Ezikiẹl 3 - Edo Bible (E Baibol Ẹdo) Version 1996

¹ Osanobua keghi kha wẹẹ, “Ovbi ọmwa, rri ebe ohian nii, iyekọnii, u ghi ya gu avbe ivbi Izrẹl guan.”

² Mẹ keghi rhan unu uan, ọ keghi rhie ebe ohian ni mẹ re.

³ Ọ wẹẹ “Ovbi ọmwa, rri ebe ohian ne I rhie nuẹn na, yae vuọn ẹko ruẹ.” I keghi rrii ọe, ọ kegha rhiẹnrhiẹn zẹvbe owọn.

⁴ Ẹre Osanobua na kha wẹẹ, “Ovbi ọmwa, bu ivbi Izrẹl gha khian ne u ya tama iran ẹmwẹ ne I a rhirhi ta wẹ ne u ta.

⁵ Ẹire emwa ni zẹ eghọnmighọn ọ re I giọ bu sokpan, ivbi Izrẹl nọ.

⁶ Akpawẹ avbe uhunmwu ẹvbo nekhua ni zẹ eghọnmighọn ne uwẹ i họn ọ re I giọ bu, iran gha te danmwehọ ruẹ.

⁷ “Sokpan okpa i rre ivbi Izrẹl ne ọ gha ho ne ọ danmwehọ; iran i ra vbe danmwehọ imẹ yi. Te iran hia zevbudu, iran kevbe re emwa ọkpọzua.

⁸ Banbanna nian, mẹ gha ruẹ ne uwẹ vbe ze vbe ẹkoko udu kevbe ne u wegbe zẹ vbene iran ye.

⁹ I gha ru ẹe ne uwẹ ye gbain zẹvbe utete okuta kevbe ne ọ kaka zẹvbe edaiamọn, ghẹ gie ohan avbe etẹ nii mu ẹẹn.”

¹⁰ Osanobua ke rhie bare wẹẹ, “Ovbi ọmwa, gbe ehọ kotọ ẹsẹse ne u ye ẹmwẹ hia ne I tama ruẹn rre.

¹¹ Iyekọnii, u ghi bu ivbi ẹvbo ruẹ ni rre iwe ne u ya tama iran ẹmwẹ ne imẹ ne Osa ne Udazi tama iran, ọ gha khọn iran, iran zẹ ye uẹ re ra iran ma zẹ yọ.”

¹² Orhiọn Osanobua keghi tọn mwẹ mu, I keghi họn urhu okpa ne ọ davan vbe iyeke mwẹ, ne ọ khare wẹẹ, “Wa rho uyi Osanobua vbe odukhunmwu vbe ẹrinmwi.”

¹³ I keghi họn ulamwẹ ifuẹn ne avbe aranmwẹ nii rhie gbe egbe vbe odukhunmwu, deba ulamwẹ avbe emwi ne khurubu nii, ulamwẹ ọnrẹn vba ọghe igbohiotọ.

¹⁴ Orhiọn Osanobua keghi wa ya ẹtin nọkhua hin yan mwẹ, vbene orhiọn rẹn wa mu mwẹ khian nii, ẹko kegha rriara mwẹ, ohu na gha mu mwẹ.

¹⁵ Mẹ keghi do sẹ Tẹl Abib vbe ọkpẹn Ẹzẹ Kiẹba, ehe ne iran ni rre iwe nii gha ye, I keghi di evba ya la ikpẹdẹ ihinrọn, egbe emwi ne I miẹn kevbe ne I họẹn keghi wa wọ mwẹ yotọ.

E Nọyaẹnmwa Zẹ Ezikiẹl Abodẹ

¹⁶ Ikpẹdẹ ihinrọn nii ghi gberra ne, e Nọyaẹnmwa keghi gun mwẹ guan wẹẹ,

¹⁷ “Ovbi ọmwa, I ra ya a ru abodẹ ne Izrẹl. U ghi tama iran emwi ne I ya bu iran ude khẹ ọ dee.

¹⁸ A deghẹ mẹ khare I ghẹ ọmwa dan gha wu, sokpan, wẹ ma tama rẹn khẹ ọ dee ne ọ miẹn ehe na fiwerriẹ, ne ọ miẹn ehe na miẹn uhunmwu, ọ gha wu ye uwu orukhọ ne ọ ru, sokpan obọ ruẹ ọ re I ra lẹ uwu ẹre ginna.

¹⁹ Adeghẹ wẹ bu ọmwa dan ude khẹ ọ dee ighe ọ ma zobọ vbe orukhọ ne ọ ru, ọ gha wu ye uwu orukhọ ne ọ ru, sokpan wẹ gha miẹn uhunmwu.

²⁰ Adeghẹ ọmwa esiesi suẹn gha ru orukhọ, I na rhie ẹre uhunmwu da ẹbe, ọ gha wu adeghẹ wẹ ma tama rẹn khẹ ọ dee. Ọ gha wu rhunmwuda orukhọ ẹre, mẹ i ra vbe ye emwi esi ne ọ te ka gha ru rre, I gha lẹ uwu ẹre ginna ruẹn obọ.

²¹ U gha tama ọmwa esi yotọ khẹ ọ dee wẹ ne ọ ghẹ ghi ru orukhọ, ọ na rhie ẹmwẹ ruẹn ighe ọ ma ghi ru orukhọ, ọ gha rre agbọn, wẹ tobọ uwẹ gha vbe miẹn uhunmwu.”

Ezikiẹl I Ra Sẹtin Guan

²² I keghi wa gha hẹnmwẹ ẹtin nọkhua ọghe Nọyaẹnmwa vbe egbe, I keghi họn vbe ọ tama mwẹ wẹẹ, “Kpaegbe ne u ladian gha rrie uwu iya, I gha guẹ guan vbe evba.”

²³ Ẹre I na ladian gha rrie uwu iya, I keghi miẹn uyi e Nọyaẹnmwa vbe evba zẹ vbene I wa vbe miẹn ọẹn zẹẹ vbe ọkpẹn Ẹzẹ Kiẹba. I keghi de mu aro rhu otọ,

²⁴ sokpan, orhiọn Osanobua la uwu imẹ, ọ keghi mu mwẹ mudia. E Nọyaẹnmwa keghi tama mwẹ wẹẹ, “Gha rriowa ne u ya khui urho ke egbe yi.

²⁵ Ovbi ọmwa, a gha ye irri gba, u i ghi ra sẹtin ladian la uwu ẹvbo.

²⁶ I gha gbe uẹ aranmwẹ ne unu vbene a gha na miẹn wẹ u i ghi sẹtin tama avbe etẹ na yotọ khẹ ọ dee.

²⁷ Iyekọnii, I gha ghi dọlegbe guẹ guan, I na dọlegbe rhie ẹtin ne a ya guan nuẹn, u gha tama iran vbe ne imẹ ne Nọyaẹnmwa ne Udazi khare. Eso vbe uwu iran gha danmwehọ, sokpan eso vbe uwu iran i ra zẹ ye uẹ re rhunmwuda, ẹvbo etẹ ọ re iran khin.”