Ezikiẹl 32 - Edo Bible (E Baibol Ẹdo) Version 1996

A Ya Ọba Igipt Gie Agbaka

¹ Vbe ikpẹdẹ n okaro ọghe uki ne ogiweva vbe ukpo ne ogiweva ne ima kegha rre iwe, e Nọyaẹnmwa keghi gunmwẹ guan wẹẹ,

² “Ovbi ọmwa, hẹko tama ọba Igipt yotọ, ta uhunmwu ne I gie ma rẹn wẹẹ: U gha ru vbe ne oduma ru emwi vbe uwu ẹbu agbọn ẹvbo, sokpan, emwi ne u khọ sẹ ọrọre agbaka ne ọ vin lele uwu amẹ khian. U ya owẹ ruẹ tughu amẹ, u keghi gie ẹzẹ ni gbiruẹn.

³ Avbe agbọn ẹvbo nibun gha sii koko. I gha ya ọga mwẹ mu ẹẹn, I ghi wẹ ne iran si ọ ladian oke.

⁴ I gha mu ẹẹn fi ato, I ghi wẹ ne avbe ahianmwẹ kevbe aranmwẹ ni rre agbọn na do gha rri ọ.

⁵ I gha ya ikun ruẹn ne ọ kekẹe gue avbe oke kevbe iya.

⁶ I gha tue esagiẹn ruẹn kua, ọ te do ya gba avbe oke kevbe ẹzẹ.

⁷ I gha fuẹn ọnrẹn uan nẹ, I gha ya emwi gue iso. I ghi vbe khiẹn avbe orhọnmwẹ kua. Owẹn gha lẹre ye iyeke avbe okuku, uki i ghi ra vbe baa ọvbehe.

⁸ I gha dọ ukpa ne ọ rre iso yọ, I ghi mu agbọn uwa fi uwu ebiebi. Mẹ ne Nọyaẹnmwa ne Oghodua tae nẹ.

⁹ “Egbe gha wa wọ agbọn ẹvbo nibun ye otọ vbe I gha na iyẹn vbe ne a fuẹn ruẹn uan hẹ vbe ẹvbo ne uwẹ ma he ka họn ẹmwẹ ọnrẹn ẹdẹ.

¹⁰ Emwi ne I ru uwẹ re gha gbe orrirri ku avbe uhunmwu ẹvbo nibun. I gha fieghe umozo mwẹ, avbe ọba gha runran, iran ghi vbe gha guọ zẹzẹzẹ. Vbe ẹdẹ ne u gha wa de nii, iran hia gha guọ rhunmwuda iran ma rẹn vbene ọ gha vbe ye iran hẹ.”

¹¹ E Nọyaẹnmwa ne Udazi tama ọba Igipt wẹẹ, “U gha mu aro da umozo ọba e Babilọn.

¹² I gha gie avbe ivbiyokuo ni ke ẹvbo ekhọe dan rre yuo umozo ya gbele emwa ruẹn uan, kevbe emwa ruẹn, kevbe avbe emwi ne u ya ghagha, a gha fuẹn ehia a.

¹³ I gha lọkọ avbe ẹmila ruẹ ye dọmwadẹ uhae. A i ghi ra miẹn avbe ẹmila ra aranmwẹ ni gha tughu avbe amẹ nii ọvbehe.

¹⁴ I gha gie avbe amẹ ruẹn dehẹnhẹn ne ọ vbe hian, I ghi vbe gie avbe ẹzẹ ruẹ gha lẹ. Mẹ ne Nọyaẹnmwa ne Oghodua ọ re ọ tae.

¹⁵ I gha ya Igipt khian otọe ne ọ gbe ẹvbi nẹ, I na vbe fuẹn avbe emwa ni rre evba hia, iran gha rẹn ighe mẹ ọrọre Nọyaẹnmwa.

¹⁶ Eyan ne a yan ma rẹn na gha khian ihuan orinmwi. Avbe ikhuo uhunmwu ẹvbo hia gha so ẹe ya khiẹ Igipt kevbe avbe emwa rẹn. Mẹ ne Nọyaẹnmwa ne Oghodua tae nẹ.”

Ẹvbo Avbe Emwa Ni Wulo Nẹ

¹⁷ Vbe ikpẹdẹ ekesugie ọghe uki ne okaro vbe uki ne ogiweva ne ima ke gha rre iwe, e Nọyaẹnmwa keghi gunmwẹ guan wẹẹ,

¹⁸ “Ovbi ọmwa, gha khiẹ avbe emwa ọkhọngborrie ni rre Igipt. Viọ iran ba avbe uhunmwu ẹvbo ni wegbe ọvbehe hia ni rre agbọn na gha rrie ẹvbo avbe emwa ni wulo nẹ.

¹⁹ Tama iran wẹẹ, “ ‘Te uwa ro ighe wa mose sẹ avbe emwa ọvbehe hia ra? Wa gha kpao gha rrie ẹvbo emwa ni wulo nẹ, wa ghi ya lovbiẹ ba avbe emwa dan vbe evba.’

²⁰ “Ivbi Igipt gha dele deba avbe emwa ne a gbele vbe okuo. Umozo mu egbe ne ọ ya gbele iran hia.

²¹ Avbe ọkhae ni sẹre hia, kevbe iran ni yaba Igipt gha gbinna, vbe uhunmwu oke gbe ọbokhian ne ivbi Igipt vbe iran sẹ ẹvbo emwa ni wulo nẹ. Iran datu wẹẹ: ‘Emwa dan ne a gbele vbe okuo, edinran ọ re iran gha dee, ghe vbe iran lovbiẹ ye emwa na!’

²² Asiria rre evba, idin avbe ivbiyokuo ẹre lẹga ẹre. Okuo ọ re ọ gbele ehia.

²³ Idin iran, ehe ne ọ ghi dinmwi sẹẹ vbe ẹvbo emwa ni wulo nẹ ọ re ọ ye. Okuo ọ re avbe ivbiyokuo ẹre hia na dele, idin iran keghi yọyọ lẹga ọghọe. Vberriọ, vbe ẹghẹ ọkpa vbe ẹghẹ ne ọ gberra, iran na ọ re ọ gha runran emwa ni rre agbọn.

²⁴ “Ẹlam rre evba, ke ẹe kevbe idin avbe ivbiyokuo ẹre ni lẹga ẹre. Okuo ọ re a na gbele ehia, iran keghi ya ukpikolo gha rre ẹvbo avbe emwa ni wulo nẹ. Ẹghẹ ne iran na rre agbọn, iran kegha ya ohan mu emwa hia, sokpan, banbanna nian, iran wulo ye otọ, iran khian emwa ne a fara a.

²⁵ “Ẹlam lovbiẹ ba avbe emwa ne a gbele vbe okuo. Idin avbe ivbiyokuo ẹre lẹga ẹre. Erhọkpa ma rhuẹ, okuo ọ re a na gbele iran. Ẹghẹ ne iran na rre agbọn, iran keghi ya ohan gba ehehia, sokpan banbanna nian, iran lovbiẹ iran wulo nẹ, a vbe fa iran an, emwi ne ọ rruan emwa ne a gbele vbe okuo ọ re ọ ghi vbe rruan iran.

²⁶ “E Mẹsiẹk kevbe Tubal, rre evba, vbe ne idin ọghe ivbiyokuo iran na lẹga iran. Erhọkpa ma rhuẹ, okuo ọ re a na gbele iran. Vberriọ, vbe ẹghẹ ọkpa ne ọ gberra, te iran gha runran emwa nagbọn.

²⁷ A ma re iran uremwẹ ovbiọmọ zẹ vbe avbe ọkhae ni dele vbe ẹkpo nẹdẹ, ni vbe gbalọ egbe okuo gha rrie ẹvbo emwa ni wulo nẹ, a mu umozo iran ye ototọ uhunmwu iran, a na vbe mu asa iran yan iran. Vbe ẹghẹ ọkpa avbe ọkhae na te wegbe sẹrriọ wẹ te iran gha runran emwa nagbọn.

²⁸ “Erriọ ọ re Igipt khian gha ye, ọmwa ne a guọghọ ua ne ọ rre uwu ẹbu emwa ni ma rhuẹ ne a gbele vbe okuo.

²⁹ “Idom rre evba ke ẹe ke avbe ọba ke iran ni khaemwisẹ yan rẹn, ivbiyokuo ni wegbe ọ re iran te khin sokpan, banbanna, iran lovbiẹ deba emwa nimarhuẹ, vbe ẹvbo emwa ni wulo nẹ, emwa ne a gbele vbe okuo.

³⁰ “Avbe ivbiọba ni rre odẹ ahọ hia rre evba, erriọ avbe ivbi Saidọn vbe ye, ẹtin ne iran te mwẹ ugborrirri te gha nọ, sokpan, banbanna nian, iran khian emwa ne a fara a la idin, deba avbe emwa ne a gbele vbe okuo, a keghi re iran vbe ne a ma na rhuẹ iran. Iran keghi vbe ghae vbe efaa ọghe iran ni kpao gha rrie ẹvbo avbe emwa ni wulo nẹ.

³¹ “Ọba Igipt gha miẹn avbe emwa na hia ne a gbele vbe okuo, ẹko gha fu ẹe rre ke ẹe kevbe avbe ivbiyokuo ẹre, erriọ ọ re Nọyaẹnmwa ne Udazi khare.

³² “Mẹ ọ re ọ wẹ ne ọba Igipt gha mu emwa nagbọn rueghe, sokpan, a gha gbe ẹe, ke ẹe kevbe avbe ivbiyokuo ẹre, a ghi vbe re iran ba avbe emwa ni ma rhuẹ ne a gbele vbe okuo.” E Nọyaẹnmwa ne Udazi tae nẹ.