Galatia 4 - Edo Bible (E Baibol Ẹdo) Version 1996

¹ Ne a ye tae khianmwu, ọmwa ne ọ ra yan owa erha ẹe, ọ gha rre ọvbokhan, obọ ne a ya mu ọviẹn ọre a vbe ya mu ẹn, a gha rhe miẹn ighẹ rẹn ọre ọ yan emwi hia.

² Ọ gha he gha rre ọvbokhan nii, emwa rrọọ ni gbe aro ghe ẹre, ni vbe ru emwi hia ne ọ gha te ru, ọ te do sẹ ẹghẹ ne erha ẹe rhie yọ.

³ Erriọ vbe nọ, ma tobọ ima keghi te vbe gha re eviẹn avbe orhiọn ni kha yan agbọn na, rhinrin ma te do sẹ okpia vbe emwi ni re ọ ghe orhiọn.

⁴ Sokpan, ugbẹn vbe ọ ghi do sẹ ẹghẹ ne ọ kee yọ sẹẹ, Osanobua keghi gie ovbi ẹre tobọ ẹre gha dee. Rẹn keghi rre zẹ vbe ọmwa ne iye ẹe re ọmwa ne agbọn na, ọ na vbe gha rre ototọ Uhi avbe Ju.

⁵ Ne ọ do fannọ emwa ni rre ototọ nene Uhi ye otọ ne ima miẹn ehe na gha re ivbi Osanobua.

⁶ Ne ọ miẹn ehe na rhie maa ighẹ ivbi irẹn wa khin, Osanobua keghi gie Orhiọn Ovbi ẹre ye uwu ekhọe mwa, Orhiọn ne ọ datu wẹẹ, “Evbavba ne Evbavba.”

⁷ Rhunmwuda ọnii nian, wa i ghi re eviẹn ọvbehe, sokpan emọ uwa khin. Vbene a ghi na miẹn nian ighẹ ovbi ẹre ọre uwẹ khin, Osanobua gha rhie emwi hia ni re ọghe ivbi ẹre ne uwẹ.

Osi Emwa Galatia Ne Ọ Si Pọl

⁸ Vbe ẹghẹ ne ọ gberra, wa ma rẹn Osanobua, wa keghi rhunmwuda ọnii gha re eviẹn avbe emwi ne ẹ i re Osanobua.

⁹ Sokpan wanwan na nian, vbene uwa ghi na rẹn Osanobua nẹ, ra ne I wa kha wẹ, vbene Osanobua ghi na rẹn uwa nẹ, vbe ọ zẹ ne uwa na ho ne uwa dọlegbe bu avbe orhiọn ẹwobi ne vburriẹ, ni khaemwisẹ ni, gha khian yi? Vbe ọ zẹ ne uwa na dọlegbe ho ne uwa gha re eviẹn iran?

¹⁰ Wa siẹn ẹdẹ eso ẹro, uki, ẹghẹ, kevbe ukpo.

¹¹ Afianma uwa fian mwẹ. Ọnii rhie maa ighẹ ẹsọn ne I miẹn ne uwa, te I miẹn ọẹn kua?

¹² I rinmwian uwa etẹn mwẹ, wa gha ye vbene imẹ ye. Wa ma miẹn ighẹ vbene uwa ye ọre imẹ vbe ye. Wa ma mwẹ emwi ne uwa ya ru mwẹ khọ.

¹³ Wa gha yerre emwi ne ọ ya mwẹ kpe orhu iyẹn ne ọ ma uwa vbe ẹghẹ okaro wẹ, te egbe ma rran mwẹ.

¹⁴ Sokpan wa ma sọnnọ mwẹ, ra ne uwa sua mwẹ fua, egbe ne a ya miẹn wẹ egbe ihe ne egbe mwẹ gha ye, edanmwẹ nọkhua ọre ọ wa gha khin ne uwa. Sokpan, wa keghi rhan obọ miẹn mwẹ, vbene a miẹn wẹ odibo Osanobua ọre I khin, wa na rhan obọ miẹn mwẹ, vbene uwa gha vbe ya rhan obọ miẹn Kristi Jesu.

¹⁵ Te ọyẹnmwẹ te gha sẹ uwa! Vbe ọ mobọ ghi ye hẹ na yi? Mẹ gha sẹtin tobọ mwẹ ta ene unu uwa wẹ, akpawẹ te ọ gie uwa ru, wa gha wọlọ aro uwa viọ mẹ.

¹⁶ Te I ghi khian oghian uwa ra rhunmwuda ighẹ I ta ẹmwata ma uwa?

¹⁷ Iran nekpa wa gbe egbe uwa ẹsẹse nian, sokpan emwi ne ọ rre iran ekhọe i maa. Emwi ne iran ho ma gberra ne iran wannọ uwa hin mwẹ egbe rre, ne ẹmwẹ iran miẹn ehe na gha yẹ uwa vbe ekhọe, vbene ẹmwẹ uwa yẹ iran vbe ekhọe.

¹⁸ Emwi esi wa nọ ne a gha sẹ oyaya ye emwi ne ọ maa, ẹmwata, ẹghẹ hia ọre ọna khin ighẹ ẹ i re vbe I a gha rre ehe ne uwa ye ọkpa.

¹⁹ Ivbi mwẹ ni ghan! Te emwi ubiẹmwẹ uwa ghi vbe ru mwẹ zẹ vbe okhuo ne ọ ra biẹ, rhinrin a te do miẹn wẹ ama emwi ne Kristi khin rhie egbe maa vbe uwu uwa.

²⁰ Vbe ọ rrọọ akpawẹ ehe ne uwa ye ọre I gu uwa ye nian, vbene I gha na miẹn ehe na ya obọ ọvbehe mu uwa. Afianma uwa wa fian mwẹ.

Igiemwi Hega Kevbe Sera

²¹ I de ne I nọ uwa ni ho ne iran gha rre ototọ nene Uhi, wa ma rẹn vbene nene Uhi kha hẹ ra?

²² Ọ wẹẹ: Ebraham kegha mwẹ emọ ikpia eva. Ọkpa vbọ re ne okhuo ne ọviẹn ọmwa biẹ ẹe, nọkpa keghi re ne okhuo ne ẹ i re ọviẹn ọmwa biẹ ẹe.

²³ Ovbi ẹre ne okpia ne ọviẹn ọmwa biẹ keghi re ne a biẹ vbene a ya biẹ kẹkan, sokpan ovbi ẹre nọkpa ne okhuo ne ẹ i re ọviẹn ọmwa biẹ, keghi re ne Osanobua ve ẹre re.

²⁴ A sẹtin ye ọnii ru igiemwi, ikhuo eva na keghi gha re ile eva, ne ọkpa vbọ (ọnii nọ wẹ Hega) keghi ke uhunmwu oke Sainai rre, a keghi biẹlẹ ivbi ẹre eviẹn.

²⁵ Hega mudia ye ihe Sainai, oke ne ọ rre Arebia, rẹn keghi vbe re ama Jerusalẹm ne ọ rrọọ ẹdẹnẹrẹ na, ne ọ re ọviẹn ke ẹe kevbe emwa rẹn hia.

²⁶ Sokpan Jerusalẹm ne ọ ke odukhunmwu rre i re ọviẹn, ọnii ọrọre iye ima.

²⁷ Rhunmwuda ebe kha re wẹẹ, “Gha ghọghọ wẹ ne okhuo ne ọ ma biẹ ẹdẹ davan ne u gha we ne oghọghọ wẹ, ne emwi ubiẹmwẹ ma he ru ẹdẹ. Rhunmwuda, okhuo ne a te kpa sẹrae, gha do gha mwẹ emọ ne ọ bun sẹ ọghe okhuo ne irẹn vbe ọdọ ẹre gba rrọọ.”

²⁸ Wanwan na nian, ọtẹn mwẹ, ivbi Osanobua ne ọ ve zẹ vbene Aizik ye, ọre uwa khin.

²⁹ Vbe ẹghẹ nii, ọmwa ne a hiẹ ẹe zẹ vbene a ya biẹ nii, kegha zẹ ọmọ ne a la ekpa Orhiọn Osanobua bie kpokpo, erriọ ọre ọ wa vbe ye na nian.

³⁰ Sokpan vbe ebe a ghi kha yẹ? Ọ wẹẹ, “Khu okhuo ne ọviẹn ọmwa ni ke ẹe kevbe ovbi ẹre ladian, rhunmwuda ovbi okhuo ne ọviẹn ọmwa ni, i ra gu ovbi okhuo ne ẹ i re ọviẹn ọmwa ni gha ukhu erha ẹe.”

³¹ Rhunmwuda ọnii, nian, wa ne etẹn mwẹ, ma i re ivbi okhuo ne ọviẹn ọmwa, sokpan ivbi okhuo ne ẹ i re ọviẹn ọmwa ma khin.