Ezikiẹl 30 - Edo Bible (E Baibol Ẹdo) Version 1996

E Nọyaẹnmwa Gha Rri Igipt Oya

¹ E Nọyaẹnmwa keghi vbe dọlegbe gu mwẹ guan wẹẹ,

² “Ovbi ọmwa, guan ẹmwẹ akhasẹ, ne u tama iran vbene imẹ ne Nọyaẹnmwa ne Udazi kha hẹ. Te u ra ya avbe ẹmwẹ na go: “Ẹdẹ ugborrirri dee!

³ Ẹdẹ sikẹ otọ nẹ, ẹdẹ ne Nọyaẹnmwa gha zẹ yọ, ẹdẹ okuku amẹ ke ọghe orueghe ne uhunmwu ẹvbo hia.

⁴ Okuo gha sa vbe Igipt, akhiẹ nọkhua gha rre Sudan; a gha gbele enibun vbe Igipt, iran gha fu emwi ni rre ẹvbo nii viọ a ghi ya ee khian itowa.

⁵ “Okuo ni ọ re ọ ra vbe gbele avbe ivbiyokuo, ne iran vbu viọ ke Sudan rre, kevbe Libya, e Lidia, Arebia, e Kub, deba iran ni ke ehe ne emwa mwẹ ye rre.”

⁶ E Nọyaẹnmwa khare wẹẹ, “A gha gbele iran ni gbinna ne Igipt vbe okuo ke Mẹgido vbe odẹ okuọ kpao ya sẹ Asuan vbe odẹ ekẹn. A gha fuẹn ọnrẹn uan ighe ivbiyokuo Igipt ni ghagha. Mẹ ne Nọyaẹnmwa ne Udazi ọ re ọ ta ẹe.

⁷ Otọe nii gha khian ne ọ ghi dihoi rua sẹẹ vbe otagbọn. A ghi vbe ya avbe okpẹvbo ni rrọ khian itowa fẹfẹẹfẹ.

⁸ I gha ghi mu erhẹn ye Igipt nẹ, ighe a ghi gbele iran ni khọn ne ẹẹn fo nẹ, ẹghẹ nii, iran gha rẹn wẹ mẹ ọrọre Nọyaẹnmwa.

⁹ “Ọ gha ghi sẹ ẹdẹ nẹdẹrriọ ighe a ghi fuẹn Igipt ua nẹ, I gha ya okọ gie emwa uhunmwu ya rueghe emwa e Sudan ni ma rẹn ne a ye. Iran ghi wa runran. Ẹdẹ nẹdẹrriọ he dee!”

¹⁰ E Nọyaẹnmwa ne Udazi khare wẹẹ, “I gha lo e Nebukiadneza ne ọba e Babilọn ya dobọ ẹfe ne Igipt mwẹ yi.

¹¹ Rẹn kevbe ivbiyokuo ẹre ne ekpakpasusu gha ya dunmwu ẹvbo nii uan. Iran gha ya umozo yan Igipt tobọ ẹre. Ikun orinmwi ghi gba ẹvbo nii.

¹² I gha si e Naẹl ka, I ghi mu Igipt ye ototọ ẹtin emwa dan. Avbe orhunmwuyẹn gha dunmwu otọe nii hia a. Mẹ ne Nọyaẹnmwa ọre ọ tae.”

¹³ E Nọyaẹnmwa ne Udazi khare wẹẹ, “I gha guọghọe rua ighe avbe amazẹ kevbe avbe ẹbọ ohoghe ni rre Mẹmfis. A i ghi ra miẹn ọmwa ne ọ gha khaemwisẹ yan Igipt, I gha vbe runran avbe emwa nii hia.

¹⁴ I gha ya odẹ ekẹn Igipt khian ne ọ dihoi rua, I ghi mu erhẹn ye Zoan ne ẹvbo nii ne odẹ okuọ. I gha vbe rri e Tẹbes ne igiogbe oya.

¹⁵ I gha ru ẹe ne Pelusium ne ẹvbo nọkhua ne a ya khẹ egbe vbe Igipt họn ẹmwẹ ohu mwẹ vbe egbe. I gha fuẹn ẹfe Tẹbes ua.

¹⁶ I gha mu erhẹn ye Igipt, e Pelusium ghi gha rre obalọ. A gha guọghọ ekẹn Tẹbes sẹ otọ, amẹ ghi ro gue ẹvbo nii.

¹⁷ Avbe igbama ni rre ẹvbo Heliopolis kevbe Bubastis gha wulo ye okuo, a ghi munọ iran nekpa oghunmwu.

¹⁸ Ebiebi gha so yan e Tapanhes vbe I a ghi guọghọ ẹtin Igipt, I ghi kie ẹre ukpẹ ighe ẹtin ne iran ya ghagha. Amẹ ne ọ bi gha degue Igipt. Emwa ni rre avbe okpẹvbo ẹre hia ghi khian ne a viọ ẹre oghunmwu.

¹⁹ I gha rri Igipt oya nẹ vbenian, iran gha rẹn ighe mẹ ọrọre Nọyaẹnmwa.”

Ọba Igipt Ne A Wọ Ẹre Udu

²⁰ Vbe ikpẹdẹ ne ogihinrọn ọghe uki n okaro vbe ukpo ne ogiowọrọ ne ima ke gha rre imu, e Nọyaẹnmwa keghi gunmwẹ guaan wẹẹ,

²¹ “Ovbi ọmwa, I bun ọba Igipt obọ nẹ. a ma miẹn ọmwa ne ọ gba ẹe ra ne ọ ya irri daeyi ne ọ miẹn ehe na rrie, ne ọ miẹn ehe na vbe wegbe sẹ ne ọ gha dọlegbe mu umozo.

²² Rhunmwuda ọnii nian, ẹmwẹ ne imẹ ne Nọyaẹnmwa ne Oghodua tae, ọ re ọna khin. Oghian ọba Igipt ọ re I khin. Te I ra bunnọ ẹre obọ eveva, ke ne ọ maa ne ọ rrọọ ke ne ọ ka vbe buun nẹ, umozo ghi fe ẹre obọ de fua.

²³ “I ra zagha ivbi Igipt gba otọ agbọn hia.

²⁴ I ghi ru ẹe ne obọ ọba e Babilọn wegbe, I ghi vbe mu umozo mwẹ ye ọre obọ. Sokpan, I gha bunnọ ọba Igipt obọ, rẹn ghi vbe gha tu, ọ ghi wu ye odaro avbe eghian rẹn.

²⁵ Erriọ wa nọ, I gha mitan ẹẹn ruan, I ghi gie ọba e Babilọn wegbe, I ghẹ ghi mu umozo mwẹ ye ọre obọ nẹ, rẹn na ghi nien ukpẹ ọre da Igipt, emwa hia gha rẹn ighe mẹ ọrọre Nọyaẹnmwa.

²⁶ I gha zagha ivbi Igipt gba otọ agbọn hia. Ẹghẹ nii iran ghi do rẹn wẹ mẹ ọrọre Nọyaẹnmwa.”