Ezikiẹl 6 - Edo Bible (E Baibol Ẹdo) Version 1996

E Nọyaẹnmwa Gui Ye Ẹmwẹ Ẹbọ Ne A Ga

¹ E Nọyaẹnmwa keghi gunmwẹ guan, ọ wẹẹ,

² “Ovbi ọmwa, mu aro da avbe oke Izrẹl ne u tama iran uhunmwu ne I giee.

³ Tama avbe oke Izrẹl ne iran danmwehọ vbene e Nọyaẹnmwa ne Udazi khare, ne iran họn ẹmwẹ ne imẹ ne Nọyaẹnmwa ne Udazi tama avbe oke nekhua ke negiẹrẹ, avbe ugboghodo kevbe iya: I gha gie umozo ne ọ do guọghọ ehe ne emwa na ga avbe ẹbọ rua.

⁴ A gha siẹn avbe Ogiukpo ni rrọ sotọ, a gha vbe dunmwu avbe Ogiukpo eturari hẹ kua. A gha gbele emwa hia ni rre evba ye odaro ẹbọ nii.

⁵ I gha zagha ikun orinmwi ivbi Izrẹl, I gha zagha ugboloko iran lẹga nene Ogiukpo.

⁶ A gha dunmwu avbe okpẹvbo ni rre Izrẹl hia, a ghi vbe miẹn wẹ avbe Ogiukpo kevbe avbe ẹbọ iran hia ghi khian ne a guọghọ ua rẹnkhẹnrẹnkhẹn, avbe Ogiukpo eturari iran, a gha duẹ ehia a, a ghi ho emwi hia ne iran ru bẹkun.

⁷ A gha gbele emwa vbe ehe hia, iran ni ghi miẹn uhunmwu vbọ gha miẹnkue wẹ mẹ ọrọre Nọyaẹnmwa.

⁸ “I gha gie eso vbọ lẹ ugbemwẹ na fe, ne a zagha iran gba avbe uhunmwu ẹvbo hia,

⁹ ehe ne iran gha na gha rre iwe. Evba nii ọre iran gha na ye mwẹ rre, iran ghi vbe rẹn we mẹ ọ re ọ rrii iran oya, I na vbe fa iran an, rhunmwuda ekhọe iran nẹi guobọ ọmwa he mwẹ yotọ, iran keghi rhie egbe lele ẹbọ ne ọ yẹ iran sẹẹ imẹ. Ẹmwẹ egbe iran gha sọnnọ iran rhunmwuda emwi dan kevbe emwi ifaegbua ne iran ru.

¹⁰ Iran gha rẹn wẹ mẹ ọrọre Nọyaẹnmwa kevbe wẹ, ẹmwẹ ne I tama iran yotọ khẹ ọ dee i zẹdẹ re orhuọ ifianyanegbe hiehiere.”

¹¹ E Nọyaẹnmwa ne Udazi khare wẹẹ, “Ma khinkhiẹn egbe ua! Gbe igiẹngian! Vbe viẹ egbuẹ ua! rhunmwuda emwi dan ni hu ọmwa ẹko ne ivbi Izrẹl ru. Te iran ra ya wulo ye okuo, ra ohanmwẹ ọ ra gbele iran an, ra emianmwẹ.

¹² Iran ni rre urria gha khuọnmwi, iran ghi wulo, iran ni ma khian rrei, okuo gha gbele iran. Iran ni miẹn uhunmwu vbọ, ohanmwẹ gha gbele iran an. Obọ ẹtin ohu mwẹ gha da iran.

¹³ A gha zagha avbe ikun orinmwi gba ehe ne avbe ẹbọ ye kevbe lẹga ogiukpo, a gha zagha ẹe lele avbe oke ni yo hia, vbe uhunmwu avbe oke nekhua hia, ototọ erhan ni mwẹ ebe hia, kevbe avbe okan ni kọnkọn, vbe ehe hia ne iran ghi na giẹẹn ese ne ẹbọ iran. Ẹghẹ nii, emwa hia gha rẹn ighe mẹ ọrọre Nọyaẹnmwa.

¹⁴ Vbe ẹmwata, I gha nien obọ mwẹ ladian, I ghi dunmwu ẹvbo iran an, I gha ya ẹe khian otọe ne ọ gbe ẹvbi ke ato ne ọ rre odẹ ekẹn kpao, ya sẹ ore Ribla vbe odẹ okuọ vbene I i ra na vbe sẹ okpa rae vbe uwu ẹvbo hia ne ivbi Izrẹl ghi ye nẹ. Ẹghẹ nii, emwa hia gha rẹn ighe mẹ ọrọre Nọyaẹnmwa.”