Ezikiẹl 8 - Edo Bible (E Baibol Ẹdo) Version 1996

UMIAN NE OGIEVA NE EZIKIẸL MIẸN OSANOBUA ( 8:1—10:22 ) Iruẹbọ Vbe Jerusalẹm

¹ Vbe ikpẹdẹ ne ogisẹn ọghe uki ne ogiehan vbe ukpo ne ogiehan ne ima yae vbe iwe, avbe ọkaolotu iran ni rre iwe ni ke Juda rre keghi gunmwẹ tota vbe owa mwẹ. Vbe udomwurri, ẹtin Osanobua ne Udazi keghi hin yan mwẹ.

² I keghi tọn aro mu I na ya bẹghe ama erhẹn okpa ne akpa ẹre yevbe ọmwa nagbọn. Ke ẹkun gha rrie otọ, egbe ẹre keghi yevbe erhẹn, vbe ke ẹkun gha rrie odukhunmwu, ọ keghi fi wainwain zẹ vbe ẹrọnmwọ ne a kpee.

³ Ọ ke ghi niẹn emwi ne ọ yevbe obọ ladian, ọ na mu mwẹ eto. Vbe umian na, orhiọn Osanobua keghi tọn mwẹ mu ghe odukhunmwu ẹsẹse, ọ na mu mwẹ gha rrie Jerusalẹm. Ọ keghi rhie mwẹ gha rrie onurho ne ọ ke uwu ẹre vbe obọ ne ọ laghe odẹ ahọ vbe Ọgua Osa, ehe ne ẹbọ okpa ne ọ wa mu Osanobua ohu ye.

⁴ Evba nii i ọ re I na bẹghe ukpa ne wanna ne ọ gbe ebiebi ye ọmwa aro, ne ọ rhie ma ighe Osanobua Izrẹl rre evba, zẹ vbene I wa miẹn ọẹn vbe ọkpẹn Ẹzẹ Kiẹba.

⁵ Osanobua keghi tama mwẹ wẹẹ, “Ovbi ọmwa, tọn aro mu ghe odẹ okuọ.” I keghi ghe ẹre, I ghi ya ghe ẹbọ ne ọ mu Osanobua ohu wa rre ọkpẹn ogiukpo vbe ehe ne a la la onurho.

⁶ Osanobua keghi tama mwẹ wẹẹ, “Ovbi ọmwa, a deghẹ u miẹn emwi ne ọ sunu? Ghe emwi ni hu ọmwa ẹko ne ivbi Izrẹl ru vbe emwa na, iran wa dọlegbe khu mwẹ khian rrei vbe ehe nọhuanrẹn mwẹ. U gha ye miẹn emwi ni ru ọghe emwiekhue sẹ ọna.”

⁷ Ọ keghi mu mwẹ gha rrie onurho ore vbe ọgua ore, ọ keghi ma mwẹ uvun okpa vbe egbe ekẹn.

⁸ Ọ wẹẹ, “Ovbi ọmwa, guọghọ ekẹn na ladian vbe emwa na. I ghi guọghọ ẹe ladian, I keghi miẹn urho ọkpa.”

⁹ Rẹn keghi tama mwẹ wẹẹ, “La uwu ẹre ne u ya ghe avbe emwi ni hu ọmwa ẹko ne iran ru vbe evba.”

¹⁰ I keghi gele la uwu ẹre ya ghe ẹre. Iran keghi gbẹnnẹ ama avbe ẹyẹn kevbe avbe aranmwẹ ni ma huan ọvbehe hia gba egbekẹn ọnrẹn, do deba avbe emwi ọvbehe hia ne Izrẹl gha gho.

¹¹ Avbe ọkaolotu Izrẹl ekigbesiyenẹ kegha rre evba, kevbe Jaazanaia ne ovbi e Siafan. Dọmwadẹ ọghọe keghi mu emwi ne a ya gien eturari mwẹ obọ, eturari nii kegha zẹ ighogho ladian.

¹² Osanobua keghi nọ mwẹ wẹẹ, “U ma miẹn emwi ne avbe ekaolotu ivbi Izrẹl ru vbe ẹkhokho. Iran gha ga vbe ọgua ne ọvuọn ne avbe akobiẹ. Emwi ne iran wẹ ọ ya iran ru ẹe ọrọre wẹẹ, ‘E Nọyaẹnmwa ma degue ima, ọ fi iyeke gbe ẹvbo ima nẹ.’ ”

¹³ E Nọyaẹnmwa keghi tama mwẹ wẹẹ, “U gha ye miẹn vbe iran a gha ru emwi ne ọ zughu ọmwa ẹko sẹ ọna.”

¹⁴ Ẹre ọ na rhie mwẹ gha rrie onurho odẹ okuọ vbe Ọgua Osa, ọ na ma mwẹ avbe ikhuo ni viẹ wẹ e Tamoz ne ẹbọ wu.

¹⁵ Rẹn keghi nọ wẹẹ, “Ovbi ọmwa, adeghẹ u bẹghe ọnii? U gha yevbe miẹn emwi ne ọ hu ọmwa ẹko sẹ ọna.”

¹⁶ Ọ na rhie mwẹ gha rrie ọgua ne ọ ke uwu ẹre vbe Ọgua Osa. A ghi do ghe ikpia isẹn yan ugie mudia ye ẹkpo onurho ne a la la uwu ehe nọhuanrẹn kevbe ogiukpo. Iran viọ iyeke da ehe nọhuanrẹn. Iran wa kakabọ ghughẹrre ghe odẹ ahọ, iran gha ga owẹn ne ọ da yan rre dee.

¹⁷ E Nọyaẹnmwa keghi tama mwẹ wẹẹ, “Ovbi ọmwa a deghẹ u miẹn onii, ivbi e Juda na, ẹko ẹre ma vuọn iran ighe emwi ne ọ zughu ẹko ne iran ru zẹ vbene u miọẹn na, kevbe ne iran gha yin uyinmwẹ ikẹtin vbe otọe na hia. Sokpan, te iran gha rre do ru ẹe vbe uwu Ọgua Osa tobọ ẹre ne a miẹn ehe na kakabọ ya ohu mu mwẹ. A deghẹ u miẹn vbene iran la odẹ ne ọ ghi sọnnọ sẹẹ ehia yagha mwẹ hẹ.

¹⁸ Obọ ohu mwẹ gha vba iran. I i ra sẹ iran rae, a ma wẹ ne I tohan iran. Iran gha go gboo gha na erhunmwu ghe mwẹ, sokpan I i zẹ ye iran ẹre.”