Ezikiẹl 22 - Edo Bible (E Baibol Ẹdo) Version 1996

Emwi Dan Ne Jerusalẹm Ru

¹ E Nọyaẹnmwa keghi tama mwẹ wẹẹ,

² “Ovbi ọmwa, u mu egbe ne u gha ya bu ohiẹn ẹvbo ne ọ vuọn ne avbe izigha ra? Wa rhan otọ uyinmwẹ osọnnọ hia ne ọ yinrin ma rẹn.

³ Tama ẹvbo nii vbene imẹ ne Nọyaẹnmwa ne Udazi kha hẹ wẹ: Rhunmwuda ighe emwa uwa nibun ẹre uwa he gbele ua, kevbe wẹ, wa ye amazẹ ne uwa gho mu awua ye egbe uwa egbe, ẹghẹ uwa wa dee.

⁴ Wa rri abe ọghe izigha ne uwa de nii, wa vbe ya amazẹ ne uwa mannọẹn mu awua ye egbe, rhunmwuda ọnii, ẹdẹ uwa wa dee, ẹdẹ uwa gba nẹ. Ọnii ọre ọ sii ẹe ne I na gie avbe uhunmwu ẹvbo gha ya uwa gbogiẹ, kevbe ne avbe ẹvbo hia na vbe ya ihue gie uwa asẹn.

⁵ Ẹvbo ni sikẹ uwa kevbe avbe ẹvbo ni rre urria gha ya ihue gie uwa asẹn rhunmwuda uyinmwẹ igbẹki uwa.

⁶ Ẹtin ekuabọ iran ọ re avbe ọkaolotu ivbi Izrẹl hia mu ẹtin yan, iran keghi vbe de izigha.

⁷ “Emwa ni rre avbe okpẹvbo, ne ọ ghi ya ọghọ ne avbe evbibiẹ iran i ghi rrọọ. Wa gbe avbe orhunmwuyẹn rhu, wa keghi mu avbe ẹgbẹe kevbe emọ ne ẹ i mwẹ erha vbuẹvbuẹ.

⁸ Wa i yọghọ ne avbe ehe nọhuanrẹn, wa i vbe lele emwi ru vbe Ẹdẹ Ikẹtin.

⁹ Eso vbe uwu uwa mu ohoghe ba ọmwa ọvbehe, ne a miẹn ehe na gbele iran an, eso vbe uwu iran vbe rri avbe emwi ne a ya ru ẹbọ. Eso, orriarria ekhọe iran ọ re iran wa ya ru emwi.

¹⁰ Eso vbe gu avbe amwẹ erha iran ru emwi. Eso vbe ya ẹtin mu ikhuo ni mu obọ mwẹ gu iran ru emwi.

¹¹ Eso vbe miẹn amwẹ ẹrrẹe, eso keghi vbe gu ivbi amwẹ iran nikhuo kevbe etẹn iran nikhuo, ne ikhuo ọvbehe biẹlẹ ne erha iran ru emwi.

¹² Eso vbe uwu avbe emwa uwa de izigha ya miẹn igho. Eso miẹn igho isu vbe ivbi Izrẹl ne ihua iran ne iran rhie igho na, iran ghi do ye ne iran na mu iran vbuẹvbuẹ fe. Iran mianmian mwẹ nẹ. E Nọyaẹnmwa ne Udazi guaan nẹ.

¹³ “I gha so ekpa mwẹ yan oyi ne uwa rha kevbe izigha ne uwa de.

¹⁴ Te uwa ro ighe orhiọn gha ye gha rre uwa re, ra ne uwa ye miẹn orhiọn ya tọn obọ mu vbe i a ghi ru uwa emwi nẹ? Mẹ ne Nọyaẹnmwa ọ re ọ guan, I gha taa ẹmwẹ nẹ, te I ru ẹe.

¹⁵ I gha zagha emwa ruẹn gba otọ kevbe uhunmwu ẹvbo hia, I ghi kie ẹre ukpe ighe emwi dan ne uwa ru.

¹⁶ Ẹghẹ nii, avbe ẹvbo nekpa i ghi ya ọghọ ne uwa, sokpan, wa gha rẹn ighe mẹ ọrọre Nọyaẹnmwa.”

Erhẹn Akpehuan Ọghe Osanobua

¹⁷ E Nọyaẹnmwa keghi tama mwẹ wẹẹ,

¹⁸ “Ovbi ọmwa, ivbi Izrẹl i ghi mwẹ asa ne iran ye mẹ. Iran yevbe ematọn ne ọ rhiae oze, ẹrọnmwọ, ematọn kevbe isan ematọn, ne a sẹrae vbe a ghi ya erhẹn kpe esiliva nẹ.

¹⁹ Rhunmwuda ọnii nian, te imẹ ne Nọyaẹnmwa ne Udazi ghi tama iran na wẹ vbene iran wa rhia sẹ ọ re ọnii khin. I gha do si iran koko ye Jerusalẹm.

²⁰ Zẹ vbene a vbe viọ isan esiliva, oze ẹrọnmwọ kevbe isan ematọn ye erhẹn. Ohu kevbe okuosu mwẹ gha ranran iran zẹ vbene erhẹn ranran isan ematọn zẹẹ.

²¹ “Ẹn, I gha si iran koko ye Jerusalẹm, I ghi hie erhẹn ye ototọ iran, I ghi ranran iran, vbene ohu wa mu mwẹ nii.

²² A gha ranran iran vbe Jerusalẹm zẹ vbene a ranran esiliva vbe erhẹn, ẹghẹ nii ọ re iran gha na rẹn wẹ obọ ohu e Nọyaẹnmwa wa da iran nẹ.”

Orukhọ Avbe ọkaolotu Izrẹl

²³ E Nọyaẹnmwa keghi vbe dọlegbe gunmwẹ guan wẹẹ,

²⁴ “Ovbi ọmwa, tama ivbi Izrẹl ighe otọ iran ma huan, rhunmwuda ọnii, te imẹ rri ọre oya vbe ohu mwẹ na.

²⁵ Avbe ọkaolotu yevbe avbe oduma ni vannọ yan atita ne iran gbe nẹ. Iran gha gbele emwa ni nẹ, iran ghi viọ igho kevbe emwi iran ne obọ iran vbare, rhunmwuda ne iran na de izigha, te ikhuo ni i mwẹ ọdọ ghi kpọ.

²⁶ Avbe ohẹn rra uhi mwẹ, iran i vbe yọghọ ne avbe emwi nihuanrẹn. Iran i vbe vin uwu ye ẹkpo emwi ne ọ huanrẹn kevbe nọ ma huan. Iran i vbe ma emwa alughaẹn negbe ne ọ rre ẹkpo emwi ne awua i ye ke ne awua ye, iran i vbe zẹdẹ zẹ ye ẹmwẹ Ẹdẹ Ikẹtin. Emwi ne a ghi la ọna miẹn ọrọre wẹ ivbi Izrẹl i ghi yọghọ mẹ.

²⁷ Avbe ewọe oga ọba yevbe avbe oduma ni wa zanzan aranmwẹ ne iran gbe. Iran de izigha ne iran miẹn ehe na họn ẹfe.

²⁸ Avbe akhasẹ keghi gbegue avbe orukhọ na, zẹ vbe ne emwa ya orhue gue ekẹn ne a gbe. Iran miẹn umian ohoghe, iran keghi vbe ta ẹmwẹ a tae yotọ ne ọ vbe re ohoghe. Iran ghi gha kha wẹ ẹmwẹ e Nọyaẹnmwa ọ re iran ta, sokpan mẹ ne Nọyaẹnmwa ne Udazi ma gie iran.

²⁹ Iran ni fe rha, iran do oyi. Iran ye obọ dan mu avbe ivbiogue, iran keghi vbe mu avbe orhunmwuyẹn vbuẹvbuẹ.

³⁰ I gualọ ọmwa ne ọ gha sẹtin gbe ekẹn, iran ni gha sẹtin mudia ye ehe ne ekẹn na de, ne ọ gbinna ne ẹvbo nii vbe ohu mwẹ a ra fuẹn ọnrẹn uan sokpan, I ma miẹn ọmwa rhọkpa Rhunmwuda ọnii, I hihiẹ ohu mwẹ yan iran,

³¹ ghi vbe fuẹn iran an vbene erhẹn fuẹn emwi uan rhunmwuda emwi dan ne iran ru.” E Nọyaẹnmwa ne Udazi guaan nẹ.