Ezikiẹl 44 - Edo Bible (E Baibol Ẹdo) Version 1996

Vbene A Lo Onurho Odẹ Ahọ Hẹ

¹ Ọmwa nii keghi rhie mwẹ gha rrie urho ore vbe obọ ne ọ mu ghe odẹ ahọ vbe ehe ne a bọ Ọgua Osa yi. A khui urho ne ọ rrọ.

² E Nọyaẹnmwa keghi tama mwẹ wẹẹ, “Erriọ ọ re a ra wa khui urho na, a i ghi dọlegbe kie ẹre ọvbehe. A i kue ne ọmwa nagbọn la ẹe rhunmwuda, mẹ ne Nọyaẹnmwa ne Osanobua Izrẹl la evba nii la owa nẹ. Te a ra khui ẹre gbua.

³ Sokpan, ovbi ọba ne ọ rre asẹ sẹtin gha rrie evba ya rri evbare nọhuanrẹn vbe odaro mwẹ. Ughugha nọkhua ne ọ ke uwu ẹre ọ re ọ gha la la onurho nii vbe la ladian.”

Ilele Ne A Ya Rhie Ọmwa La Ọgua Osa

⁴ Ọmwa nii keghi rhie mwẹ la urho odẹ okuọ gha rrie odaro Ọgua Osa. I ghi ghee ẹre, I keghi miẹn wẹ Ọgua Osa e Nọyaẹnmwa vuọn ne uwanmwẹ ne wainwain ne a ya rẹn ighe ọ rre evba. I keghi dee mu aro rhu otọ.

⁵ E Nọyaẹnmwa keghi tama mwẹ wẹẹ, “Ovbi ọmwa, kakabọ yi emwi hia ne u họẹn kevbe ne u miẹn ẹro. I ra talọ avbe emwamwa kevbe ilele ọghe Ọgua Osa ma ruẹn. Kakabọ yi ọre ẹro ighe avbe emwa ne a kue ne ọ gha la uwu Ọgua Osa ne ọ vbe gha ladian vbọ kevbe avbe emwa ne a i kue ne ọ ru vberriọ.

⁶ “Tama avbe ivbi Izrẹl ne etẹ nii wẹ mẹ ne Nọyaẹnmwa ne Udazi i ghi ra dọlegbe kue ye uyinmwẹ osọnnọ ne iran ka yin dee nii.

⁷ Iran ru awua Ọgua Osa mwẹ vbekpa ne iran na gie avbe iran ni ma rhuẹ, avbe orhunmwuyẹn ne ẹ i họn ẹmwẹ mẹ, gha la uwu Ọgua Osa vbe ẹghẹ ne a ya ye ẹvbi aranmwẹ kevbe esagiẹn zọ ese ghe mwẹ. Rhunmwuda ọnii avbe emwa mwẹ rra uhi mwẹ vbekpa uyinmwẹ osọnnọ ne iran yin.

⁸ Iran ma gbearoghe ilele itaemwi ni rre Ọgua Osa mwẹ, sokpan, iran keghi viọ avbe erriọvbe yọ ne iran gha gbearoghe ẹre.

⁹ “Mẹ ne Nọyaẹnmwa ne Udazi ọre ọ tae wẹ, a ghẹ gie ọrriọvbe ne ọ ma rhuẹ, ọmwa ne ẹ i họn ẹmwẹ mẹ, ya sẹ egbe avbe orhunmwuyẹn ni rre uwu ẹbu ivbi Izrẹl la uwu Ọgua Osa mwẹ.”

A I Kue Ne Ivbi E Livai Rri Ohẹn

¹⁰ E Nọyaẹnmwa keghi tama mwẹ wẹẹ, “I ra rri iran oya ighe ivbi e Livai, ni vbe deba avbe ivbi Izrẹl nekpa he mwẹ yotọ, iran na ya gha gho ẹbọ.

¹¹ Iran sẹtin gha winna mẹ vbe uwu Ọgua Osa vbekpa ne iran gha na gha gbearoghe onurho, kevbe ne iran gha winna iwinna ni rre uwu Ọgua Osa. Iran sẹtin gha gbele avbe emwi ne avbe emwa ya zọ ese ne a gien uan kevbe ese kẹkan, iran ghi vbe gha rre do gha winna ne avbe emwa nii.

¹² “Sokpan, rhunmwuda ne a na miẹn wẹ iran ọre ọ gha ru ẹbọ ne ivbi Izrẹl, iran na la odẹ vberriọ silo iran obọ fi orukhọ, mẹ ne Nọyaẹnmwa ne Udazi tae mu olọ yan rẹn nẹ wẹ, te I ra rri iran oya.

¹³ “Iran i ra winna iwinna ohẹn ya ga mwẹ, ra ne iran sikẹ emwikemwi ne ọ ghi re emwi nọhuanrẹn ne imẹ, ra ne iran lao Ehe Nọhuansẹ Ehia. Ọna ọre oya ne iran gha re ye uyinmwẹ osọnnọ ne iran yinrin.

¹⁴ Iwinna ni khọrhiọn ni rrọ ọre I ra ghae sẹ iran egbe ne iran gha winnaẹn vbe uwu Ọgua Osa.”

Avbe Ohẹn

¹⁵ E Nọyaẹnmwa ne Udazi khare wẹẹ, “Sokpan, avbe ohẹn ni re ivbi ẹwae e Livai, ni rre ivbi uniẹn e Zadọk, wa ye ekhọekekhọe gha ga mwẹ vbe Ọgua Osa, vbe avbe ivbi Izrẹl nekpa fi iyeke gbe mwẹ nẹ. Rhunmwuda ọnii nian, iran ọ re ọ ghi ra gha re emwa ni gha ga mwẹ, iran ọ re ọ ghi ra vbe gha sẹ ehe ne I ye ne iran do gha ya ẹvbi aranmwẹ kevbe esagiẹn emwi ne a ya zọọ ese, zẹ ọhẹ mẹ.

¹⁶ Iran ọkpa ọ re ọ ra gha la uwu Ọgua Osa mwẹ, iran ghi vbe gha winna vbe Ogiukpo mwẹ, iran ghi vbe gha ya emwa ru ugamwẹ vbe uwu Ọgua Osa.

¹⁷ Iran gha la odẹ ne a la yo ẹghodo ne ọ ke uwu ẹre vbe Ọgua Osa, iran ghi yọ ukpọn eto ovbiohuẹ. Iran gha tae emwi vbe uwu Ọgua ne ọ ke uwu ẹre vbe Ọgua Osa, ọ ma kei ne iran yọ ukpọn ne a ya oru do hiehiere, ne ọfọ ghẹ miẹn ehe na fọ iran.

¹⁸ Iran ghi ya ukpọn eto ovbiohuẹ gbalọ uhunmwu, iran ghi vbe yọ utalawẹ ọsotọ ọghe eto ovbiohuẹ, sokpan, iran ghẹ ya ugbẹkun gba.

¹⁹ Iran te ladian gha rrie ore vbe ehe ne avbe emwa ye, iran ghi bannọ ukpọn ne iran yọe vbe uwu Ọgua Osa ye ughugha nọhuanrẹn nii. Iran ghi hẹ ukpọn ọvbehe ye egbe ne ukpọn nii ghẹ ya kuan avbe emwa nii.

²⁰ “Ọ ma kei ne avbe ohẹn gha khiokhio eto mu otọ ra ne iran gie eto iran vbe kakabọ sọn. Te iran gha gbẹe ne ọ gha rre oreghe.

²¹ Ọ ma kee ne avbe ohẹn da ayọn rhọkpa iran ke la uwu Ọgua ne ọ ke uwu ẹre.

²² Ọ ma kei ne ohẹn rhie okhuo ne ọ kpao sẹ ọdọ ẹre rae, sokpan ovbi Izrẹl ne ọ ma he rẹn okpia, ra amwẹ ohẹn ne ọ dẹgbẹ ọ re ọ kere ne ọ gha rhie.

²³ “Avbe ohẹn ghi gha ma emwa mwẹ alughaẹn ne ọ rre emwi nọhuanrẹn ke ne ọ ma huan, kevbe emwi ne ẹ i mwẹ awua.

²⁴ Imuaẹmwẹ ne a tie uhi ginna gha sunu, avbe ohẹn ghi lele uhi mwẹ ya bu ẹre. Iran ghi gha ru avbe emwi ukpo iyayi zẹ vbe uhi kevbe ilele mwẹ, iran ghi vbe zẹ Ẹdẹ Ikẹtin kọ zẹ vbe emwi nọhuanrẹn.

²⁵ “Ohẹn i ya obọ kan orinmwi ne irẹn ghẹ ya mu awua ye egbe sokpan a ma wẹ orinmwi evbibiẹ ọe nọ, ra ivbi ẹre, ra etiọnrẹn nikpia ra etiọnrẹn nikhuo ni ma he rọnmwẹ ọdọ.

²⁶ Awua ghẹ ghi lahin ẹre egbe rre nẹ, ọ ghi, ziengbe la ikpẹdẹ ihinrọn.

²⁷ Iyekọni, ọ ghi la Ọgua ne ọ ke uwu ẹre vbe Ọgua Osa, ọ ghi ya zọ ese ihọnmwegbe ẹre, ne ọ miẹn ehe na dọlegbe gha yo itaemwi vbe Ọgua Osa. Mẹ ne Nọyaẹnmwa ne Udazi ọre ọ tae.

²⁸ “Emwi ne ọ sẹ avbe ohẹn obọ vbe emwi ne I viọ ne ivbi Izrẹl, ne ọ gha re emwi ne a ya ye emọ otọ, ke orre ọkpa ya sẹ ọvbehe ọrọre ukpo ohẹn. A i kue ne iran gha họn emwi vbe Izrẹl. Mẹ ọrọre emwi ne ọ kere ne iran gha mwẹ.

²⁹ Ọka imuohan, imuohan ye orukhọ, kevbe imuohan a hae werriegbe ọrọre evbare avbe ohẹn. Emwi hia ne a ghi zẹ kọ ne imẹ nẹ vbe Izrẹl, iran ọ re ọ kere ne ọ gha viọ ẹre.

³⁰ Avbe ohẹn ọ re ọ kerre ne gha viọ avbe emwi ne ọ maa sẹ vbe emwi orhọ ne a ka gha rhọ hia kevbe avbe emwi ọvbehe ne a ya yo imuohan gunmwẹ hia fẹẹrẹ. Ẹghẹikẹghẹ ne emwa nii a rhirhi ya le ebrẹd, iran ghi gha mu ne okaro vbọ gie ohẹn zẹ vbe emwi ihaoko, afiangbe mwẹ gha vbe gha rre owa iran.

³¹ Avbe ohẹn ghẹ rri ahianmwẹ ra aranmwẹ ne uwu ẹhi gbe ra ne aranmwẹ ọvbehe gbee.”