Galatia 5 - Edo Bible (E Baibol Ẹdo) Version 1996

Wa Ya Obọ Da Ẹe Yi Ighẹ A Yan Egbe Ọmwa

¹ Ọdakha egbe mwa ma ye. Kristi rhan ima nẹ. Rhunmwuda ọnii nian, wa mudia zẹ vbe emwa ni rre ọdakha egbe iran, ne uwa ghẹ ghi gie a dọlegbe ya uwa khian eviẹn.

² Wa danmwehọ! Mẹ ne Pọl ọre ọ ta ẹmwẹ na ma uwa, a deghẹ wa kue ne a rhuẹ uwa, Kristi i mwẹ esa ne ọ ye ne uwa hiehiere.

³ I ho ne I tua unu mu ẹmwẹ na, ne I vbe dọlegbe ta ẹe ma ọmwa ne ọ kue ne a rhuẹ ọre, te ọ khẹ ke ẹe ne ọ wa gha ru emwi hia ne nene Uhi khare.

⁴ Wẹ ne ọ ho ne uwa la ekpa a ru vbene nene Uhi khare ya egbe uwa khian ne ọ mudia ẹse vbe odaro Osanobua, wa wannegbe uwa fua hin Kristi rre nẹ. Wa lahin obọ ẹsọhẹ Osanobua rre nẹ.

⁵ Zẹ vbe ọghomwa, idaehọ mwa ọrọre wẹ, Osanobua gha ya ima khian ne ọ mudia ẹse vbe odaro ẹre, ọnọna ọre ima mudia khẹ, vbe ekpa ẹtin Orhiọn Osanobua, ne ọ winna la ekpa iyayi mwa.

⁶ Rhunmwuda, ma gha kugbe ba Kristi Jesu nẹ, a rhuẹ, ra ma rhuẹ, i ghi mwẹ esa ne ọ ye, emwi ne a kha ọrọre iyayi ne ọ winna vbe ekpa aho ẹmwẹ ọmwa.

⁷ Wa te wa gha gbe ẹse. Gha ọ ghi da uwa obọ emwi ẹmwata ne uwa te ru yi yi? Vbe ọ ya sẹtin ya uwa ru ẹe hẹ yi?

⁸ Ẹ i re Osanobua ne ọ tie uwa ọre ọ ru ẹe.

⁹ Ovbi eyist kherhe ọ re a ya ye okpan ẹlubọ hia hue.

¹⁰ Sokpan I wa ye mu ẹtin yan uwa. Ne ima na re ọkpa vbe uwu Nọyaẹnmwa, gie ekhọe mwẹ muẹn wẹ, wa i ra roro ẹe la odẹ ọvbehe, kevbe wẹ, ọmwa ne ọ do gha rueghe uwa orhiọn na, emwa ne ọ khọnrẹn wẹ ne ọ gha khin, ighẹ Osanobua gha ru ẹre emwi.

¹¹ Sokpan zẹ vbe ọghomwẹ, etẹn mwẹ, de emwi ne a ghi khu mwẹ khian ba yi a deghẹ te imẹ kpe orhu ẹre wẹ arhuẹ mwẹ esa ne ọ ye? Akpawẹ ẹmwata ọnii khin, orhu ne I kpe vbe ekpa ugbugbe Kristi ghẹ i gha si ẹmwẹ.

¹² Iran ni do gha rueghe uwa orhiọn na, vbe ọ rrọọ akpawẹ iran gha wa ru fo, wẹ ne iran ya ye egbe iran khian osọnmwẹ.

¹³ Zẹ vbe ọghe uwa, etẹn mwẹ, te a tie uwa la hin uwu ọviẹn rre, sokpan wa ghẹ gie ẹmwẹ egbe mwẹ I gue na, gha re ne uwa gha mu zẹ asa ne emwi ne egbe uwa guẹe, gha na maghan uwa. Sokpan wa gie aho ẹmwẹ ọmwa gha ya uwa ga egbe.

¹⁴ Rhunmwuda nene Uhi hia, uwu iyi ọkpa ọre a na ko ẹre uhunmwu: “Ho ẹmwẹ ogieva ruẹ zẹ vbe egbe ruẹ.”

¹⁵ Sokpan deghẹ te uwa ru emwi vbe atita, vbe ne uwa na kuan egbe, ye akọn rri egbe, wa ghi khẹ ye egbe ne uwa ghẹ ya miẹn egbe uhunmwu.

Orhiọn Kevbe Akpa Ọmwa

¹⁶ Ẹmwẹ ne I ta ọna khin wẹ, wa gie Orhiọn Ne Ọ Huanrẹn gha dia ẹdẹ agbọn uwa ye odẹ, ne uwa ghẹ gha ru emwi ne ikinnegbe uwa rriarria yi.

¹⁷ Rhunmwuda emwi ne ikinnegbe mwa ho, wa lihan ne emwi ne Orhiọn Ne Ọ Huanrẹn ho. Emwi ne Orhiọn Ne Ọ Huanrẹn ho, vbe lihan ne emwi ne ikinnegbe ho, oghian egbe ọre iran eva khin, ọnii rhie maa wẹ, wẹ i sẹtin ru emwi ne ọ rre uẹ ekhọe.

¹⁸ A deghẹ Orhiọn Ne Ọ Huanrẹn ọre ọ dia ruẹ ye odẹ, ẹghẹ nii, wẹ i ghi rre ototọ nene Uhi.

¹⁹ Ọwarọkpa ọre a ya rẹn emwi ne egbe ru, ehe ne a na miẹn ọẹn ọrọre uyinmwẹ alama oghẹ, iruẹn kevbe osọnnọ,

²⁰ ẹbọ ne a gho kevbe azẹn, emwa ghi ya eghian so egbe, iran ghi gha gbinna, oya iran ghi gha da egbe, okuo kevbe oguegue. Iran ghi gha ghae egbe ye otu kevbe oka.

²¹ Iran ghi gha gbe ọvo egbe, iran ghi gha da ayọn gbe egbe, iran ghi gha gbe izabọbọ ẹwia kevbe avbe emwi ni khọ vberriọ. I vbe gie uwa rẹn nian, zẹ vbene I ka vbe ta ẹe yi wẹ, iran ni ru avbe emwi na, iran i sẹtin rhan obọ miẹn Arriọba Osanobua.

²² Sokpan Orhiọn Ne Ọ Huanrẹn ọre ọ biẹ avbe aho ẹmwẹ ọmwa, oghogho, ọfumwegbe, iziengbe, itohan, ekhọe esi, amuẹntinyan,

²³ imuegberriotọ kevbe amuegbe ye ọghọ. A ma yi uhi ye egbe emwi vberriọ.

²⁴ Iran ni re ọghe Kristi vbe fuẹn emwi ni re ọghe egbe uan nẹ, ke ẹe kevbe oguegue kevbe orriarria ẹre.

²⁵ Nene Orhiọn rhie a rrọọ ne ima nẹ, rẹn ọre ọ ghi vbe mwẹ ọdakha yan ẹdẹ agbọn mwa.

²⁶ Ọ ma kei ne ima gha tọn egbe mu ra ne a gha ho egbe ẹmwẹ ra ne oya egbe gha da egbe.