Giọgis 21 - Edo Bible (E Baibol Ẹdo) Version 1996

Ikhuo Ne A Viọ Ne Ẹwae Bẹnjamin

¹ Ivbi Izrẹl keghi wa yan ma e Nọyaẹnmwa vbe Mizpa: “Ma rhọkpa i ra kue ne ivbie Bẹnjamin rhie ivbi ima rọnmwẹ.”

² Ẹre ivbi Izrẹl na gha die Bẹtẹl. Iran keghi tota ye odaro Osanobua rhinrin ya sẹ ota. Iran kegha khiẹ ne aro dae vbe odẹ ne ọ rriara.

³ Iran keghi kha wẹẹ, “E Nọyaẹnmwa Osanobua Izrẹl, vbe ọna na do sunu hẹẹ? Vbe ẹwae e Bẹnjamin ra na wa gbe ẹro hẹẹ vbe otọe Izrẹl?”

⁴ Emwa ni keghi gua kpao vbe owiẹ ne ọ lele ẹe, iran keghi kpa egbe, iran gba aka ye evba. Iran keghi si isara, iran kevbe giẹn ese eso ohoho.

⁵ Iran keghi nọ wẹẹ, “Vbe uwu ẹwae Izrẹl hia, de ne ọ ma rre do si koko ye odaro e Nọyaẹnmwa vbọ vbe Mizpa?” Iran vbe vẹn ihẹn nẹ wẹ ọmwa ne ọ ma rre do si koko ye odaro e Nọyaẹnmwa vbe Mizpa, te a gha gbe ẹe rua.

⁶ Sokpan ọ keghi kakabọ da ivbi Izrẹl ne etẹn iran ighẹ ẹwae Bẹnjamin, iran keghi kha wẹẹ, “Ẹwae ọkpa wa wii Izrẹl ẹrẹna.

⁷ Vbe a gha ru ẹe hẹ ne a ya viọ ikhuo ne ni ghi dekẹe vbe ivbi e Bẹnjamin? Ma yan ma e Nọyaẹnmwa nẹ wẹ ma i ra viọ ivbi ima ne ikhuo ne iran.”

⁸ Ẹre iran na nọ wẹẹ, “De ne ọ ma rri ehe ne Nọyaẹnmwa ye vbe Mizpa vbe uwu ẹwae ivbi Izrẹl?” Iran keghi do gualọ ẹe miẹn wẹ ọmwa rhọkpa ma ke Jabẹs ne Giliad rre do gu emwa si koko vbe agọ nii.

⁹ Iran ghi tie ivbi iyokuo ni hia si koko, ọmwa Jabẹs ọkpa i zẹdẹ rre evba.

¹⁰ Ẹre iran ni si koko ye evba na hannọ arriaisẹn iweva (12,000) vbe uwu emwa iran ni ze vbe ẹkoko udu sẹ, iran na gie iran wẹẹ, “Wa gha khian ya gbele emwa hia ni rre Jabẹs ke ikhuo kevbe ibiẹka.

¹¹ Wa ghi ru ọna: Wa gbele ikpia kevbe ikhuo ni rẹn okpia nẹ.”

¹² Iran keghi miẹn ibiẹka ikhuo ni ma he rẹn okpia uri vbe Jabẹs, iran keghi viọ iran gha die agọ vbe Siailo ne ọ rre otọ Kenan.

¹³ Ẹre emwa ni si koko nii hia na gie emwa bu ivbie Bẹnjamin vbe okuta Rimọn, wẹ iran mu ẹmwẹ okuo fua.

¹⁴ Ivbi e Bẹnjamin keghi werriegbe rre, ivbi Izrẹl keghi viọ ibiẹka ikhuo ne iran ma gbele ua ne iran viọ ke Jabẹs rre ne iran. Sokpan ọ ma gba iran obọ.

¹⁵ Ọ keghi wa da emwa nii ne ivbi e Bẹnjamin, rhunmwuda e Nọyaẹnmwa duẹ akugbe ne ọ rre ẹkpo avbe ẹwae ivbi Izrẹl rua nẹ.

¹⁶ Rhunmwuda ọnii avbe ọkaolotu iran ni si koko ye evba keghi kha wẹẹ, “Ikhuo i ghi rre ẹwae e Bẹnjamin. Vbe a gha ru ẹe hẹ ne a miẹn ikhuo viọ ne ikpia ni ghi dekẹe?

¹⁷ Ọ ma kei ne ọkpa vbe uwu avbe ẹwae iweva ivbi Izrẹl wa wi ẹre. Te ima gha gualọ odẹ vbene ẹwae e Bẹnjamin gha ya do ẹe fe hẹ.

¹⁸ Sokpan ma i sẹtin gie iran viọ ivbi ima rọnmwẹ, rhunmwuda ma tie ihẹn yọ nẹ emwi gha rruan ọmwa ne ọ rhirhi rhie ovbi ẹre ne iran vbe uwu ima.”

¹⁹ Ẹre iran ghi na kha wẹẹ, “Emwiukpo e Nọyaẹnmwa ne a ru vbe Siailo ukpukpo sikẹ otọ nẹ.” (Siailo odẹ okuọ Bẹtẹl ọ re ọ ye vbe odẹ Lebanọn kevbe odẹ ahọ ọghe odẹ ne ọ rre ẹkpo Bẹtẹl kevbe Siẹkẹm.)

²⁰ Iran na tama emwa e Bẹnjamin wẹẹ, “Wa ya lẹre ye uwu ogba azara ne uwa gha ba odẹ.

²¹ Ibiẹka ikhuo ni rre Siailo gha ghi ladian do ku vbe ẹghẹ emwiukpo nii, wa ghi ke uwu ogba azara ladian. Dọmwadẹ ọghọe vbe uwu uwa ghi ye ẹtin rhie okhuo vbe uwu avbe ibiẹka ikhuo nii, ne uwa viọ iran gha rrie otọe e Bẹnjamin.

²² A deghẹ erha iran ra etẹn iran ghi rre do gui, ma gha sẹtin tama iran wẹẹ, ‘Wa lahọ, wa sẹ iran rae ne ima, ẹ i re okuo ma na munọ iran do ya khian amwẹ ima. Vbene a ghi na miẹn wẹ wa ma ya iran ne ima, wa ma rri ihẹn ne uwa vẹn!’ ”

²³ Emwa e Bẹnjamin keghi ruẹ vberriọ. Dọmwadẹ ọghọe keghi zẹ amwẹ ọnrẹn vbe uwu iran ni gha kuu, ọ na mu gha rrie. Ẹre iran ghi na gha rrie otọ iran, iran keghi dọlegbe bọlọ ẹvbo iran, iran na gha rre evba.

²⁴ Vbe ẹghẹ ọkpa nii ivbi Izrẹl nekpa kevbe kpao, dọmwadẹ ọghe ọe kegha rrie ẹwae ẹre kevbe ẹgbẹe ọre kevbe emwi ẹnrẹn.

²⁵ Ọba i rre Izrẹl ẹghẹ nii. Dọmwadẹ ọghe ọe ọ re ọ wa gha ru vbe ne ọ khọn rẹn.