Galatia 1 - Edo Bible (E Baibol Ẹdo) Version 1996

¹ E Pọl, ọmwa ne a miẹn wẹ, ẹ i re obọ ọmwa ọre ọ ke rre, ẹ i re ọmwa ọre a gie vbe a tie ẹre ne ọ do gha re ukọ, vbe ẹ i re Jesu Kristi kevbe Osanobua ne Evbavba, ne ọ huẹn ọnrẹn kpaegbe vbe idin, ọre ọ gbẹn ebe na rre.

² Etẹn hia ni rre edinran deba mwẹ gie otuẹ esọsi hia ni rre Galatia.

³ Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa.

⁴ Ne ọ miẹn ehe na fan ima vbe obọ orre dan na, Kristi keghi ye egbe ẹre miẹn orukhọ mwa, zẹ vbe iho ọghe Osanobua kevbe Erha mwa.

⁵ Osanobua ọ re a gha rhie uyi na ẹdẹ kevbe ẹdẹdẹmwẹdẹ. Isẹ!

Iyẹn Ne Ọ Maa Ọkpa Kẹkan

⁶ Ẹmwẹ uwa wa yan mwẹ unu uan! Vbe uwu ẹghẹ kherhe na, wa wa lẹ kua nẹ hin ehe ne ọmwa ne ọ ya ẹsọhẹ Kristi tie uwa, wa keghi vbe lẹ bu iyẹn ne ọ maa ọvbehe gha khian.

⁷ Vbe ọghe ẹmwata, ẹ i re wẹ “iyẹn ne ọ maa” ọvbehe rrọọ, emwi ne ọ ya mwẹ tae, ọrọre wẹ, emwa eso rrọọ ni mu uwa orhiọn rueghe, iran ho ne iran fi iyẹn ne ọ maa ọghe Kristi werriẹ.

⁸ Sokpan, adeghẹ ma nọ, ra odibosa ọre ọ ke ẹrinmwi rre, do kpe orhu iyẹn ne ọ maa ne ọ lughaẹn ne ọnii, ne ima ka kpe ma uwa, ẹrinmwi erhẹn ọrọre ọ ghe ẹe!

⁹ Ma ka tae yi, te I ghi vbe dọlegbe tae na, deghẹ ọmwaikọmwa do kpe orhu iyẹn ne ọ maa ọvbehe ne ọ lughaẹn ne ọnii ne uwa rhan obọ miẹn nẹ, ẹrinmwi erhẹn ọre ọghe ẹe.

¹⁰ Te ọ ghi ye vbe wẹ, te I ho ne emwa ba gha tian mwẹ ma uwa ra? Hiehiere, Osanobua ọ re I ho ne ọ tian mwẹ! Te I ba ho ne emwa hia gha so eni mwẹ nọ ma ra? Akpawẹ vberriọ ọre I ru, I ghẹ ghi sẹtin gha re ọguọmwadia Kristi.

Vbene Pọl Ya Khian Ukọ Hẹ

¹¹ Wa gun mwẹ tama uwa etẹn mwẹ, iyẹn ne ọ maa ne I kpe orhu ẹre, ẹ i re ne ọmwa ne agbọn zẹ ta.

¹² Ẹ i re obọ ọmwa rhọkpa ọre ọ ke rre, ọmwa rhọkpa ma vbe ma mwẹ ẹre, sokpan Jesu Kristi tobọ ẹre ọre ọ rhie ẹre ma mwẹ.

¹³ Wa họn nẹ vbene I gha ru hẹ, ẹghẹ ne I na mu ẹmwẹ ugamwẹ avbe Ju yan uhunmwu, vbene I gue esọsi Osanobua khọn hẹ, I na gha ye ẹtin mwẹ hia gbinna ne I wa fuẹn ọnrẹn uan.

¹⁴ I keghi ye ọrhẹnrhẹn gberra avbe Ju ne iho mwa vbe uwu ugamwẹ avbe Ju. I keghi wa mu ẹmwẹ emwi ne avbe erha mwa odede ru de ẹdẹ yan uhunmwu sẹẹ ẹsẹse.

¹⁵ Sokpan vbe ekpa ẹsọhẹ ọre, uhin vbe a te biẹ mwẹ, Osanobua keghi tie mwẹ ne I do gha gae.

¹⁶ Ọ ghi vbe wẹ rẹn ra rhie ovbi ẹre ma mwẹ ne I miẹn ehe na ya gha kpe orhu Iyẹn Ne ọ maa vbe ekpa ẹre ma iran ne ẹ i re Ju, I ma vbe bu ọmwa rhọkpa wẹ ne ọ bu mwẹ ude,

¹⁷ I ma vbe ye Jerusalẹm ya miẹn avbe iran ni ka gha re ukọ khẹ mwẹ. Sokpan, I na mwa gha rrie Arebia, vbe iyeke ọnii, I na vbe dọlegbe gha die Damaskọs.

¹⁸ Vbe iyeke ukpo eha, I keghi do gha rrie Jerusalẹm, ne I ya họn vbene Pita gha kha hẹ, I keghi gbe uzọla eva vbe ehe ne ọ ye.

¹⁹ Ima ghi vbe miẹn ukọ ọvbehe rhọkpa gberra Jems ne ọtẹn Nọyaẹnmwa.

²⁰ Emwi ne I gbẹnnẹ na, ẹmwata nọ. I ya Osanobua yan ighẹ I ma ta ohoghe.

²¹ Vbe iyeke ọnii, I keghi ya khian sẹ ihe eso vbe Siria kevbe Silisia.

²² Vbe ẹghẹ ne a kha na hia, emwa esọsi Kristi ne rre Juda ma he ye rẹn mwẹ vbe aro.

²³ Emwi ne iran rẹnrẹn ọrọre emwi ne iran họẹn vbe emwa ta khian wẹ, “Oko nii ne ọ te hẹ ida ye ima amẹ, te ọ ghi kpe orhu iyẹn ne ọ maa ne irẹn te wẹ rẹn ra fuẹn uan.”

²⁴ Rhunmwuda ọnii iran keghi rhunmwuda mwẹ rho Osanobua vbe uyi.