Ezikiẹl 7 - Edo Bible (E Baibol Ẹdo) Version 1996

Ẹghẹ Ufomwẹ Izrẹl Bu Otọ Nẹ

¹ E Nọyaẹnmwa keghi tama mwẹ wẹẹ,

² “Ovbi ọmwa, ẹmwẹ ne imẹ ne Nọyaẹnmwa ne Udazi tama ivbi Izrẹl ọre ọna khin: Ufomwẹ otọe ni rre nẹ!

³ “Izrẹl, ufomwẹ rre nẹ, wa gha họn ẹmwẹ ohu mwẹ vbe egbe, rhunmwuda, I ra rria uwa ikhi ye emwi ne uwa ru. I gha ha uwa osa uyinmwẹ ne ọ hu ẹko ne uwa yinrin.

⁴ Mẹ I ra sẹ uẹ rae ra ne I tohan ruẹn hiehiere. I ra rria uwa ikhi ye uyinmwẹ ne ọ hu ẹko ne uwa yinrin, ne uwa miẹn ehe na rẹn wẹ mẹ ọrọre Nọyaẹnmwa.”

⁵ Emwi ne Nọyaẹnmwa ne Udazi khare ọ re ọna khin, “Ọkhọ ra do rruan uwa ke egbe ke egbe.

⁶ Ọ fo vbotọ. Ufomwẹ ọnrẹn ọ re ọna khin. Ọghe uwa fo nẹ.

⁷ Ufomwẹ dee ne uwa ni rre otọe nii. Ẹghẹ dee ne ai ghi ra na gha do ugie ọyọ vbe avbe uhunmwu oke, otighi ghi gha rre ehia.

⁸ “Vbe ọ ma he kpee wan, wa gha họn obọ ohu mwẹ ne ọ wegbe vbe egbe. Te I ra bu ohiẹn uwa rhunmwuda emwi ne uwa ru, I gha vbe ha uwa osa vbe emwi ne ọ hu ẹko ne uwa ru.

⁹ Mẹ i ra sẹ uwa rae, ra ne I tohan uwa. I ra rria uwa ikhi ye uyinmwẹ ne ọ hu ẹko ne uwa yinrin, nu uwa miẹn ehe na rẹn wẹ mẹ ọrọre Nọyaẹnmwa kevbe wẹ, mẹ ọ re ọ rri uwa oya.”

¹⁰ Ẹdẹ ọfuan dee. Uyinmwẹ ikẹtin ra gba ehehia. Itengbemu hin ukpo ne ọ yo.

¹¹ Uyinmwẹ ikẹtin do khian ọghe ne a ya ru ọkhọ. Emwi ne ọ re ọghe iran, okpa ne ọ gha kẹe, ẹi rrọọ, ẹi ghi kẹe vbe ẹfe iran, ose iran ra uyi iran.

¹² Ẹghẹ wa dee. Ẹghẹ nii sotọ fo, ne a gha na miẹn wẹ ne a gha dẹ emwi, ra ne a gha khiẹn i ghi mwẹ esa, rhunmwuda, Osanobua ra ye abọ okpa nii rria emwa hia ikhi.

¹³ A i ghi ra miẹn ọduẹki ne ọ gha tọ sẹ vberriọ, ne ọ gha na miẹn ere emwi ne ọ te wi ẹre werriegbe, rhunmwuda, obọ irriaikhi Osanobua gha vba emwa hia. Iran ne emwa dan i ra miẹn uhunmwu.

¹⁴ Okpe tu, agbọn wa vbe mu egbe, sokpan a i miẹn ne ọ gha yo okuo rhunmwuda obọ Osanobua vba emwa hia vbe abọ okpa nii.

A Rria Izrẹl Ikhi Ye Orukhọ Ẹre

¹⁵ Igbinna wa rre adesẹ ore, emianmwẹ kevbe ohanmwẹ wa rre uwu owa. Ọmwaikọmwa ne ọ fi owẹ hin ore ẹvbo rre, ladian gha wu ye igbinna nii, emwa ni vbe rre ore ẹvbo, obọ emianmwẹ kevbe ohanmwẹ gha vba iran.

¹⁶ Eso gha lẹ la uhunmwu oke zẹvbe avbe idu ne a runraẹn ladian vbe uwu iya. Dọmwadẹ ọghọe gha khiẹ ye orukhọ ẹre.

¹⁷ Obọ edọmwadẹ ọghọe gha luẹluẹ, igue ghi vbe gha degbe egbe.

¹⁸ Iran gha viọ ukpọn akhiẹ ye egbe, iran ghi gha guẹ kpẹkpẹkpẹ. A gha zẹlẹ iran hia eto, a ghi vbe fa iran uan.

¹⁹ Iran gha filo avbe igoru kevbe esiliva iran kua vbe adesẹ ore zẹvbe iku, rhunmwuda, ke igoru kevbe esiliva, okpa ne ọ gha miẹn iran fan i rrọ vbe ẹdẹ ne Nọyaẹnmwa gha hihiẹ ohu ẹre ladian. Iran i ra sẹtin lo iran ya rhie emwi ne ẹko ho ne ẹko. Igoru kevbe esiliva ọ re ọ si iran la orukhọ ne a ru.

²⁰ Ẹghẹ okpa, iran keghi gha ya ikpẹrọnmwọ itegbe iran ni mose hio, sokpan, iran keghi ya iran gha mannọ amazẹ ni hu ọmwa ẹko. Ọnii ọ si ẹe ne Nọyaẹnmwa na ya ẹfe iran khian ne ọ ghi sọnnọ iran.

²¹ “I gha gie avbe erhunmwuyẹn do iran emwi hẹ,” erriọ e Nọyaẹnmwa khare. “Iran ni rra uhi gha vbe viọ ẹfe iran hia, iran ghi rhia ehia a.

²² Mẹ i ra vbe guan yọ vbe iran gha ru awua vbe Ọgua Osa mwẹ ne mose, vbe avbe ikpata a khọn la rọ ya ru ẹre awua.

²³ “Emwi hia lighi ua, avbe izigha gba otọe hia, uyinmwẹ ikẹtin vbe gba ore ẹvbo.

²⁴ I gha viọ uhunmwu ẹvbo ne ọ ghi rrei sẹẹ gha die emwa na. I ghi gie iran mu uwa miẹn uwa owa. Emwa uwa ni wegbe sẹẹ gha mitan uan vbe ẹghẹ ne I gha na gie avbe uhunmwu ẹvbo nii, do mu awua la ehe ne uwa na ga.

²⁵ Egbe wọmwẹ dee. Wa gha gualọ ọfumwegbe, wa i ra vbe miẹn ọẹn.

²⁶ Ọkhọ okpa gha lele ọvbehe. Iyẹn dan ghi gha gbe usun rre. Wa gha rinmwian avbe akhasẹ ne iran ta emwi ne iran miẹn. Avbe ohẹn i ghi ra miẹn emwi ma emwa ẹre, avbe eniwanrẹn i ra vbe miẹn ude bu.

²⁷ Ọba gha khiẹ, ovbi ọba gha rhie aro hin rre, emwa ghi gha guọ ba ẹmwẹ ohan. I gha rria uwa ikhi ye emwi ne uwa ru hia, I ghi vbe bu ohiẹn uwa zẹ vbene uwa vbe ya bu ohiẹn ẹrrẹe. Ọna gha rhiema ighe mẹ ọrọre Nọyaẹnmwa.”