Ezikiẹl 9 - Edo Bible (E Baibol Ẹdo) Version 1996

A Rri E Jerusalẹm Oya

¹ I keghi họn vbe Osanobua davan kha wẹẹ, “Wa gha die edinran avbe ikpia ni ra rri ẹvbo nii oya. Wa viọ emwi igbinna uwa mwẹ obọ gha dee.”

² Vbe ọwarọkpa nii, arhin ehan keghi ke odẹ onurho ne ọ ke ore vbe odẹ okuọ gha dee, iran viọ emwi igbinna mwẹ. Orhiọnkpa ne ọ ya eto ovbiohuẹ mu egbe keghi lele iran, ọ mu emwi ne a ya gbẹnnẹ emwi mwẹ obọ. Iran hia keghi rre, iran na mudia ye ọkpẹn ogiukpo oze nii.

³ Ẹghẹ nii, awanwan ne woo ne ọ gbe ebiebi ye ọmwa aro ọghe ne a ya rẹn ighe Osanobua Izrẹl rre evba, keghi kpao vbe ehe ne ọ te ye vbe ehe ne avbe emwi ni zẹ ifuẹn ni ye, ọ na gha rrie onurho Ọgua Osa. E Nọyaẹnmwa keghi tie ọmwa ne ọ ya eto ovbiohuẹ mu egbe nii, ọ wẹẹ,

⁴ “Wa ya la e Jerusalẹm hia gaa, ne u vinnọ ama ye uharo avbe iran ni viẹ egbe viẹ ẹhi ye ẹmwẹ uyinmwẹ ne ọ zughu ọmwa ẹko ne iran yin vbe ore ẹvbo.”

⁵ I keghi vbe họn Osanobua tama avbe ikpia nekpa wẹẹ, “Wa lelẹe la ore ẹvbo ne uwa ya gbele emwa an. Wa ghẹ sẹ ọmwa rhọkpa rae, wa ghẹ tohan ọmwaikọmwa.

⁶ Wa gbele avbe ediọnmwa, kevbe avbe edede, igbama kevbe ivbialeke, iye emọ kevbe emọ. Sokpan, wa ghẹ ya obọ kan emwa ne ama rre ọre uharo. Wa wa suẹn vbe Ọgua Osa mwẹ vbe emwa na.” Rhunmwuda ọnii, iran keghi wa ye avbe ọkaolotu ni mudia vbe Ọgua Osa vba suẹn.

⁷ Osanobua keghi khama rẹn wẹẹ, “Ru Ọgua Osa awua. ya ikun orinmwi vuọn ore ẹre hia. De yan iwinna gha winna.” Ẹre iran na suẹn gha gbele emwa ni rre ẹvbo nii.

⁸ Ẹghẹ ne iran na wa gha gbele emwa khian nii, mẹ okpa ọ re ọ gha rre evba. I keghi de mu aro rhu otọ, I na datu wẹẹ, “E Nọyaẹnmwa ne Udazi, te ohu wa mu uwẹ sẹrriọ ra ne u ra na wa gbele emwa ni ghi kẹe vbe Jerusalẹm fo?”

⁹ Osanobua keghi wanniẹn wẹẹ, “Orukhọ dan ọre ivbi Izrẹl kevbe ivbi e Juda ru. Iran de izigha vbe ehe hia, iran keghi vbe ya orukhọ vuọn Jerusalẹm. Iran wẹ, mẹ ne Nọyaẹnmwa fi iyeke gbe ẹvbo iran nẹ, I i ghi bẹghe iran.

¹⁰ Sokpan mẹ i ra tohan iran hiehiere. I gha ru iran vbene iran ru emwa ọvbehe.”

¹¹ Ẹre ọmwa ne ọ yọ ukpọn eto ovbiohuẹ nii na dọlegbe rre do na iyẹn ma e Nọyaẹnmwa wẹẹ, “I ru nẹ vbene u giee.”