Ezikiẹl 5 - Edo Bible (E Baibol Ẹdo) Version 1996

Ezikiẹl Zẹ Eto

¹ E Nọyaẹnmwa keghi kha wẹẹ, “Ovbi ọmwa, rhie umozo ne ọ mu ne u ya ẹe zẹ ẹtu ruẹ kevbe eto ruẹ hia kua. U ghi ya esike mwa eto nii ne u gha ẹre ye ihe eha.

² U ghi gien obọkpa vbọ vbe adesẹ ore ẹvbo nii vbe okuo a ghi khọn gberra nẹ. U ghi viọ obọ ne ogieha nọkpa, u ghi ya umozo nii gha giagia ẹe kua vbe u a gha khian lẹga vbe u a ghi lahin ore ẹvbo nii rre nẹ. U ghi zagha obọ ne ogieha ne ọ dekẹe ku ẹhoho, mẹ gha ya umozo mwẹ khu ẹe.

³ Viọ eto eso kherhe hin rre, u ghi rri ẹe ye abọ ukpọn ruẹn.

⁴ U ghi dọlegbe viọ ekherhe vbọ, viọ ẹre ku erhẹn ne u gie ẹe gien uan. Evba nii ọ re erhẹn ra ke mu la otọ Izrẹl hia.”

⁵ Osa ne Udazi keghi kha wẹẹ, “Ghe Jerusalẹm, I rhie ẹre ye adesẹ otọ agbọn hia, vbene avbe ẹvbo nekpa hia na yọyọ lẹga ẹre.

⁶ Sokpan, e Jerusalẹm keghi sọtẹ ghe uhi mwẹ, ọ keghi rhie ma wẹ rẹn ọ re ọ ru ọmwa dan sẹẹ avbe ẹvbo nekpa, rẹn ọ re ọ vbe zẹ utun vbe ehọ sẹẹ avbe ẹvbo nekpa ni lẹga ẹre. E Jerusalẹm he iyi mwẹ yotọ, ọ keghi vbe he ne ọ mu uhi mwẹ sẹ.

⁷ Banbanna nian, e Jerusalẹm, danmwehọ ẹmwẹ ne imẹ ne Nọyaẹnmwa ne Udazi khare. Rhunmwuda ighe u ma mu uhi mwẹ sẹ kevbe ne u ma na ya iyi mwẹ ru emwi, wẹ ọ re ọ he si ẹti sẹẹ avbe uhunmwu ẹvbo ni lẹga ruẹ. Uyinmwẹ avbe ẹvbo ọvbehe ọ re u lele.

⁸ Rhunmwuda ọnii, te imẹ ne Nọyaẹnmwa ne Udazi ghi tama ruẹn nian ighe oghian an ọ re I khin. Igha bu ohiẹn ruẹn vbe ehe ne aro uhunmwu ẹvbo hia gha na sẹ ọe.

⁹ Rhunmwuda emwi ni sọnnọ mwẹ hia ne u ru, I gha rri e Jerusalẹm oya gberra vbene I he ka ru ẹe sẹ ẹdẹ, kevbe vbene I i ghi ra dọlegbe ru ẹe ọvbehe.

¹⁰ Rhunmwuda emwi na, evbibiẹ emọ gha gbele ivbi iran re vbe Jerusalẹm, emọ ghi vbe gha rri evbibiẹlẹ iran. I gha rri uwa oya, iran ni ghi vbe kẹe vbọ, ni ghi rre agbọn, I gha zagha iran gba ehe hia.

¹¹ Rhunmwuda ọnii, zẹ vbe Osanobua ne ọ rrọọ ne imẹ khin, vbenian ọ re e Nọyaẹnmwa ne Udazi khare, rhunmwuda ne uwa na ye avbe emwi dan ni hu ẹko ne uwa ru mu awua ye Ọgua Osa mwẹ, I gha giagia uwa gbotọ vbe ne a i na mwẹ itohan.

¹² A gha wa uwa ye ihe eha, ohanmwẹ kevbe emianmwẹ gha gbele obọkpa vbọ ye adesẹ ore ẹvbo, a gha ya umozo giagia obọkpa vbọ ye vbe a ladian ore ẹvbo ne, I gha zagha obọkpa ne ọ ghi kẹe vbọ ku ẹhoho, I ghi ya umozo gha khulo iran khian.

¹³ “Wa gha họn ẹmwẹ obọ ohu kevbe okuosu mwẹ vbe egbe, a te do miẹn wẹ ẹko ẹre vuọn mwẹ. Ena hia ghẹ ghi sunu nẹ, wa ghi do rẹn wẹ te imẹ ne Nọyaẹnmwa gu uwa guan rhunmwuda ohu mu mwẹ ye uyinmwẹ a ma guobọ ọmwa uwa.

¹⁴ Emwa hia ni ke avbe ẹvbo ni lẹga uwa rre, ni la ehe ne uwa ye gberra, gha yọn ghe uwa, iran ghi gban egbe ne uwa.

¹⁵ “Ohu uwa gha kakabọ mu mwẹ, I na rri uwa oya, avbe ẹvbo ni lẹga uwa gha runran. Iran gha yan aroa gha ghe uwa, iran ghi ya uwa gha gbogiẹ.

¹⁶ I gha dobọ evbare ne ọ rrie ehe ne uwa ye yi ne ohanmwẹ miẹn ehe na gbe uwa. Wa gha miẹn obalọ ohanmwẹ nii zẹ vbe ọghe ifẹnmwẹ ni mu ne a ya salọ uwa, ne ọ gbele uwa a.

¹⁷ I ghi gie ohanmwẹ, kevbe aranmwẹ oha, ne iran gbele uwa emọ, I ghi gie ohanmwẹ, ọkhọ kevbe okuo ne iran gbele uwa a. Mẹ ne Nọyaẹnmwa ọre ọ taa ẹe.”