Galatia 2 - Edo Bible (E Baibol Ẹdo) Version 1996

E Pọl Kevbe Avbe Ukọ Nekpa

¹ Vbe iyeke ukpo iwenẹ, I keghi lele Banabas werriegbe gha rrie Jerusalẹm. I keghi vbe rhie Taitọs ba egbe gha khian.

² Te I gha khian, rhunmwuda ighẹ Osanobua rhie ma mwẹ ne I gha khian. Ugbẹn vbe imẹ vbe avbe ọkaolotu ghi si egbe uma, I keghi rhan otọ iyẹn ne ọ maa ne I kpe orhu ẹre ma iran ne ẹ i re Ju, ma iran. I ma ho ne iwinna ne I ka winna nẹ, ra ne iwinna vbe obọ na, khian ne ọ la ọrhiae rrie.

³ Egbe ne Taitọs ne ogieva mwẹ rhe ya re Grik, a ma ye ẹtin mu ẹn ne ọ rhuẹ.

⁴ A gha rhe miẹn wẹ, emwa eso ni tie egbe iran etẹn mwa ni deba ima, te gha ho ne iran rhuẹ ọre. Iran na keghi rẹnrẹn la uwu ẹbu zẹ vbe ọ rhẹ, ne iran do ghe vbene ima ghi re emwa ni fanmwẹ egbe ua hẹ, rhunmwuda ighẹ ma ye egbe ba Jesu Kristi. Iran te ho ne iran ye ima khian eviẹn.

⁵ Ma ma rhie otọ ne iran vbe ifuanro ọkpa kẹkan, ne a miẹn ehe na da ẹmwata iyẹn ne ọ maa yi ne uwa, vbe na i na mwẹ ẹbe.

⁶ Sokpan iran ni ye vbe avbe olotu, I tae vberriọ, rhunmwuda, emwi ne iran khin, i mwẹ esa nọ khin ne imẹ, rhunmwuda Osanobua ighe ikpakpa ya bu ohiẹn. Vbene I kha re, avbe olotu ma vbe gun mwẹ zẹ iro emwi ọgbọn.

⁷ Sokpan, iran keghi miẹn wẹ te Osanobua ya ẹe ghae okhuo mẹ wẹ, ne I ya gha kpe orhu iyẹn ne ọ maa ma avbe iran ne ẹ i re Ju, zẹ vbene ọ vbe ghae ẹre ne Pita ne ọ ya gha kpe orhu ma iran ne Ju.

⁸ Rhunmwuda ẹtin Osanobua ọre a ya ya mwẹ ru ukọ gie iran ne ẹ i re Ju, zẹ vbene Pita vbe re ukọ iran ne Ju.

⁹ Jems Pita vbe Jọn, ni ye vbe avbe ọkaolotu, wa miẹn wẹ, te Osanobua rhie iwinna kpataki na mẹ, iran keghi so imẹ vbe Banabas obọ, zẹ vbe ogieva egbe, ma keghi tae wẹ ma gha winna vbe uwu avbe iran ne ẹ i re Ju, ne iran gha winna vbe uwu avbe Ju.

¹⁰ Emwi ọkpa ne iran ghi kha ọrọre wẹ, ne ima gha ye avbe emwa ne ẹ i mwẹ ni rre ehe ne iran ye rre, mẹ ka tobọ mwẹ mu aro yọ nẹ ne I ru ọnọna.

E Pọl Gu E Pita Gui Vbe Antiọk

¹¹ Ugbẹn vbe Pita sẹ Antiọk, uwu ẹbu ọre I na gha gu ẹe gui, rhunmwuda emwi ne ọ ru ma kei hiehiere.

¹² Ẹghẹ ne emwa ne Jems gie rre na ma he rre, e Pita kegha gu iran ne etẹn mwa ne ẹ i re Ju rri evbare. Sokpan, ugbẹn vbe iran na ghi rre nẹ, ọ na ban rrie, ọ ma ghi gu iran rri evbare, rhunmwuda, ohan avbe iran ne ọ ho ne a gha rhuẹ iran ne ẹ i re Ju mu ẹn.

¹³ Iran ne Ju, ne etẹn mwẹ nekpa keghi vbe suẹn gha ru emwi avbiẹrẹ deba e Pita. Uhin ighẹ te nene uyinmwẹ avbiẹrẹ iran vbe sẹ egbe Banabas.

¹⁴ Ugbẹn vbe I ghi miẹn wẹ iran ma lele uviẹn ẹmwata, zẹ vbe ne ọ gha gu ẹmwata iyẹn ne ọ maa ro, I keghi tama Pita vbe sirra iran hia wẹẹ, “E Ju ọre uwẹ khin, sevba, ke ẹghẹ nii gha de, uyinmwẹ ọmwa ne ẹ i re Ju ọre u gha yin, ẹ i re ọghe Ju. Vbe u a ghi na ho hẹ nian ne u ye obọ yẹn ọmwa ne ẹ i re Ju ẹho ne ọ do gha ru emwi avbe Ju?”

Iyayi Ọre A Ya Miẹn Ju Kevbe Ne Ẹ I Re Ju Fan

¹⁵ Vbe ẹmwata, ivbi eseserese vbe uwu e Ju ma khin ighẹ ẹ i re emwa orukhọ ne ẹ i re Ju.

¹⁶ Sevba ma rẹnrẹn wẹ, iyayi vbe uwu Kristi ọkpa ọre a sẹtin ya ya ọmwa khian ne ọ mudia ẹse vbe odaro Osanobua, ighẹ ẹ i re na na ru zẹ vbene nene Uhi kha re. Ma tobọ mwa, te ima ya Kristi Jesu yi, ne a miẹn ehe na la ekpa iyayi ne ima ya Jesu yi, ya ima khian ne ọ mudia ẹse vbe odaro Osanobua, ighẹ ẹ i re na na ru vbene nene Uhi kha re.

¹⁷ Adeghẹ vbe uwu ne a na hia ne a la ekpa a ya egbe ba Kristi ya ima khian ni mudia ẹse vbe odaro Osanobua, a do miẹn wẹ, emwa orukhọ ma wa khin, zẹ vbene avbe iran ne ẹ i re Ju vbe ye, te ọnii ghi rhie maa ra ighẹ te Kristi ye orukhọ obọ? Hiehiere!

¹⁸ Deghẹ mẹ ghi vbe dọlegbe gha bọ emwi ne imẹ ka siẹn sẹ otọ nẹ, ọnii rhie maa wẹ, te imẹ rra nene Uhi.

¹⁹ Vbene ọ rhirhi gha ye hẹ, vbe ọ ghe emwi ne ọ dekan nene Uhi, mẹ wu nẹ, nene Uhi tobọ ẹre ọre ọ vbe gbe mwẹ uan, ne I miẹn ehe na gha rre agbọn ne Osanobua. A gbe mwẹ uan ba Kristi nẹ vbe uhunmwu ugbugbe ẹre.

²⁰ Ọre a ghi na miẹn nian wẹ, ẹ i re imẹ ọre ọ ghi rre agbọn ọvbehe, sokpan Kristi ọre ọ rre agbọn vbe uwu imẹ vbene I ghi ya rre agbọn na nian, iyayi ọre I ghi ya rrọọ vbe uwu ovbi Osanobua, ọmwa ne ọ ho ẹmwẹ mwẹ, ọ na rhie ẹdẹ agbọn rẹn mẹ.

²¹ I ma he ẹsọhẹ Osanobua. A deghẹ ekpa nene Uhi ọre a ya ye ọmwa khian ne ọ mudia ẹse vbe odaro Osanobua, ọnii rhie maa ighẹ uwu ne Kristi wu, kẹkan ọre nọ.