Ezikiẹl 23 - Edo Bible (E Baibol Ẹdo) Version 1996

Etẹn Ikhuo Ni Ru Orukhọ

¹ E Nọyaẹnmwa keghi gunmwẹ guan wẹẹ,

² “Ovbi ọmwa, ẹghẹ ọkpa, etẹn ikhuo ne ivbiye eva kegha rrọọ.

³ Ẹghẹ ne iran he na ye giẹrẹ vbe iran rre Igipt, ọghẹrẹ iran giagiae, iran na khian ebabotu.

⁴ A tie nọdiọn ne ọ rrọ Ohola (Ọna ọ re ọ mudia ye ihe Sameria) a kegha tie ne kherhe ne ọ rrọọ, Oholiba, (Ọna ọre ọ mudia ye ihe Jerusalẹm.) I viọ iran eveva rọnmwẹ, iran keghi vbe biẹlẹ mẹ.

⁵ A gha rhe miẹn wẹ ọghomwẹ nọ, Ohola ne ọ rrọ keghi ye gha gbe ebabotu, ẹmwẹ avbe ọse ne ọ zẹẹ ye Asiria kegha ru ẹre ne rriorriorrio.

⁶ Iran keghi re ivbiyokuo ni yọ ẹwu ododo ibakpa, avbe abiẹyuwa ni rre ukpo ni yo ẹsẹse, iran hia keghi wa re igbama ni ye lọgiọlọgiọ, ni vbe hin ẹsin.

⁷ Rẹn kegha re emwi ẹwia ọghe ivbiyokuo Asiria hia fẹẹrẹ, orriarria ẹre keghi ya ẹe mu awua ye egbe ẹre egbe vbekpa ne ọ na ya gho ẹbọ Asiria.

⁸ Iwinna ebabotu ne ọ suẹnrẹn vbe ọ rre Igipt, ehe ne ọghẹrẹ ọre na fian, ọ keghi ye gha ru ẹe khian. Ẹghẹ ne ọ he na rre ọvbokhan okhuo, ọre avbe ikpia kegha gu ẹe ru emwi, iran kegha ru ẹe vbene a ru ebabotu.

⁹ Mẹ keghi rhie ẹre ne ivbi e Asiria ni zẹ ọre ọse, ne aro irẹn wa vbe ye ẹsẹse.

¹⁰ Iran keghi bannọ ọẹn ruan, iran na viọ ivbi ẹre nikpia kevbe nikhuo, iran na ghi ya umozo gbe irẹn tobọ ẹre ua. Ẹmwẹ ọnrẹn keghi khian ne ikhuo ya na iyẹn vbe ehe hia. Vbekpa emwi ne ọ rruan rẹn.

¹¹ “A gha rhe miẹn wẹ aro Oholiba ne ọtiọnrẹn nokhuo sẹẹ emwi na, rẹn ọ ghi wa vbe rhia sẹẹ, rẹn keghi vbe gbe ebabotu ẹsẹse sẹẹ Ohola ne ọtiọnrẹn.

¹² Rẹn kevbe gha rriarria lele iran ne avbe abiẹyuwa ni rre Asiria kevbe avbe ivbiyokuo ni yọ ẹwu ne mose mose kevbe ivbiyokuo ni hin ẹsin, iran hia ni wa re igbama ne lọgiọlọgiọ.

¹³ I keghi miẹn wẹ, awa ọ re ọ lalọ ẹre aro, kevbe wẹ ọtẹn nokhuo ne ogieva na, te ọ wa vbe rhiaa zẹ vbene ne nokaro ye.

^14-15 “Ọ keghi gha rhia yọ rhia yọ vbe ukẹkẹmwẹ ọnrẹn. Amazẹ ọghe avbe ivbiyokuo ni yọ ododo vbe ivbi Asiria, ne a ka ginna ekẹn, a na vbe ya ẹmu ne ọ ba woo rra ẹre, vbene iran na mu ugbẹkun ẹrọnmwọ gba, a na vbe ya ukpọn irriegie ni mose gbalọ iran uhunmwu lẹga, ọ keghi wa viẹn ye ọre aro.

¹⁶ Ọwarọkpa vbe ọ wa bẹghe iran, ẹmwẹ iran kegha fifi ẹre egbe, ọ keghi gie uhunmwu gie iran vbe Babilọn.

¹⁷ “Ivbi e Babilọn keghi rre do gha gu ẹe ru emwi. Iran ru ẹe sẹrriọ, iran yagha ẹe sẹrriọ wẹ vbe okiekie ẹmwẹ iran keghi khan rẹn.

¹⁸ Rẹn keghi wee egbe ẹre uhe ua ne agbọn miẹn, ọ keghi vbe gie emwa hia rẹn wẹ ọmwa ne ọ kẹkẹẹ ua rẹn khin. Vbene ẹmwẹ ọtiọnrẹn wa gha sọnnọ mwẹ erriọ Ọ re ẹmwẹ irẹn wa vbe gha sọnnọ mwẹ.

¹⁹ Ọ keghi wa dọlegbe khian ebabotu, ọ na wa gha do egbe ẹki ne ọ gha do ẹghẹ ne ọ na re ọvbokhan okhuo vbe Igipt.

²⁰ Ọ keghi wa gha rriarria lele avbe ikpia ne ẹmwẹ ikhuo i giee ya rẹn enegbe, iran ni yevbe ekẹtẹkẹtẹ amwẹ ra ọwẹe.”

²¹ (Oholiba, te u te wa vbe he ne u dọlegbe do egbe ẹki ne u gha do vbe Igipt vbe u he re ọvbokhan okhuo, ehe ne ikpia na gha ya ewẹn ruẹn ku, ne ọghẹrẹ ruẹ na fian.)

Vbene Osa Buu Ohiẹn Ọtẹn Nokhuo Nekherhe Hẹ

²² “Rhunmwudọnii nian, Oholiba, vbenian ọ re imẹ ne Nọyaẹnmwa ne Udazi tama ruẹn. Ẹgbẹ avbe ọse ruẹ nii wọọ ruẹ nẹ, sokpan, I gha ru ẹe wẹ ne ohu ruẹ gha mu iran, ne iran vbe rre do dolẹga ruẹ.

²³ I gha viọ ehia gha dee, ivbi e Babilọn kevbe Kialdia, ivbi Pekọd, e Sioa kevbe Koa kevbe ivbi Asiria hia. I gha si iran koko ighe avbe igbama ne lọgiọlọgiọ ne a biẹlẹẹ ye uwa nii, kevbe avbe ivbiyokuo, avbe ekaokuo ni rre ukpo ni yo nii kevbe ekaokuo ni hin ẹsin.

²⁴ “Iran gha ke odẹ okuọ suẹn gha guẹ gbinna, iran ghi ya ikẹkẹ okuo viọ ivbiyokuo nibun gha dee, deba okotọ ne a ya hẹ emwi gie iran. Iran mwẹ erhu ẹgere kevbe asa ne a ya khẹ egbe, iran gha lẹga ruẹ. I gha vbe rhie ruẹ ye iran obọ, iran ghi tie uhi iran ya bu ohiẹn ruẹn.

²⁵ Rhunmwuda ighe ohu ruẹ mu mwẹ nẹ, I gha gie iran ya ohu ru uẹ emwi. Iran gha giagia ihue ruẹ kevbe ehọ ruẹ kua, iran ghi vbe gbele avbe ivbi uẹ ua. Ẹn, iran gha miẹn ruẹn emọ ikpia kevbe emọ ikhuo, iran ghi sirra a gien iran an, ke iran kevbe ẹmwẹ ne unu.

²⁶ Iran gha yanghan ukpọn ruẹn kua, iran ghi miẹn ruẹn ikpẹrọnmwẹ ne a ya te egbe hia.

²⁷ I gha kie ruẹ ukpe orriarria kevbe uyinmwẹ ẹwia ne u yin ke ẹghẹ ne u ya gha rre Igipt gha dee. U i ghi ra ye dọlegbe ghe amazẹ ọvbehe ra ne u ye dọlegbe gha mu ẹmwẹ Igipt ro.”

²⁸ Vbenian ọ re Nọyaẹnmwa ne Udazi khare: “I gha rhie ruẹ bu emwa ne ohu ẹre mu ẹẹn kevbe ne ẹmwẹ ọnrẹn sọnnọ ọn.

²⁹ Rhunmwuda ne ohu ruẹ na mu iran, iran gha viọ emwi ne u he khuan hia, iran ghi bannọ uan zẹ vbe ebabotu, orriarria kevbe ebabotu ne u gbe

³⁰ ọ re ọ sii ọna ye uẹ egbe. Ebabotu ọ re u gha khin ne agbọn ẹvbo nibun, u keghi vbe ya amazẹ iran mu awua ye egbe ruẹ egbe.

³¹ U wa guẹẹ emwi ne ọtuẹn guee rhunmwuda ọnii, oya ne I rri ọtuẹn re, ọre I ra vbe rri uwẹ re.”

³² E Nọyaẹnmwa ne Udazi khare wẹẹ, “U gha wọn vbe ukpu ọtuẹn, ọ kpolo, ọ vbe dinmwi. Emwa hia gha sọnnọ ọn, iran ghi vbe gha ta ruẹ giẹ; te ukpu nii wa vuọn sẹ ukpẹ.

³³ Ọ gha so uẹ gọ, u ghi khian ne ayọn gbe, ighe ukpu ohan kevbe ọrhiae nii, ukpu e Sameria ne ọtuẹn.

³⁴ U gha wọn ẹẹn, u ghi si ẹe ka u ghi ye ihianmwẹ ọnrẹn gha vinnọ ewẹn ruẹn.”

³⁵ Banbanna nian, vbenian ọ re Nọyaẹnmwa ne Udazi khare, “Rhunmwuda ighe u mianmian mwẹ, u keghi fi iyeke gbe mwẹ, u gha rri oya ye ẹmwẹ orriarria ruẹ kevbe ebabotu ne u gbe.”

Vbene Osanobua Buu Ohiẹn Etẹn Ikhuo Eveva Nii Hẹ

³⁶ E Nọyaẹnmwa keghi tama mwẹ wẹẹ, “U mu egbe ne u ra ya bu ohiẹn Ohola kevbe Oholiba ra. Ba iran ifi ẹzọ ye emwi oya ne iran ru.

³⁷ Iran ghẹre, iran de izigha, iran ru ọghe vbekpa ẹbọ ne iran gho, iran de izigha vbe ne iran na gbele emọ ikpia ne iran biẹlẹ mẹ. Iran ya ivbi mwẹ emọ ikpia gha zọ ese ne ẹbọ iran.

³⁸ Ẹ i re ọnii ọkpa ọ re iran ru, iran vbe ru awua ye Ọgua Osa mwẹ, iran keghi vbe rraa iyi Ẹdẹ Ikẹtin ne imẹ mu gbọ.

³⁹ Ẹdẹ ne iran gbele ivbi mwẹ nikpia ya zọọ ese ne ẹbọ, iran keghi vbe gha die uwu Ọgua Osa mwẹ do mu awua yọ!

⁴⁰ “Kugba kẹghẹrẹ ọ re iran ya gha gie ya gha tie ikpia ke ehe ne ọ rrei ẹsẹse rre, avbe ikpia nii ghi vbe gele rre. Ivbiye eva na ghi khue iran ghi ba itiro, iran ghi ya ikpẹrọnmwọ te egbe.

⁴¹ Iran ghi tota ye aga nekhuẹrhẹ ne ọ mose, iran ghi mu eteburu ne a viọ emwi ni maa hia yi ye odaro iran vbe uwu ne eturari kevbe ẹvbi oliv ne I viọ ne iran ye.

⁴² A ghi họn owogho emwa ni kulo ni gbe ẹbu, emwa nibun ne iran viọ ke uwu ato rre. Iran ghi viọ emwiobọ ye ikhuo nii obọ, iran ghi munọ ẹde ni mose rhuẹ iran uhunmwu.

⁴³ Mẹ keghi vbe tama egbe mwẹ wẹ, okhuo ne ọghe mu rhia nẹ ọ re iran ya ru ebabotu na.

⁴⁴ Kugba kẹghẹre ọ re iran ya gha yo ọghe ebabotu na. Iran keghi dọlegbe bu Ohola kevbe Oholiba avbe ikhuo ni kẹkẹ ua nii.

⁴⁵ Emwa ẹmwata gha bu abe ghe iran wẹ iran ghẹre, iran vbe de izigha, rhunmwuda, iran wa gha ghẹ, esagiẹn vbe la iran obọ.”

⁴⁶ Vbenian ọ re e Nọyaẹnmwa ne Udazi khare, “Wa viọ otu ni si ọbọbọ ẹrhia gha dee ne iran do runran iran kevbe ne iran vbe do iran emwi hẹ.

⁴⁷ Gie iran si ọbọbọ ẹrhia filo okuta gbe iran, ne iran vbe ya umozo gu iran gbinna, ne iran gbele iran emọ, ne iran vbe gien irẹn owa a.

⁴⁸ I gha kie uyinmwẹ u sakanmwẹ ukpe vbe ehe ne otọe nii sẹe kevbe ne ọ rhanmwẹ, ne a ya ye obọ sekhae ne ikhuo hia wẹ ne iran ghẹ ru ọghe zẹ vbene iran na ru.

⁴⁹ Kevbe uwa ne etẹn neva na, I gha rri uwa oya ye u sakanmwẹ uwa na kevbe orukhọ ne uwa ru vbekpa ẹbọ ne uwa gho. Ẹghẹ nii, wa gha na rẹn ighe mẹ ọrọre e Nọyaẹnmwa ne Udazi.”