Ezikiẹl 26 - Edo Bible (E Baibol Ẹdo) Version 1996

Ẹmwẹ Akhasẹ Ne A Ta Ku E Taia

¹ Vbe ikpẹdẹ ne okaro, ọghe uki ne ogiowọrọ ne ima kegha rre iwe, e Nọyaẹnmwa keghi gun mwẹ guaan wẹẹ,

² “Ovbi ọmwa, ghe emwi ne ivbi e Taia wee ba. Iran gha go kha wẹ a guọghọ e Jerusalẹm nẹ! Ẹtin ẹki ne ọ te do fo. Ẹ i ghi gu ima suan ọvbehe!

³ “Banbanna, vbene imẹ ne Nọyaẹnmwa ne Udazi khare ọ re ọna khin wẹẹ: Oghian an ọ re I khin, wẹ ne ore ẹvbo e Taia. I gha viọ uhunmwu ẹvbo nibun rre ne iran do guẹ gbinna iran gha rre zẹ vbe amẹ okun ne ọ khọn yo khọn rre.

⁴ Iran gha dunmwu ekẹn ne a gbe lẹga ẹvbo ruẹ, iran ghi vbe siẹn avbe owa ọkhẹ ruẹ ni yo sotọ. Ẹghẹ nii, mẹ gha do kpolo avbe ebubẹ ni rrọ hia kua, I ghi sẹ avbe okuta ne emwi rhọkpa ma degue rae.

⁵ Avbe ọgbehẹn ghi gha ka ọga iran vbọ vbe ehe ne ọ ye nii vbe okun. Mẹ ne Nọyaẹnmwa ne Udazi tae nẹ. avbe uhunmwu ẹvbo nii gha fu e Taia emwi viọ.

⁶ Iran gha vbe ya umozo iran gbele emwa ni rre avbe ore nekhua vbe uhunmwu oke ẹre. Ẹghẹ nii e Taia gha rẹn ighẹ mẹ ọrọre Nọyaẹnmwa.”

⁷ E Nọyaẹnmwa ne Udazi khare wẹẹ, “I ra mu ọba ne ọ ghi wegbe sẹ ehia, ighẹ e Nebukiadneza ne ọba e Babilọn rre ne ọ do khọn e Taia. Ọ gha ke odẹ okuọ rre ke irẹn kevbe ivbiyokuo nibun kevbe avbe ẹsin deba avbe iran ni hin ẹsin.

⁸ Iran ni rre ore ẹvbo vbe igiogbẹ, otọe nii, a gha gbele iran vbe igbinna nii. Avbe eghian gha tọnnọ uye, iran ghi vbe hẹ ekẹn gbe odẹ, iran ghi ye asa nibun ru egbekẹn ne ọ wegbe ya mu aro igbinna da ruẹ.

⁹ Iran gha ya okọ ematọn guọghọ avbe owa ọkhẹ ruẹ ni yo sotọ.

¹⁰ Ebubẹ ne ẹsin ne iran hin khian gbe, gha gue ruẹ muotọ. Owogho ẹsin iran ni si okotọ kevbe ikẹkẹ okuo khian gha mu ekẹn ẹvbo ruẹ rueghe vbe iran a gha la onurho ẹvbo ne ọ rẹnkhuan nii gbe rra.

¹¹ Iran ni hin ẹsin gha vẹ la ore ẹvbo ruẹ, iran ghi gha ya umozo gbele emwa ruẹn. Avbe orre ruẹ ni kọnkọn hia gha khian ne a guọghọ kua.

¹² Iran ne eghian ruẹn gha tobọ iran viọ emwi ne u mwẹ kevbe atẹ ruẹ. Iran gha guọghọ ekẹn ẹvbo ruẹ gbotọ, iran ghi vbe zanzan avbe owa ẹfe kpọkua ne uwa bọlọe. Iran gha viọ avbe okuta kevbe erhan kevbe iku ni rrọ, iran ghi filo ehia ku uwu okun.

¹³ I gha dobọ ihuan ne uwa so yi, I gha gue emwi ne akpata ruẹ kpe unu.

¹⁴ Emwi ne I ra sẹrae ma gberra okuta ne emwi rhọkpa ma degue ehe ne avbe ọgbehẹn gha na gha ka ọga iran. A i ghi dọlegbe bọ ẹvbo nii ọvbehe. Mẹ ne Nọyaẹnmwa ne Udazi ọ re ọ tae.”

¹⁵ Ẹmwẹ ne Nọyaẹnmwa Osanobua tama e Taia ọ re ọna khin: “Ẹghẹ ne a gha na khọn uwa, avbe emwa ni yin lele eghute gha runran vbe iran a họn utumwẹ obalọ ọghe emwa ne iran gbele ua.

¹⁶ Avbe ọba avbe uhunmwu ẹvbo nii ghi gua okọ ye okun hia, gha tuorre ke ẹkete iran rre. Iran gha kie ẹwu iran kevbe ukpọn ne a do ọghe iran, iran ghi tota lele otọ gha guọ zẹzẹzẹ. Emwi ne ọ rruan ruẹn gha mu iran ohan sẹrriọ wẹ, iran i ghi ra sẹtin dobọ uguọmwẹ yi.

¹⁷ Iran gha sihuan orinmwi na nuẹn: “ ‘A fuẹn ẹvbo ne ọ hin usi nii uan! A kpolo avbe okọ ẹre hin okun rre emwa ẹvbo na ọ re ọ te kha yan okun ọ ghi gha runran emwa ni yin lele eghute.

¹⁸ Banbanna nian, vbe ẹdẹ ne ọ de guọghua, avbe otọe ne amẹ lẹga gha guọ, orrirri gbe ku emwa iran, vbe iran miẹn vbene a rẹnkhẹn ọẹn ruan hẹ.’ ”

¹⁹ E Nọyaẹnmwa ne Udazi khare wẹẹ: “I gha ya uwa khian ehe ne ọ mu ohioro zẹ vbene ẹvbo ne a fuan ye, ehe ne ọmwa rhọkpa i ghi ye. I gha ya amẹ okun ne ọ dinmwi gue uwa muotọ.

²⁰ I gha gie uwa gha rrie ẹvbo emwa ni wulo nẹ ne uwa ya deba avbe emwa ni ka gha rrọ ẹkpo nẹdẹ. I gha ru ẹe ne uwa gha rre agbọn ne ọ rre uwu otọ nii, vbe ehe ne avbe itowa etẹbitẹ nii ye ne uwa vbe avbe emwa ni wulo nẹ gba gha muobọ. Rhunmwuda, a i ghi ra dọlegbe yin uwẹ ne uwẹ ye rhie ihe ruẹ vbe uwu ẹbu avbe emwa ni ma he wu.

²¹ I gha ya uwẹ ru igiemwi ne ọ mu ohan, evba ọ re ọwuẹ ra fo yi. Emwa sẹtin gha gualọ ọ sokpan, a i ghi ra miẹn ọn ọvbehe.” E Nọyaẹnmwa ne Udazi tae nẹ.