Ezikiẹl 31 - Edo Bible (E Baibol Ẹdo) Version 1996

A Ya Igipt Gie Erhan Isida

¹ Vbe ikpẹdẹ n okaro ọghe uki nogieha ukpo ne ogiowọrọ ne ima kegha rre iwe, e Nọyaẹnmwa keghi gunmwẹ guan wẹẹ,

² “Ovbi ọmwa, tama ọba Igipt kevbe emwa rẹn hia wẹẹ: “A miẹn vbe u wegbe hẹ! De emwi ne I gha ya ẹe gie?

³ U ye vbe isida ne ọ rre Lebanọn ne ọ mwẹ abọ ne mose mose ne ọ mwẹ irhu erhan ne ọ tan sẹrriọ wẹ ọ keghi sẹ ikpakpiso.

⁴ Amẹ wa gha rrọ ne ọ gha ya e wan. Kevbe ẹzẹ ne ọ rre uwu otọ ne ọ gha vbe gha koko ẹe. Iran gbe amẹ khakha ehe ne erhan nii na zọ. Iran na vbe gie ẹzẹ gha rrie ehe ne avbe erhan ni rre ẹgbo ye.

⁵ Rhunmwuda ne a na gbe amẹ khakha ẹe ẹsẹse. Ọ keghi tan sẹẹ avbe erhan ọvbehe hia fẹẹrẹ. Abọ ẹre keghi tan, ọ keghi kọnkọn.

⁶ Avbe ahianmwẹ ughughan bọ oko ye abọ ẹre. Ototọ irhu ẹre ọ re avbe aranmwẹ oha ughughan na biẹlẹ, avbe uhunmwu ẹvbo hia vbe hẹwẹ vbe irhu ẹre.

⁷ U miẹn vbene erhan nii te mose hẹ — ọ taẹn ẹsẹse, abọ ẹre keghi ye wọọrọ wọọrọ. Inian rẹn keghi ya sẹ ẹzẹ ne ọ dinmwi ne ọ lẹ.

⁸ A i miẹn sida ne a gha ya gie ẹre vbe uwu ogba Osanobua. Uvbiakhẹ ne ọ he vbe zẹlẹ abọ sẹrriọ ẹ i rrọ. Ra erhan kẹkan ne ọ vbe mwẹ inian vberriọ. A i miẹn erhan ne ọ mose vberriọ vbe ogba Osanobua.

⁹ I keghi ya ẹe ye abọ ne ọ zẹlẹe gha mose erhan ne avbe erhan ni rre Idẹni ne ogba Osanobua ghe miẹn asẹn re ọ re nọ.

¹⁰ “Rhunmwuda ọnii nian, Mẹ ne Nọyaẹnmwa ne Udazi gha tama uwa emwi ne ọ ra rruan erhan nii ne ọ gha tan khian ọ te ya sẹ ikpakpa iso. Vbene ọ ya tan khian nii, ọ re ọ vbe ya gha hio.

¹¹ Rhunmwuda ọnii mẹ he ẹe nẹ, I gha vbe gie ne ọ khaemwisẹ orhunmwuyẹn mu gha khian. Ọ gha ru erhan ni emwi ne ọ ma ẹẹn ye emwi dan ne ọ ru.

¹² Avbe orhunmwuyẹn ne ẹ i zama ọmwa gha tọn ọẹn gbotọ, iran ghi vbe sẹ ọe rae ye evba. Avbe abọ ẹre kevbe ẹzi ẹre ni hunnọẹn gha dele ye dọmwadẹ oke kevbe iya ni rre ẹvbo nii. Avbe uhunmwu ẹvbo ni te rre ototọ irhu ẹre hia gha kpao.

¹³ Avbe ahianmwẹ ghi do gha tinnọ yan ike erhan ni ne ọ de ye otọ nii. Avbe aranmwẹ oha ghi gha ya owẹ rrilo abọ ẹre muotọ.

¹⁴ Rhunmwuda ọnii, ke ẹghẹ na kpao, a i ghi miẹn erhan, ne ọ gha ye tan vberriọ ọvbehe vbene ọ khọnrẹn wẹ ne a gbe amẹ khakha ẹe sẹ hẹ, ẹ i ghi ra ya uhunmwu ha ikpakpiso gberra ọvbehe ne ọ ye ya tan sẹ vberriọ. Te iran hia ra wulo zẹ vbe emwa kẹkan, te iran ra ya egbe ba iran ni tuorre rrie ẹvbo iran ni wulo nẹ.”

¹⁵ Vbenian ọ re Nọyaẹnmwa ne Udazi khare. “Vbe ẹdẹ ne erhan nii gha kpao gha rrie ẹvbo iran ni wulo nẹ, I gha ru ẹe wẹ ne amẹ ne ọ rre uwu otọ ro guẹ ẹre zẹ vbe ama akhiẹ. I gha khiọ avbe ẹzẹ, I i ghi ra vbe gie avbe ẹzẹ nibun nii gha lẹ amẹ ladian. Rhunmwuda ne erhan ni na wu, I gha gie ebiebi so vbe uhunmwu Oke Lebanọn, I ghi vbe ru ẹe ne avbe erhan ni rre oha hia luẹluẹ ua.

¹⁶ I gha rhie ẹre gha rrie ẹvbo iran ni wulo nẹ ulamwẹ udemwẹ ọnrẹn gha mu avbe uhunmwu ẹvbo rueghe. Avbe erhan ni rre Idẹni hia, kevbe avbe erhan esiesi ne a gbe amẹ khakha vbe Lebanọn, ni kpao gha rrie agbọn ne ọ rre uwu otọ nẹ, oha gha ghọghọ ye udemwẹ ọnrẹn.

¹⁷ Iran gha lele ẹe gha rrie ẹvbo emwa ni wulo nẹ ne iran ya deba iran ni ka dele nẹ. Iran hia ni di ototọ irhu ẹre ya, gha khian ne a zagha gba otọe ẹvbo hia.

¹⁸ “Ọba Igipt ọrọre erhan ne a kha na, ke ẹe kevbe emwa rẹn hia. Avbe erhan ni rre Idẹni ma te tan vba iran ra ne iran sughe vba iran. Sokpan, banbanna nian, zẹ vbe avbe erhan ne ọ rre Idẹni, ọ gha tuorre gha rrie ẹvbo emwa ni wulo nẹ, ne ọ vbe ya deba avbe emwa dan, kevbe avbe emwa ne a gbele vbe okuo. I tae nẹ.” Erriọ e Nọyaẹnmwa ne Udazi khare.