Galatia 6 - Edo Bible (E Baibol Ẹdo) Version 1996

Wa Gha Kpa Egbe Ihẹ

¹ Etẹn, a deghẹ a mu orhunmwu ọkpa mu orukhọ, wa ni re ọghe orhiọn vbọ, wa ghi dia ẹre ye odẹ, sokpan wa ghi ru ẹre ọghe ọghọ vbe ute. Wa tobọ uwa ghi vbe gha ba egbe, ne a ghẹ vbe danmwẹ uwa ghẹ.

² Wa gha kpa egbe ihẹ, odẹ vberriọ ọre uwa gha ya mu uhi Kristi sẹ.

³ A deghẹ orhiọnkpa tie egbe ẹre ọmwa kpataki, ugbẹn vbe ẹ i mwẹ emwi ne ọ khin, egbe ẹre ọre ọ rẹrẹ.

⁴ Dọmwadẹ ọghọe ghi tobọ ẹre gha ghe vbene uyinmwẹ egbe ẹre ye hẹ. A deghẹ ne ọ maa nọ, ẹghẹ nii, ọ sẹtin zẹ okpowẹ ba ẹmwẹ emwi ne ọ sẹtin ru, vbene ẹ i na vbe ya ẹe gie emwi ne ọmwa ọvbehe ru.

⁵ Rhunmwuda, dọmwadẹ ọghọe ọre ọ ra mu ihẹ egbe ẹre.

⁶ Ọmwa ne a ẹre emwi ẹmwẹ iyayi Kristi, ọ kere ne ọ gha ghae vbe emwi ne ọ mwẹ ne ọmwa ne ọ ma ẹre emwi.

⁷ Wa ghẹ rẹrẹ egbe uwa, ọmwa rhọkpa i sẹtin do Osanobua ọzuọ, emwi ne ọmwa kọe zẹ, ọre ọ gha vbe rhọ.

⁸ Ọ gha kọ emwi ne egbe ho ye ugbo, evba ọre ọ ra na ya rhọ emwiorhọ uwu, a deghẹ ọ vbe kọ emwi ne ọre ọghe Orhiọn, ke uwu Orhiọn ni rre, ọre ọ gha na rhọ emwiorhọ ẹfe ne ẹ i mwẹ ọfo.

⁹ Rhunmwuda ọnii, wa ghẹ gie egbe emwi esi ne a ru wọ uwa, rhunmwuda, a deghẹ, a ma zobọ vbọ ẹghẹ dee ne ima gha na rri ere ẹre.

¹⁰ Rhunmwuda ọnii, ẹghẹikẹghẹ ne a ya miẹn otọ, wa gie a gha ru emwa hia ẹse, sokpan sẹe hia sẹẹ hia, iran ne ima gba re ọkpa vbe ẹgbẹe iyayi.

Ẹmwẹ Ibude Ne Okiekie Kevbe Igiotuẹ

¹¹ Wa ghe vbene I gbẹn ọẹn hẹ gbadagbada rhunmwuda ighẹ obọ mwẹ ọre I ghi ya gbẹn ebe gie uwa na.

¹² Iran ni ho ne iran gha tọn ifuẹn mu, kevbe ne iran gha ya emwi ikinnegbe rhuọ, ọre ọ ho ne ọ ya ẹkiudu mu uwa ne uwa rhuẹ. Sokpan, emwi ne ọ ya iran ru ẹe ọrọre, ne a ghẹ miẹn ehe na kpokpo iran ba ẹmwẹ ugbugbe Kristi.

¹³ Iran tobọ iran ni rhuẹ re, iran i ru vbene nene Uhi khare. Iran ho ne a rhuẹ uwa, ne iran miẹn ya gha rhuọ wẹ, wa yobọ ye ẹmwẹ iwinna ikinnegbe na.

¹⁴ Zẹ vbe ọghomwẹ, ẹmwẹ ugbugbe Nọyaẹnmwa Jesu Kristi ọkpa ọre I ra ya gha rhuọ, rhunmwuda, ẹmwẹ ugbugbe ẹre, ọre agbọn na ya khian orinmwi vbe obọ mwẹ, mẹ na vbe khian orinmwi vbe obọ agbọn na.

¹⁵ Ẹ i zẹdẹ mwẹ esa ne ọ ye, deghẹ ọmwa rhuẹre ra ọ ma rhuẹ, emwi ne a kha ọrọre, ne ọmwa khian enayi ọgbọn.

¹⁶ Iran ne ọ ya ọna ru emwi vbe ẹdẹ agbọn iran, ọfumwegbe kevbe itohan, ọre ọ gha gu iran rrọọ, iran kevbe emwa Osanobua hia.

¹⁷ Ne I ya mu ẹmwẹ na ye otọ, ọmwa rhọkpa ghẹ ghi kpokpo mwẹ o. Ama ẹtẹ ni rrọ mwẹ egbe rhie maa wẹ ọviẹn Jesu ọre I khin.

¹⁸ Te ẹsọhẹ Nọyaẹnmwa Jesu Kristi gha gu uwa hia rrọọ etẹn mwẹ. Isẹ.