Ezikiẹl 34 - Edo Bible (E Baibol Ẹdo) Version 1996

Avbe Ọsuohuan Izrẹl

¹ E Nọyaẹnmwa keghi tama mwẹ wẹẹ,

² “Ovbi ọmwa, ta ku avbe ọkaolotu Izrẹl. Ta ẹmwẹ akhasẹ ma iran, ne u tama iran vbene imẹ ne Nọyaẹnmwa ne Udazi khama iran hẹ wẹẹ: ‘Wa wiri, wa ne ọsuohuan Izrẹl! Wa gha koko egbe uwa, sokpan, wa ma koko avbe ohuan.

³ Wa wọn ewẹn iran, wa rhuan ukpọn ne a ya eto iran do, wa kevbe gha gbele avbe ohuan ni maa sẹẹ vbọ re. Sokpan, wa i koko nene avbe ohuan.

⁴ “ ‘Wa ma gbearoghe iran ni ma wegbe, wa ma sinmwi iran ni khuọnmwi vbọ, wa ma gba iran ni miẹn ikuangbe vbọ ẹwẹn. Wa ma ya viọ iran ni bibi odẹ vbọ werriegbe, ra ne uwa gualọ iran ni wiri vbọ viọ werriegbe rre. Sokpan, ne uwa gha na te ru vberriọ, wa keghi gha ru iran khọ.

⁵ Rhunmwuda ighe nene ohuan i mwẹ ne ọ su ẹe, iran keghi zagha kua, aranmwẹ akọn kegha gbele iran re.

⁶ Avbe ohuan mwẹ kegha zozo lele avbe oke ni yo hia kevbe avbe oke nekhua, a zagha iran gba otọe hia, a ma miẹn ọmwa ne ọ gualọ iran, ra ne ọ gualọ iran miẹn.’

⁷ “Wa danmwehọ nian, wa ne avbe ọsuohuan ẹmwẹ ne imẹ ne Nọyaẹnmwa tama uwa.

⁸ Omwa vbene a na miẹn wẹ mẹ ọrọre Osanobua ne ọ rrọ, wa ghi hẹko danmwehọ mwẹ. Avbe aranmwẹ akọn dekun avbe ohuan gha gbele re, rhunmwuda ọsuohuan i rrọ. Avbe ọsuohuan mwẹ ma ho ne iran gualọ avbe ohuan. Iran kegha gbearoghe egbe iran, iran ma gbearoghe avbe ohuan.

⁹ Rhunmwuda ọnii, wa ne avbe ọsuohuan, wa danmwehọ mwẹ.

¹⁰ Mẹ ne Nọyaẹnmwa ne Udazi tae nian wẹ oghian uwa ọ re I khin, I gha miẹn uwa ohuan mwẹ, mẹ i ghi dọlegbe gie uwa gha re ọsuohuan iran ọvbehe, mẹ i ghi ra dọlegbe kue ne a miẹn wẹ egbe uwa ọkpa ọ re uwa gbearoghe. I gha wọlọ avbe ohuan mwẹ hin obọ uwa rre, mẹ i ghi ra gie uwa gbele iran re ọvbehe.

Ọsuohuan Ne Ọ Maa

¹¹ “Mẹ ne Nọyaẹnmwa ne Udazi tama uwa nian wẹ, I gha gualọ avbe ohuan mwẹ miẹn, I ghi vbe tobọ mwẹ gha gbearoghe iran.

¹² Zẹ vbe ne ọsuohuan gbearoghe avbe ohuan ne ọ te zagha kua, a na ghi dọlegbe sii iran koko. I gha viọ ehia werriegbe ke ehe hia ne a te zagha iran kui vbe ẹdẹ ọfuan ne ọ so ebiebi nii.

¹³ I gha viọ iran ke avbe ẹvbo ẹrrẹe ladian, I ghi si iran koko I ghi dọlegbe viọ iran gha die ẹvbo iran tobọ iran. I gha viọ iran gha rrie avbe oke nekhua kevbe avbe ẹzẹ Izrẹl I ghi vbe ya koko iran vbe otọ erria ne ọ maa sẹẹ.

¹⁴ I gha gie iran gha rri irunmwu vbe ne a i na rre ẹbe vbe oke kevbe otọ ne irunmwu ye kevbe avbe irunmwu ne ọ bi nununu vbe otọe Izrẹl.

¹⁵ Mẹ ọ re ọ ra tobọ mwẹ gha re ọsuohuan avbe ohuan mwẹ. I gha vbe gualọ ehe ne iran gha na kẹtin. Mẹ ne Nọyaẹnmwa ne Udazi ọ re ọ tae.

¹⁶ “I gha gualọ ni wiri vbọ, I ghi viọ iran ni bibi odẹ vbọ werriegbe rre, I gha gbalọ ẹwẹn iran ni kuan egbe vbọ, I ghi vbe sinmwi iran ni khuọnmwi, sokpan, I gha fuẹn ni ti ye egbe kevbe ni wegbe vbọ hin rre, rhunmwuda, ọsuohuan ne ọ ru emwi ne ọ gbae mẹ khin.

¹⁷ “Rhunmwuda ọnii, wa ne ohuan mwẹ, mẹ ne Nọyaẹnmwa ne Udazi tama uwa nian wẹ I gha bu ohiẹn uwa, I ghae emwi esi wannọ hin emwi dan rre, ohuan hin uwu ẹbu avbe ẹwe rre.

¹⁸ Ẹko e ne uwa na rri irunmwu ni ghi maa sẹ ma vuọn uwa, te uwa ya owẹ rrilo ne uwa ma re vbọ muotọ! Wa wọn amẹ nọhianrẹn, sokpan, wa ghi ya tughu ne uwa ma wọn vbọ ua.

¹⁹ Avbe ohuan mwẹ nekpa, irunmwu ne uwa ya owẹ rrilo mu otọ ọre iran re, iran ghi vbe gha wọn amẹ ne uwa tughu ua.

²⁰ “Rhunmwuda ọnii, mẹ ne Nọyaẹnmwa ne Udazi tama uwa wẹ I gha bu ohiẹn uwa ne ohuan ni wegbe kevbe avbe ohuan ni ma wegbe.

²¹ Wa sua iran ni khuọnmwi vbọ ghe okhiẹ, wa na ya igho so iran hin uwu oghẹn rre.

²² “Sokpan, I gha miẹn avbe ohuan mwẹ fan, I i ghi kue ne a ghi ru iran emwi oya ọvbehe. I gha bu ohiẹn dọmwadẹ avbe ohuan mwẹ, I ghi wannọ ni maa hin e ni i maa rre.

²³ I gha rhie ọba ne ọ yevbe Devid ne ọguọmwadia mwẹ ne iran, ne ọ gha re ọsuohuan iran, ọ gha gbearoghe iran.

²⁴ Mẹ ne Nọyaẹnmwa ghi gha re Osanobua iran, ọba ne ọ yevbe Devid ne ọguọmwadia mwẹ ghi gha re ne ọ khaemwisẹ yan iran. I tae nẹ.

²⁵ “I gha gu iran ta ile ne ọ gha rhie maa wẹ ẹkun gha sẹ iran otọ. I gha wabọ avbe aranmwẹ akọn dan hin otọe nii rre, ne avbe ohuan mwẹ sẹtin gha rrọọ vbe ne a i na mwẹ ẹbe vbe oha kevbe uwu ẹgbo.

²⁶ I gha fiangbe iran, I ghi vbe gie iran gha rre ehe ne ọ lẹga oke mwẹ nọhuanrẹn. Evba nii ọ re I gha na gha ye amẹ ne ọ rhọ fiangbe iran vbe ẹghẹ ne iran ya gualọ ẹe.

²⁷ Avbe erhan gha mọ, ugbo gha ma emwiokọ, edọmwadẹ ọghọe ghi gha rre otọe ọghọe vbe ne a i na mwẹ ẹbe. Ẹghẹ ne I gha na bunnọ ọgiọrọ avbe emwa mwẹ kua, ne I vbe fannọ iran kua vbe obọ iran ni ya iran khian eviẹn, iran gha do rẹn wẹ mẹ ọrọre Nọyaẹnmwa.

²⁸ “Uhunmwu ẹvbo avbe iran ni ga ẹbọ i ghi ra do dọlegbe gha fu iran emwi ọvbehe, avbe aranmwẹ akọn i ghi ra ye gha gbele iran re. Iran gha rrọọ vbe a i mwẹ ẹbe, ọmwarhọkpa i ghi ra dọlegbe runran iran.

²⁹ I gha mu otọ ne ọ maa emwiokọ ne iran, I ghi vbe dobọ ohanmwẹ yi vbe otọe nii. Avbe uhunmwu ẹvbo nekpa i ghi ra dọlegbe kpe amisikan ku iran ọvbehe.

³⁰ Emwa hia gha rẹn wẹ te I tan obọ guẹ Izrẹl, kevbe wẹ emwa mwẹ ọ re iran khin. Mẹ ne Nọyaẹnmwa ne Udazi ọre ọ tae.

³¹ “Wa ne avbe ohuan mwẹ, oghẹn ne imẹ koko, wa ọrọre emwa mwẹ, mẹ ọrọre Osanobua uwa,” erriọ ọ re Nọyaẹnmwa ne Udazi khare.