Ẹzra 7 - Edo Bible (E Baibol Ẹdo) Version 1996

Ẹzra Rrie Jerusalẹm

¹ Vbe ukpo ni bun vbe iyeke ọnọna, vbe ẹghẹ ne Atakzaziz na gha re Ọgbaisi ọghe Pẹsia, okpia ọkpa kegha rrọọ ne a tie ẹre Ẹzra, ovbi uniẹn Errọn ne Ogie Ohẹn ọre ọ ka egbe ẹre lae vbe nian: Ẹzra kegha re ovbi e Seraia, ne ovbi Azaraia, ne ovbi e Hilkaia,

² ne ovbi e Sailum, ne ovbi e Zadọk, ne ovbi Ahitub,

³ ne ovbi Amaraia, ne ovbi Azaraia, ne ovbi e Meraiọt,

⁴ ne ovbi e Zerahia, ne ovbi Uzi, ne ovbi e Buki,

⁵ ne ovbi Abisiua, ne ovbi e Finihaz, ne ovbi Eliaza, ne ovbi Errọn.

^6-7 Ẹzra kegha re ọgbẹn ebe ne ọ wa rẹn ọnrẹn ẹsẹse ighẹ Uhi ne Nọyaẹnmwa ne Osanobua Izrẹl rhie ne Mosis. Rhunmwuda ne afiangbe Nọyaẹnmwa ne Osanobua ẹre na gha rre Ẹzra egbe, Nọgbaisi keghi wa viọ emwi hia ne ọ nọrẹn ne ẹẹn. Ọ ghi rre ukpo ihinrọn ne Atakzaziz la ẹkete, Ẹzra keghi viọ ivbi Izrẹl eso ba egbe ke Babilọn gha die Jerusalẹm, avbe ohẹn eso kevbe Livai, avbe ọsian Ọgua Osa, iran ni khẹ Ọgua Osa kevbe emwa ni winna eso kegha rre nene usun.

^8-9 Ikpẹdẹ ne okaro, ọghe uki ne okaro, ọ re iran na kpao vbe Babilọn rre, vbe ekpa iyobọ Osanobua, iran keghi do sẹ Jerusalẹm vbe ikpẹdẹ ne okaro ọghe uki ne ogisẹn.

¹⁰ Te Ẹzra wa mu aro ye ẹmwẹ nene uhi e Nọyaẹnmwa ne a ruẹ, kevbe ne a ya ruemwi kevbe ne ọ gha ma ivbi Izrẹl ne uhi kevbe ilele ni rrọọ.

Ebe Emwamwa Ne Ọgbaisi Atakzaziz Viọ Ne Ẹzra

¹¹ Avbe ebe emwamwa ne Ọgbaisi Atakzaziz viọ ne Ẹzra ne ohẹn kevbe ọrẹnbe, ọ re ena khin, ọmwa ne ọ wa vbe rẹn ọnrẹn ẹsẹse ighẹ avbe uhi kevbe iyi ne Nọyaẹnmwa viọ ne ivbi Izrẹl.

¹² “Atakzaziz ne Ọgbaisi ọ re ọ gbẹnnẹ avbe ẹmwẹ na gie Ẹzra ne ohẹn ne ọ vbe re ọrẹnbe ọghe Uhi e Nọyaẹnmwa ne Osanobua Ẹrinmwi.

¹³ “I tae wẹ ne a gie ivbi Izrẹl ni rre otọe arriọba mwẹ hia, avbe ohẹn kevbe avbe Livai, ni ho hia, lele uẹ gha rrie Jerusalẹm.

¹⁴ Mẹ kevbe iran ne ihinrọn ni gun mwẹ zẹ iro, ọ re ọ giọ wẹ ne u ya gualọ otọ vbene emwi hia ye hẹ vbe Jerusalẹm kevbe Juda, ne u miẹn ehe na rẹn vbe ne iran ya ẹe ru emwi hẹ ighẹ Uhi Osanobua ruẹ ne a ka yọ uẹ obọ.

¹⁵ U ghi viọ ehia gha khian ighẹ emwi izọ ese igoru kevbe esiliva, ne imẹ kevbe iran ni gunmwẹ zẹ iro ya mu ohan gie Osanobua Izrẹl ne Ọgua Osa ẹre rre Jerusalẹm.

¹⁶ U ghi vbe viọ esiliva kevbe igoru hia ne u koko vbe otọ arriọba e Babilọn hia, deba emwi imu ohan ne ivbi Izrẹl kevbe avbe ohẹn viọ rre rhunmwuda iwinna Ọgua Osa ọghe Osanobua iran vbe Jerusalẹm.

¹⁷ “U ghi ya ẹwaẹn lo igho na ya dẹlẹ ẹkhuia ẹmila, ke ogho kevbe avbe oteghe ohuan, kevbe ọka, kevbe ayọn, ne uwa ya ehia zọ ese vbe Ogiukpo Ọgua Osa ne ọ rre Jerusalẹm.

¹⁸ Wa sẹtin lo avbe igoru kevbe avbe esiliva ni dekẹe ye emwi ne ọ yẹ uwẹ vbe ivbi ẹvbo ruẹ ne ihua, zẹ vbe ọghe Osanobua uwa.

¹⁹ Wa gha sẹ Jerusalẹm, wa ghi viọ emwi ne a ya le evbare hia ne a viọ ne uwa, ne uwa ya gha ru ugamwẹ vbe Ọgua Osa, gie Osanobua.

²⁰ Avbe emwi ọvbehe hia ne uwa ghi gualọ vbe Ọgua Osa, wa ghi ya viọ vbe aza ẹguae.

²¹ “I yan tama iran ni gbe aro ghe aza ni rre odẹ Orrie otọe e Yufretes hia wẹẹ emwi hia ne Ẹzra a rhirhi nọ ra avbe ohẹn, ra iran ni rẹn Uhi ọghe Osanobua Ẹrinmwi, wa ghi viọ ne iran.

²² Sokpan ne ọ ghẹ bun gberra uwan esiliva iyisẹn isẹn yan arriaisẹn ihinrọn (7,500) okhuae ọka iyisẹn isẹn (500), e galọn ayọn ekigbesiyeha yan iyisẹn isẹn (550), egalọn ẹvbi oliv ekigbesiyeha yan arriaisẹn isẹn (5,050) deba umwẹ vbene iran gualọe yi.

²³ U ghi gbe aro ke otọ ne u ya viọ emwi hia ne Osanobua Ẹrinmwi gualọ vbe Ọgua Osa ẹre yọ, ne u vbe miẹn wẹ ọ ma mu ohu mwẹ ra ọghe iran ni gha rriọba lele mwẹ ẹdẹ ne akhuẹ.

²⁴ Ghẹ koko igho uhunmwu vbe obọ avbe ohẹn ra avbe Livai, ikpemaba, iran ni khẹ odẹ, iran ni winna, ra ọmwaikọmwa ne ọ ghi mwẹ emwi ne ọ ru nẹ vbe Ọgua Osa.

²⁵ “Wẹ ne Ẹzra, u ghi lo ẹwaẹn ne Osanobua ruẹ rhie nuẹn, ne u zẹ iran ni khaemwisẹ kevbe ni bu ohiẹn, ne iran gha gbearoghe avbe emwa hia ni lele Uhi Osanobua ruẹ ru emwi vbe odẹ Orrie e Yufretes. U ghi ma iran hia uhi nii ighẹ avbe emwa ni ma he te ka rẹn ọnrẹn.

²⁶ Ọmwaikọmwa gha rra uhi Osanobua ruẹ ra uhi otọe arriọba, a ghi wa rri ọre oya ẹgiẹgiẹ, deghẹ te a gha gbe ẹe rua, ra ne a khu ẹe gha rrie iwe, ra ne emwi nọ mwẹ khian ọghe ẹvbo ra ne a mu ẹẹn fi ẹwẹdọ.” Ẹzra Rho Osanobua

²⁷ Ẹzra keghi kha wẹẹ, “Wa rho e Nọyaẹnmwa ne Osanobua avbe erha mwẹ odede. Ọ ru ẹe ne ọgbaisi ya ọghọ ne Ọgua Osa e Nọyaẹnmwa ne ọ rre Jerusalẹm vbenian.

²⁸ Vbekpa ẹse ọhẹ Osanobua, I miẹn aro ne ọ maa nẹ vbe obọ ọgbaisi kevbe iran ni gue ẹe ziro, kevbe avbe emwa iwinna ni kọnkọn hia. E Nọyaẹnmwa ne Osanobua mwa rhie igiẹdu mẹ nẹ, I na vbe sẹtin fi eni bun vbe uwu avbe ọkaẹgbẹe Izrẹl ekhọe werrie wẹ ne iran lele mwẹ gha dee.”