Ezikiẹl 47 - Edo Bible (E Baibol Ẹdo) Version 1996

Ẹzẹ Ne Ọ Ke Uwu Ọgua Osa Lẹ Ladian

¹ Ọmwa nii keghi rhie mwẹ werriegbe gha rrie onurho Ọgua Osa. Amẹ kegha ke ototọ onurho nii ladian, ọ na gha lẹ ghe odẹ ahọ, odẹ ne Ọgua Osa vbe mu aro da. Odẹ ekẹn ọghe Ọgua Osa ọ re ọ kegha lẹ ladian, ọ na la odẹ ekẹn ọghe Ogiukpo gberra.

² Ọmwa nii keghi rhie mwẹ la onurho odẹ okuọ ladian vbe Ọgua Osa, ọ na rhie mwẹ lẹga gha rrie onurho ne ọ mu aro da odẹ ahọ. Ovbi ẹzẹ kherhe kegha lẹẹ la onurho odẹ ekẹn ladian.

³ Ọmwa nii keghi ya erhan ne ọ ya mwa emwi mwaa ibata eha iyeva irrọvbe urieha (560) ghe odẹ nẹ ẹzẹ lẹghe vbe odẹ ahọ, ọna wẹ ne I ya owẹ fian ẹzẹ nii rra vbe evba. Urhuawẹ ọkpa ọre ẹzẹ nii sẹ mwẹ re vbe evba.

⁴ Ọ keghi vbe mwaa ibata eha iyeva irrọvbe urieha (560) ọvbehe, amẹ nii keghi sẹ mwẹ igbọn vbe evba ọ keghi vbe sikẹ ototọ mwaa ibata eha iyeva irrọvbe urieha (560) amẹ nii keghi sẹ mwẹ ẹkun.

⁵ Ọ keghi vbe mwaa ibata eha iyeva irrọvbe uri eha (560) ọvbehe vbe evba nii, ẹzẹ nii keghi kakabọ dinmwi, I ma sẹtin ya owẹ fian ẹẹn rra, vbe ẹ i re te a khue lae.

⁶ Rẹn keghi tama mwẹ wẹẹ, “Ovbi ọmwa, kakabọ yi avbe emwi na hia ẹro.” Ẹre ọmwa nii na dọlegbe rhie mwẹ gha rrie ọkpẹn ẹzẹ nii.

⁷ I ghi sẹ evba, I keghi miẹn wẹ erhan wa bun ẹsẹse vbe ọkpẹn ẹzẹ nii.

⁸ Rẹn keghi tama mwẹ wẹẹ, “Ẹzẹ na, te ọ wa lẹẹ la odẹ ahọ la otọe na hia gha rrie Iya e Jọdan gha rrie Okun Nọwu, ọ keghi ya ye amẹ ne ọ gie a wọn rhie ihe amẹ umwẹ ne ọ te rre ẹzẹ nii.

⁹ Eheikehe ne ẹzẹ nii a rhirhi lẹ ghe, avbe aranmwẹ kevbe ehẹn ughughan ghi gha rrọ. Ẹzẹ na gha ya Okun Nọwu khian ne amẹ ọnrẹn gie a wọn, eheikehe ne ọ rhirhi lẹ la, emwi ghi gha maa vbọ.

¹⁰ Wa ke Ẹzẹ Ẹngẹdi gha khian, ya sẹ Ẹzẹ Ẹneglem, a gha miẹn avbe ọgbehẹn vbe ọkpẹn okun nii, iran ghi vbe tan ọga iran ye evba ne ọ ka. A gha miẹn ehẹn ughughan ni bun vbe evba zẹ vbene ọ rre Okun e Meditẹrrenian.

¹¹ Sokpan, amẹ ni rre ekhuọrhọ kevbe ivbi odin ni rre ọkpẹn ọnrẹn i ra gha maa. Iran gha ye gha rre evba zẹ vbe ehe ne a ke zẹ umwẹ rre.

¹² Erhan ughughan gha zọ vbe obọ eva vbe ọkpẹn ẹzẹ nii ne iran gha rhie evbare ne a re rre. Ebe iran i ra kaka ẹdẹ, a i vbe miẹn wẹ iran dobọ umọmwẹ yi. Uki uki ọre iran gha ya gha mọ ọmọ ọgbọn, rhunmwuda, ẹzẹ ne ọ ke uwu Ọgua Osa lẹ rre, ọ re ọ rhie amẹ ne iran. Ọmọ ne iran mọẹn, a ghi gha rri ọe, ebe ni rrọ ghi gha re ukhunmwu ne a ya sinmwi emwa.”

Ehe Ne Otọe Nii Lae

¹³ E Nọyaẹnmwa ne Udazi keghi kha wẹẹ, “Ehe ne ọ lae ọna khin ighe otọe nii ne a ra ghae ne avbe ẹwae iweva nii, vbene ukhukhu eva gha na sẹ ẹwae Josẹf obọ.

¹⁴ Te I wa yan ma avbe erha uwa odede wẹ I gha mu otọe na ne iran, banbanna nian, wa gha ẹre umwọmwẹ ne egbe uwa.

¹⁵ “Ehe ne ọ lae vbe odẹ okuọ keghi ke Meditẹrrenian la ghe odẹ ahọ ya sẹ ẹvbo Hẹtlọn kevbe Ada Hamat, ya sẹ ẹvbo e Zẹdad,

¹⁶ ya sẹ ẹvbo Berota kevbe Sibraim. (Ẹkpo ne ọ rre otọe arriọba e Damaskọs kevbe otọe arriọba Hamat ọ re nọ) kevbe ya sẹ ore Tikọn (ọkpẹn uwu ọghe otọe arriọba Hauran ọ re nọ.)

¹⁷ Ẹre a na miẹn wẹ ehe ne ọ lae vbe odẹ okuọ keghi ke Meditẹrrenian vbe odẹ ahọ kpao ya sẹ Ore nọkhua Enọn, vbene Damaskọs kevbe Hamat na rre otọe arriọba ne iran gba mwa uwu vbe odẹ okuọ.

¹⁸ “Ehe ne ọ lae vbe odẹ ahọ keghi ke ihọkpa vbe ẹkpo otọe Damaskọs kevbe Hauran, vbene Ẹzẹ Jọdan na gha re uwu ne ọ rre ẹkpo Izrẹl vbe odẹ orrie kevbe Giliad vbe odẹ ahọ rhinrin ya se e Tama vbe uwu Okun Nọwu.

¹⁹ “Ehe ne ọ lae vbe odẹ ekẹn keghi ke Tama laghe odẹ ekẹn ya sẹ ehe ne oha ye vbe uwu ato ne a tie ẹre Kedẹs Mẹriba, ọ keghi vbe laghe odẹ okuọ vbe orrie lele ọkpẹn Igipt ya sẹ Okun e Meditẹrrenian.

²⁰ “Ehe ne ọ lae vbe odẹ orrie keghi re Meditẹrrenian, ọ keghi laghe odẹ okuọ ya sẹ ako ọkpa vbe odẹ orrie ọghe Ada e Hamat.

²¹ “Wa ghi ghae otọe na ne dọmwadẹ ẹwae ne uwa mwẹ,

²² te ọ khian gha re emwiobọ uwa ẹdẹdẹmwẹdẹ. Avbe erriọvbe ni rre ẹkpo uwa, ni vbe biẹlẹ nẹ vbe ẹvbo uwa, wa ghi vbe ghae sẹ iran obọ vbe otọ nii vbe uwa a gha ẹre. Obọ ne a ya mu ivbi eseserese vbe Izrẹl ọ re a vbe ya gha mu iran. Te iran gha vbe gu ẹwae Izrẹl zẹ vbe uta ne a ya gha otọe nii.

²³ Ehe ne a na gha sẹ ẹwae ne iran ye obọ ighe avbe erriọvbe nii, ọre a gha na vbe gha ghae sẹ iran obọ. Mẹ ne Nọyaẹnmwa ne Udazi ọ re ọ tae.”