Gẹnẹsis 2 - Edo Bible (E Baibol Ẹdo) Version 1996

¹ A keghi do yi otọe kevbe iso fo.

² Vbe ikpẹdẹ ne ogihinrọn, Osanobua keghi winna iwinna ne ọ gha winna hia fo, ọ keghi dobọ iwinna yi.

³ Rẹn keghi fiangbe ikpẹdẹ ne ogihinrọn, ọ keghi zọe ye otọ zẹ vbe ẹdẹ kpataki, rhunmwuda ẹdẹ nẹdẹrriọ ọre ọ winna iwinna emwi ne ọ yi fo, ọ na dobọ iwinna yi.

⁴ Vberriọ ọre a ya yi otọe vbe ukhunmwu. Ẹghẹ ne Nọyaẹnmwa Osanobua na yi otọe vbe ukhunmwu,

Ogba Idẹni

⁵ erhan rhọkpa ma gha rre otọe, emwi rhọkpa ma he vbe zọọ, rhunmwuda, rẹn ma he gie amẹ he rhọ, ọmwa rhọkpa i vbe rrọọ ne ọ gha kọ emwi ye otọe.

⁶ Sokpan amẹ kegha rọn ke uwe otọe rre, ọ keghi lẹ guagua otọe.

⁷ Ọre Nọyaẹnmwa Osanobua na rhie ekẹn vbe otọe, ọ keghi yae ma okpia, ọ keghi hiọnrọn uhiọnrọnmwẹ arrọọ ye ọre uvun ihue, okpia nii keghi khian ne ọ ghi rrọọ.

⁸ Nọyaẹnmwa Osanobua ke do mu ogba ọkpa ye Idẹni, vbe odẹ ahọ ọ ke rhie okpia ne irẹn maẹn nii ye evba.

⁹ Ọ keghi ruẹe ne erhan ughughan hia zọ, ne mose mose kevbe ni mọ ọmọ. Erhan ne ọ rhie arrọọ ke ẹwaẹn ne a ya rẹn emwi ne ọ maa ke ne ẹ i maa ne ọmwa kegha rre adesẹneva ogba nii.

¹⁰ Ẹzẹ ọkpa lẹ ke uwe Idẹni ladian do gba amẹ khakha ogba nii, ọ ghi gberra Idẹni nẹ, ọ keghi fian egbe ye ẹzẹ enẹ.

¹¹ A kegha tie ẹzẹ ne okaro Pisiọn; ọnii ọre ọ lẹ la odẹ Havila.

¹² (Emwana ọre a na miẹn igoru nigoru ke emwi ni winhin eso, kevbe okuta ighobioye.)

¹³ A ke gha tie ẹzẹ ne ogieva Gihọn, ọnii ọre ọ lẹ la odẹ avbe Kushi.

¹⁴ Ẹzẹ ne ogieha keghi re Taigris, ọnii ọre ọ lẹ la asefẹn ahọ Asiria. Ẹzẹ ne ogienẹ keghi re Yufretes.

¹⁵ Ẹre Nọyaẹnmwa Osanobua na rhie okpia nii, ye uwe ogba Idẹni ne ọ gha gbe ẹre ugbo kevbe ne ọ gha gbearoghe ẹre.

¹⁶ Ọ keghi tama okpia nii wẹẹ, “U sẹtin gha rri avbe ọmọ erhan hia ni rre uwe ogba na.

¹⁷ Sokpan ọnii ne ọ rhie ẹwaẹn ne a ya rẹn emwi ne ọ maa kevbe ne ẹ i maa ne ọmwa, ghe rri ọmọ rẹn. U gha rriọe, u gha wu ẹdẹ nẹdẹrriọ zẹẹ.”

¹⁸ Ẹre Nọyaẹnmwa Osanobua na kha wẹẹ, “Ọ ma kei ne okpia na vbe ẹhi ẹre ọkpa kẹkan gha rrọọ. I gha yi ogieva ẹre ne ọ maẹn rhie nẹẹn ne ọ gha yi ọre obọ.”

¹⁹ Rhunmwuda ọnii, ọ ke fian ekẹn vbe otọe, ọ na ya mannọ avbe aranmwẹ kevbe ahianmwẹ hia, ọ keghi viọ iran bu okpia ni gha dee ne ọ he iran eni, emwi ne okpia nii he iran re ọ hin iran.

²⁰ Ọre okpia nii na do he avbe aranmwẹ nii hia eni, kevbe ahianmwẹ sokpan a ma miẹn ọkpa vbe uwe iran ne ọ sẹtin gha re ogieva ẹre ne ọ maẹn.

²¹ Ẹre Nọyaẹnmwa Osanobua na bọ okpia nii ye ovbe nọkhua. Ugbẹn vbe ọ ghi vbiẹ, rẹn keghi rhie ọkpa vbe ifẹnmwaguẹ okpia nii, ọ keghi vbe mama efun egbe ne ọ rre evba kugbe.

²² Ọ keghi ya ifẹnmwaguẹ ne ọ rhie vbe egbe okpia ma okhuo, ọ na rhie ẹre bu ẹre gha dee.

²³ Ẹre okpia ni na kha wẹẹ, “A ghi he vbe miẹn ne ima gba re ọkpa, ugboloko ne a rhie vbe ugboloko mwẹ kevbe efun ne a rhie vbe efun mwẹ ‘Okhuo’ ọre a gha tie ẹre rhunmwuda egbe okpia ọre ọ ke rre.”

²⁴ Ọna ọre ọ zẹe ne okpia gha na sẹ erha ẹe kevbe iye ẹe rae, ọ ghi rhikhan mu amwẹ ọnrẹn, iran ghi gha re ọkpa.

²⁵ Irhunmwirhun ọre okpia nii kevbe okhuo nii gha ye, sokpan ekhue ma mu iran.