Ezikiẹl 4 - Edo Bible (E Baibol Ẹdo) Version 1996

Ezikiẹl Ya Umumwẹ Jerusalẹm Ku Iku Ababa

¹ Osanobua keghi kha wẹẹ, “Ovbi ọmwa mu ibiriki ọkpa, mu ẹẹn ye odaro ruẹ ne u vinnọ emwi lelẹe ne a ya ẹe gie ore Jerusalẹm.

² Ne a ya rhie ma wẹ, a khọn okuo vbọ, tọnnọ uvun lelẹe, kevbe ekẹn ne a tọẹn, kevbe agọ, okọ ne ọ gbe okọ ne ihua ẹre, ne ehia lẹga ẹre.

³ Mu ọkpan ematọn, ne u mu ẹẹn ye ẹkpo uwẹ vbe ẹvbo nii zẹ vbe ekẹn ne a gbe. Mu aro da ẹvbo nii. Te a wa khọn rẹn na, wẹ ọ re ọmwa ne ọ khọn ẹnrẹn. Ọna ghi gha re ama ne uhunmwu ẹvbo Izrẹl.

^4-5 “Vbe iyeke ọnii, u ghi lovbiẹ mu obọ iyọmwa rhu otọ, I ghi mu abe uhunmwu ẹvbo Izrẹl hia yan ruẹn. U gha ya ikpẹdẹ igbe irrọvbe arriaeva vbe evba (390), u ghi vbe rrioya ye orukhọ ne iran ru. I rhie ikpẹdẹ ọkpọkpa ọghe abe ne uẹn ye ukpo ọkpọkpa ne iran ra rrioya la vbotọ.

⁶ U ghẹ ghi gbe onii fo nẹ, u ghi fi egbe werriẹ ghe obọ erha ọmwa ne u vbe rrioya ye orukhọ e Juda la ikpẹdẹ iyeva, ikpẹdẹ ọkpọkpa ye ihe ukpo ọkpọkpa vbe ẹghẹ ne iran ra rrioya la vbotọ.

⁷ “Tọn aro ye okuo ne a mu la Jerusalẹm egbe. Fieghe ekpa ruẹ da ẹvbo nii, ne u vbe guan ẹmwẹ akhasẹ ku ọre.

⁸ I gha gba uwẹ rhie fi otọ, vbene a gha na miẹn wẹ u ma ghi sẹtin fi obọ werriẹ hin obọkpa rre la obọ nọkpa a te do khọn okuo nii fo.

⁹ “Banbanna nian, viọ ọka eso, ke ikpẹ ọka irhuarhua, ẹre, ogi kevbe ọka ẹsin. Gua ehia kugbe ne u ya ẹe le ebrẹd. Ọnii ọ re u ra re la ikpẹdẹ igbe irrọvbe arriaeva (390) nii ne u ra ya lovbiẹ obọ.

¹⁰ A gha rhie uwan nekherhe ọghe ebrẹd erẹnrẹn nuẹn vbe ẹdẹ, u ghi lo ọnii rhinrin ya sẹ ẹdẹ ne ọ lele ẹe.

¹¹ A gha vbe gha sa amẹ kherhe kherhe nuẹn gha wọn, ukpu eva vbe ẹdẹ.

¹² U ghi ya isan ọmwa ne ọ kae nẹ hie erhẹn, u ghi ya erhẹn ọnrẹn le ebrẹd, u ghi vbe rri ọe vbe ehe ne emwa hia gha na gha bẹghe ruẹ.”

¹³ E Nọyaẹnmwa keghi kha wẹẹ, “I ya ọna gie vbene ivbi Izrẹl gha rri evbare ne Uhi mu awua yi hẹ, vbe ẹghẹ ne I gha na zagha iran ku ẹvbo ẹrrẹe.”

¹⁴ Sokpan, mẹ keghi wanniẹn wẹẹ, “Ẹn o, e Nọyaẹnmwa ne Udazi, I ma he mu awua ye egbe mwẹ egbe ẹdẹ, ke ọvbokhan wa gha dee, I ma he rri aranmwẹ ne ọ tobọ ẹre wu ẹdẹ, ra ne aranmwẹ ọvbehe gbe. I ma he rri evbare ne a ka ye ọghe awua ẹdẹ.”

¹⁵ Ẹre Osanobua na kha wẹẹ, “Ọma khekherriọ, I gha kue ne u ya isan ẹmila le ẹe, u sẹtin ya ọnii le ebrẹd ruẹ.”

¹⁶ Ọ keghi vbe rhie te ẹe wẹẹ, “Ovbi ọmwa, I ra dobọ ebrẹd ne a viọ la e Jerusalẹm yi. Egbe i ra rọkhọ emwa ni rre evba nii, ekhọe iran i ra vbe sotọ vbe iran a gha fẹko mwa evbare ne iran gha re kevbe amẹ ne iran gha wọn.

¹⁷ Ebrẹd kevbe amẹ gha fo vbe obọ iran, egbe ghi wọ iran hia yotọ, iran ghi gha rri ororo, rhunmwuda orukhọ iran.”