Ẹzra 6 - Edo Bible (E Baibol Ẹdo) Version 1996

A Gualo Ẹmwẹ Ne Sairọs Nọgbaisi Tae Miẹn

¹ Ẹre Dariọs Nọgbaisi ghi na wẹ ne a gualọ ehe ne a gbẹnnẹ ẹmwẹ ẹguae yi ni rre Babilọn.

² Sokpan, Ekbata na ne ẹvbo ne ọ rre otọe Midia, ọ re a na ya miẹn ebe ohian ne a gbẹnnẹ avbe ẹmwẹ na yi wẹẹ,

³ “Vbe ukpo ne okaro ne ọ la ẹkete, e Sairọs ne ọgbaisi keghi wẹ ne a dọlọ Ọgua Osa ne ọ rre Jerusalẹm bọ zẹ vbe ne ehe ne a na zọ ese kevbe ehe ne a na giẹn emwi imu ohan. Ọgua Osa ni ghi gha re ibata ekigbesiyisẹn vbe uyomwẹ kevbe ibata ekigbesiyisẹn vbe uvbẹmwẹ.

⁴ Vbene a ra ya gbe ekẹn ọnrẹn ọrọre wẹ a ghi munọ ọgbagba okuta eha yan egbe nẹ, a ghi vbe mu ọghe erhan ọkpa yan rẹn. Aza ẹguae ọre a ra na viọ igho ne a gha ya ha osa emwi ne a loro hia.

⁵ Vbe deba ẹre, avbe emwi ne a lo ọghe esiliva kevbe ọghe igoru ne Nebukiadneza ne ọba viọ ke Ọgua Osa e Jerusalẹm gha die Babilọn, a ghi viọ ehia werriegbe ya ye ihẹ edọmwadẹ ọghọe vbe Ọgua Osa e Jerusalẹm.”

E Dariọs Ne Ọgbaisi Wẹ Ne Iran Gha Winna Iwinna Ni Khian

⁶ E Dariọs ne ọgbaisi keghi rhie ewanniẹn na gie iran: “Tatenai nọ khaemwisẹ otọe orrie Yufretes, Sieta Bozenai, kevbe emwa ni rre asẹ ne ihua a vbe odẹ orrie Yufretes. “Wa ke ẹmwẹ Ọgua Osa ladian.

⁷ Wa ghẹ zẹdẹ guan kan ẹmwẹ ubọmwẹ ọnrẹn, wa gie nọ khaemwisẹ e Juda kevbe avbe ọkaolotu avbe Ju dọlọ bọ Ọgua Osa Osanobua ye ehe ne ọ ka gha ye yi.

⁸ Te imẹ ghi yan tama uwa nian wẹ ne uwa yi iran obọ ya bọe. Igho ne a loro, wa ghi gha rhie igho vbe aza ẹguae vbe igho ne a koko vbe igho uhunmwu vbe otọe orrie Yufretes, ya gha ha ẹre ẹgiẹgiẹ, ne a ghẹ dobọ iwinna ni yi.

⁹ Emwi ne avbe ohẹn a rhirhi kha ma ruẹn vbe Jerusalẹm wẹ iran gualọ, u ghi gha viọ ẹre ne iran ẹdẹgbegbe, vbe nẹ ẹ i na baeku: avbe ivbi ẹkhuia ẹmila, ohuan, oteghe ohuan, ne a ra giẹn uan ya zọ ese ghe Osanobua, ra avbe ọka, umwẹ ayọn ra ofigbọn oliv.

¹⁰ Te a wẹ ne a ru ọna ne iran na gha zọ ese ne ọ gha yẹ Osanobua Ẹrinmwi, ne iran vbe na erhunmwu mẹ ne ọ fiangbe imẹ vbe emọ.

¹¹ I vbe yan tae ba ẹre wẹ a deghẹ a miẹn ọmwa ne ọ ma ru vbene I khare na, a ghi ya wio erhan ne ọ kpọlọ ọkpa vbe owa ẹre, a ghi ka ẹre obọ ọkpa, a ghi ya ẹe ha ẹre ikinnegbe ne ọ ladian vbe obọ nọkpa, a ghi ye owa ẹre ru otiku.

¹² Te Osanobua ni ne ọ zẹẹ Jerusalẹm wẹ evba ọre a gha na gha ga irẹn, gha guọghọ ẹre arriọba a, ighẹ ọbakọba ne ọ ma zẹ ye ẹmwẹ na, ọ na gha ho ne ọ guọghọ Ọgua Osa ne ọ rre evba a. Mẹ ne Dariọs ọ re ọ ta ẹmwẹ na. Ẹmwẹ ne I tae, ta a gha mu ẹẹn sẹ.”

A Ya Ọgua Osa Fiohan

¹³ Ẹkpo nii, Tatenai ne Ne ọ khaemwisẹ, e Sieta Bozenai kevbe avbe ihua iran ni rre asẹ keghi wa ru zẹ vbene enọgbaisi khare.

¹⁴ Obọ keghi kẹ avbe ọkaolotu avbe Ju vbe nene Ọgua Osa ne a bọ vbene Hegai kevbe Zẹkaraia ne akhasẹ na gha rhie igiẹdu ne iran. Iran keghi bọ nene Ọgua Osa fo zẹ vbene Osanobua ọghe Izrẹl kevbe Sairọs, Dariọs, kevbe Atakzaziz ne avbe ọgbaisi e Pẹsia tama iran.

¹⁵ Ọ ghi rre ukpo ne ogiehan ne Dariọs ne Ọgbaisi la ẹkete, iran keghi bọ Ọgua Osa ni fo vbe ikpẹdẹ ne ogieha ọghe uki Ada.

¹⁶ Ẹre ivbi Izrẹl hia, avbe ohẹn, avbe Livai, kevbe emwa nekpa hia fẹẹrẹ ni ke iwe rre, na ya oghọghọ ya Ọgua Osa ni fi ohan.

¹⁷ Emwi ne iran ya do ugie a ya fi ohan kegha re ẹkhuia ẹmila iyisẹn, ohuan uri kevbe oteghe ohuan arria eva, ne iran ya zọ ese, deba ẹwe iweva ne iran ya zọ ese ye orukhọ, ẹwe ọkpọkpa ọghe ẹwae ọkpọkpa vbe Izrẹl.

¹⁸ Iran keghi vbe do mwamwa avbe ohẹn kevbe avbe Livai ye ugamwẹ ne a ru vbe Ọgua Osa ne ọ rre Jerusalẹm, zẹ vbene a mwamwa ẹn ye ebe Mosis.

Alagberra

¹⁹ Avbe emwa ni ke iwe rre keghi do ugie Alagberra vbe ikpẹdẹ ne ogiwenẹ ọghe uki ne okaro ọghe ukpo ne ọ lele ẹe.

²⁰ Avbe ohẹn kevbe avbe Livai keghi họnmwẹ egbe, vbe ne awua ighi na vbe gue iran. Avbe Livai ọ re ọ gbele aranmwẹ ne a ya zọ ese Alagberra ne avbe emwa hia ni ke iwe rre, kevbe ọghe avbe ohẹn kevbe ọghe egbe iran.

²¹ Ivbi Izrẹl hia ni ke iwe rre, kevbe avbe emwa ni lahin odẹ ẹbọ ne iran gho rre, ighẹ avbe emwa ni ka gha rre otọe ni, iran na ghi do ga e Nọyaẹnmwa Osanobua Izrẹl, ọ re ọ rri emwi ne a ya zọ ese nii.

²² Iran keghi ya ikpẹdẹ ihinrọn ghọghọ oghọghọ nọkhua ru Emwiukpo Ebrẹd Ne ọ ma hue. iran kakabọ ghọghọ rhunmwuda, e Nọyaẹnmwa keghi ru ẹe ne Ọgbaisi Asiria gha ru iran ẹse, sẹrriọ wẹ ọ na kakabọ ye iran obọ vbe iran bọ Ọgua Osa ọghe Osanobua Izrẹl.