agbọn na kevbe avbe okpẹvbo ni rrọọ.

¹⁸ De esa ne ẹbọ ye yi? Emwi ne ọmwa ya obọ ru kẹkan ma, nẹ ẹ i vbe ta ẹmwẹ ọkpa ma ruẹn gberra ohoghe. De ọ maa ọkpa ne ọmwa ne ọ mu ẹtin yan rẹn ra miẹn vbọ yi — ẹbọ ne ẹ i sẹtin guan.

¹⁹ Ọwuẹ fo! U gha khama ike erhan wẹẹ, “Rhiọrre!” kevbe ovbi okuta wẹẹ, “Kpaegbe!” Amazẹ gha sẹtin rhie emwi ne a ma rẹn rhọkpa ma ruẹn ra? A sẹtin ya esiliva kevbe igoru rhu ẹe, sokpan, orhiọn i rre uwu ẹre.

²⁰ E Nọyaẹnmwa rre uwu Ọgua Osa ẹre nọhuanrẹn, wa gie emwa hia ni rre otọ agbọn gbẹdọ hiii vbe odaro ẹre.