Giọgis 15 - Edo Bible (E Baibol Ẹdo) Version 1996

¹ Ọ ghi kpẹe fua kherhe, vbe ọ sẹ ẹghẹ ne a ya fian ọka, e Samsin keghi ya tue amwẹ ọnrẹn, ọ keghi mu ovbi ewe gie ẹe. Rẹn keghi tama erha amwẹ ọnrẹn wẹẹ, “I ho ne I gha rrie ughugha ọvbokhan mwẹ.” Sokpan ọ ma gie ẹe gha khian.

² Ọ keghi tama Samsin wẹẹ, “Te I mẹ te wa gha ro vbe ọ ghe ẹmwata wẹ ohu ẹre mu ẹẹn, ọ re I na rhie ẹre ne ọsiọ. Ọ rhe ye rriọ, ọtiọnrẹn ne kherhe ọ re ọ mose sẹ. U sẹtin rhie onii ye ihe ẹre.”

³ E Samsin keghi kha wẹẹ, “A i ghi miẹn mwẹ kpe ye emwi ne I rhirhi ru ivbi e Filistia ẹre nian.”

⁴ Ọre ọ na ya munọ umuọkhọkhọ iyisẹn eha. Ọ kegha munọ ẹre eva uhukpa, ọ keghi gbalọ iran ẹrhunrhun kugbe, ọ na gbalọ ukpekhọe mu dọmwadẹ eva nii.

⁵ Ọ keghi rhu avbe ukpekhọe nii, ọ na zẹ iran obọ la uwu oha ọka ọghe emwa Filistia. Ọ keghi wa giẹn ehia a, ẹ i re avbiẹ ọka ne a fian nẹ ọkpa, do sẹ egbe ne a ma he fian ni rre ugbo. Ugbo emwiokọ oliv kevbe giẹn uan ba ẹre.

⁶ Avbe emwa Filistia keghi nọ wẹẹ, “Gha ọ ru emwi na?” Iran keghi họn wẹ e Samsin ọ re ọ ru ẹe rhunmwuda orruan rẹn ọmwa Timna ne ọ miẹn Samsin amwẹ, ọ na rhie ne ọse ẹre. Ẹre emwa Filistia na gha khian, iran na ya giẹn okhuo nii uan, iran na vbe giẹn owa erha ẹe muotọ.

⁷ E Samsin keghi tama iran wẹẹ, “I i, erriọ uwa ye ra? U gha miẹn i ghe I gha kuẹtin vbe ẹ i re te I vbe ru uwa ẹre nẹ.”

⁸ Ọ keghi dekun iran ọghe ọhanabe, ọ na gbele ni bun vbe uwu iran, Ẹre ọ na kpao, ọ na ya di uvun okuta ne ọ rre ukpẹ oke Etam ya.

Samsin Khọn Ivbi E Filistia Miotọ

⁹ Ivbi e Filistia keghi do bu agọ ye Juda, iran na gha gu ẹvbo ne a tie ẹre Lẹhi khọn.

¹⁰ Emwa e Juda keghi nọ iran wẹẹ, “De emwi ne uwa gu ima khọn baa?” Iran keghi wanniẹn wẹẹ, “Te ima do mu e Samsin oghunmwu, ne ima vbe ya ru ẹe vbene irẹn ru ima.”

¹¹ Ẹre arhin arriaisẹn eha na gha rrie uvun okuta ne ọ rre ukpẹ oke Etam, iran na tama Samsin wẹẹ, “Wẹ ma rẹn ighẹ emwa Filistia ọ re ọ kha yan ima. Vbu a ghi na yin ghe ima vbenian hẹ yi?” Rẹn keghi wanniẹn wẹẹ, “Vbene iran ru mwẹ zẹẹ ọ re I vbe ru iran.”

¹² Iran keghi tama rẹn wẹẹ, “Te ima rre na ne ima do gba a ne ima miẹn ehe na mu ẹẹn gie iran.” E Samsin keghi kha wẹẹ, “Wa yan ma mwẹ wẹ wa i ra tobọ uwa gbe mwẹ uan.”

¹³ Iran keghi wanniẹn wẹẹ, “Ẹn o, te ima ra gba a kẹkan ne ima mu ẹẹn ne iran. Ma i gbe ua.” Ẹre iran na ya irri ọgbọn eva gba ẹe, iran na mu ẹẹn ke ukpẹ oke ni gha dee.

¹⁴ Ọ ghi sẹ Lẹhi, ivbi e Filistia keghi wa gha vẹ bu ẹre dee, iran kegha go yan rẹn. Orhiọn e Nọyaẹnmwa keghi rhie ẹtin ne ẹẹn, ọ keghi giagia irri ne a ya gbalọ ẹre obọ gbalọ ẹre owẹ kua vbene a gha kha wẹ oru ne erhẹn giẹnrẹn ọ re nọ.

¹⁵ Rẹn ghi ghe ghe ugboloko agbanmwẹ ekẹtẹkẹtẹ, ọ na gua ẹe rhie ọ na ya ẹe gbele arhin arriaisẹn (1,000).

¹⁶ Ẹre Samsin ghi na zẹ ihuan so, “Ugboloko agbanmwẹ ekẹtẹkẹtẹ ọ re I ya gbele arhunmwu arriaisẹn, ugboloko agbanmwẹ ekẹtẹkẹtẹ ọ re I ya silo iran yan egbe ikun ikun.”

¹⁷ Iyeke ọnii, ọ keghi fi ugboloko agbanmwẹ ni fua. A kegha tie ehe ne emwi na na sunu Ramat.

¹⁸ Ovbamẹ ke wa gha gbe Samsin, ẹre ọ na datie Nọyaẹnmwa wẹẹ, “U rhie akhọnmiotọ nọkhua na mẹ nẹ, te ovbamẹ ghẹ ghi gbe mwẹ uan ra ne avbe ivbi e Filistia ni ga ẹbọ na do mu mwẹ oghunmwu gha rrie?”

¹⁹ Ẹre Osanobua na rhan ugboghodo ọkpa vbe otọ vbe Lẹhi vbe evba, amẹ keghi vẹ ladian vbọ. E Samsin keghi wọn, egbe na do gha ye ẹe ẹse. Ẹre iran na ghi gha tie ovbi ẹzẹ ni Hakọ; te ọ ye rre Lẹhi sẹ ẹdẹ nẹrẹ na.

²⁰ E Samsin keghi su Izrẹl la ukpo ugie vbe avbe emwa Filistia kha yan iran.